معاناتي مع بنتي و نومها في الليل .

الله يخليكن وأتمنى ألي تقرأ موضوعي ترد علي و تقولي في شو أنا غلطانه لأني صدق تعبـــــــــــــت..
المشكله في بنتي أن ما تنام مش عارفه ليش..
أنا بنتي مخلصه الستة شهور و تمشي في السبعة تقريبا من سبوعين..
أنا بقول لكم كيف جدول بنتي طول اليوم..
بنتي تقوم الساعه سبع ونص أو ثمانيه أول ما تقوم أغير حفاظتها و بعدين أريقها (الفطور) وبعدين أخليها تلعب لين الساعه تسع أو تسع ونص بعدين أرضعها وترقد تقريبا نص ساعه أو ساعه ألا ربع ….
و ع الساعه 11 ونص أغديها و بعدين أغير لها كامل بجامه و حفاظه و
أحيانا لم الجو يكون دافي اسبحها و ع الساعه وحده أو وحده ونص أعطيها حليبها وترقد (وهني نبدأ بالمشكله) مــــــــــا ترقد ع النص ساعه تقوم,,أرجع أهزها شوي لما أشوفها نامت أحطها في سريرها "المنز" تنام شوي والله والله ما يمدي بس أحط راسي ع المخده بريح شوي تقوم…
وأرجع أرضعها و نتم ع هالموال لين الساعه ثلاث ونص وبعدين تقوم…
و الساعه أربع أكلها فواكه أو أي شي خفيف…وبعدين تلعب لين المغرب وبعدين ارضعها وتنام شوي يعني نص ساعه تقريبا….
وبعد ما تقوم ارضعها بين فتره وفتره لين موعد رقادها يعني الساعه عشر و نص تقريبا و اعطيها حليبها وترقد ( وتبدأ معاناتي ) مـــــــــــــــــــــــــــا ترقد يعني بترقد ساعه وبنبدأ بالموال

سمحلي يا خواتي طولت عليكن بس و الله مضايقه من هالموضوع ليش بنتي جيه ليش ما ترقد متواصل شوي…تعبت والله تعبت…أتمنى حد يفيدني ويخبرني شو اسوي…..انتظر ردودكم..

يمكن الحين بتبدي تسنن فديتها وتؤلمها

حاولي ترضعينها كفاية والحين عمرها يسمح انج تأكلينها
يمكن عندها غازات سوي لها مغلي النعناع خفيف يكون ويطرد الغازات

ننفس معاناتي مع ولدي
وهذا اني مواصله من امس

منى الحمادي شكرا ع الرد بس بنتي طالعت أسنان ألي تحت أثنينه قبل ما تخلص السته تقريبا…..
مجنونة قطر مشكوره ع الرد وأن شاء الله نحصل حل حق هالعيال…….

الغاليه رتبي رقادها ….

الصبح يوم بتنش سبحيها وبدليلها وريقيها ولعبي وياها والهيها باي شي لين الساعه 12 غديها ورقديها ( حد من اليهال من يتسبح مايكمل ساعتيين ويصييح يبا يرقد…

وان شاء الله بترقد وبعدين العصر اكليها وحاولي ماتخلينها ترقد المغرب لين فليل ع الساعه 9 ونص او 9 سبحيها بماي دافي ولعبي وياها ع الساعه 10 عطيها حليبها وان شاء الله ترقد

واليهال فهل السن لازم ينشوون اكثر عن مره بس ان شاء الله يوم بتكبر شوي بيعتدل رقادها بس اهم شي تنظمين رقادها من الحين…

لاتخلينها ترقد المغرررب

ورديه الصراحه ما قدر أسبحها فليل أخافها تمرض
أما يا كيوت ومن أذا هي توعي الساعه 3 ونص الظهر ما تتحمل تكون واعيه لين الساعه 10 أتم تصيح…..
الصراحه تعبت نفسيا….لدرجة أني أخاف يوم توصل الساعه عشر ,,أقول ألحين بتبدأ السهر و بيبدأ التعب