مصروف الزوجة

والله خاطري يكون عندي مصروف خاص فيني لأن ريلي يعطيني مصروف بس يوم أسير عند أهلي وياريتي يكفيني أنا وعيالي 1000 أحس ما يكفيني. شو تقترحون علي

قوليله مايكفي 1000قوليله هالايام زادت المصاريف وقوليه زيد المصروف عسب اشتري واتسوق وابي اشتري للعيال العاب وقوليله انه انته تاج راسي وانته كريم وايد امدحيه وايد وتغزلي فيه يعني الين مايصدق نفسه انه كريم وان شا الله يارب يزيد المصروف امدحيه وايد والله يصبرج يارب وحاولي حبيبتي تكملين دراستج اذا مب مكمله عسب ترومين تتوظفين لانه هالايام الرياييل زط الا القليل منهم

لا اله الا انت سبحانك اني كنت من الظالمين

خبريه ان المصروف ما يكفي
1000 ماتكفي شي خاصة مع طلبات العيال والاسعار الي تزيد كل يوم

الرياييل بشكل عام ما يعرفون انه الحرمه يبالها مصروف
عبالهم خلاص مادام يشتري اغراض واكل واي شي تبينه شو تبين بالفلوس ؟
لما ترمسيه تبين مصروف شهري شوفي الوقت المناسب ولا تعاندي وتصارخي انه لازم تعطيني وانتي تأخرتي هالشي يباله تخبريه من تملجون مب خلاص عطاج مهر وشبكه مالج مصروف
سوي لسته تبين للصالون او زياره وحده والده او وحده مريضه او تشترين ملابس لج رمسيه بطيب بيعطيج
اخوي مرة احتشر جدامي انه حرمته تبي مصروف وهو مب مقصر عليها بشي بعد قعده معاهم وسمعتهم خبرته انه يبالها مصروف لو مب مقصر يمكن تبي تجمع لها مصروفها وهي حره تسوي اللي تباه
انت اكيد لما كنت صغير كان خاطرك بلعبه لو ابوي ما عطاك مصروف كان ما شريتها ولو قعدت تزن على راسه ما بيشتريها لك لانه يشوف انه اشترى لك العاب وايد
فاقتنع وبدى يعطيها والحين ما شاء الله عليها سوت تجارة والله يسر امورهم

صح كلامتج أختي بس عرست وآنا صغيرة. ما أعرف شيء

1000 يعني مصروف حق كم يوم ؟؟؟ يعني اذا بتمين عند اهلج يومين او حتى اسبوع
وماعندكم حاجه يكفي

بس اذا مصروف شهري مول مايكفي اذا انتي بروحج اوكي بنقول بيسدج يمكن
اما للياهال وياج لاء

كلمي و وضحي له مافيها شي هذا ريلج
ويمكن يشوفج ساكته يتحرى هالمبلغ كافي

شي رياييل مايعرفون مب بخل فيهم بس هم مايدرون انج تبين اكثر لازم تكلمينهم وتبيبن بالضبط انتي كم تبين

انا اول ماعرست ريلي كان يعطيني مصروف مايكفيني
شوي استحيت اكلمه عقب خلاص تشجعت وكلمته والحمدلله زاده لي

المسأله يبالها شجاعة الحرمه وتتكلم ولا تستحي هذا حقها