معلومات للي بتسافر تـركيـا هالسنه

يلوا

احلى مدينة .. بصراحه .. اهلها طيبين وااااااااااااايد

– يلوا تبعد 167 عن اسطانبول و 70 كيلو من بورصه .

– عند الانتقال من اسطانبول ل يلوا يتم ذلك عبر العبور ببحر مرمرة بالركوب في الباخره IDO ( الفيري بوت ) التذكرة ب 12 ليرة للشخص عبر مكاتب الفيري واسمها Deniz otobuse دينيز اوتوبيس .( دينيز يعني بحر) >> خبره لغة تركيه

– تروحون اول شي لميناء ( يوني كابي ) وتحجزونقبلها بليلة أحسن ، لأننا احنا رحنا بنفس اليوم وكنا مجهزين الشنط وكل شي ويوم سرنا لقينا التذاكر كلها مخلصه مع انه اول رحله بعد 3 ساعات واللي بعدها بتكون بعد 9 ساعات ، وقعدنا ننتظر في المينا ( شي صالة انتظار كبيرة ومكيفه وفيها سوق صغير .

– لما تقصون التذاكر قولولهم تريدون كراسي جنب بعض ، ولازم تروحون من بدري وتروحون صوب موقع انتظار باخرة يالوا بيكون مكتوب في لوحه YALOVA طبعا مايعطون تذاكر بس يعطون ارقام كراسي .

(( هذي صورة تذكره الفيري ))

– اول ماتوصلون يلوا ( الافضل تروحون لها الصبح عشان موضوع السكن ) بتلاقون ميناءها بسيط جدا ولا تشييك جوازات ولاشي .. بتلاقون التكاسي والباصات اشكثرها ( حتى بالليل ) . اركبوا تكسي أفضل من الباص لنه متعب شوي خاصة بيكون معاكم اغراض ( على فكره التكسي غااااالي .. بس ينفع للازمات ) كلفنا من المينا للفندق 33 ليره .. يعتبر مبلغ كبير لنه الفندق مب بعيد وايد ..

– احنا حجزنا في فندق قصر مرمرة هو فخم 5 نجوم وجنبه فندق اسمه ايلنجنس بس ما انصحكم في الاثنين .. صح على مستوى بس بعيدين وايد من المدينه .. معزولين بعيد .. اعتقد هذيلا افخم فندقين هناك بس مملين .. لنهم بعيدين بتلتزمون ترجعون بدري ..

– افضل شي تسكنون في قرية ( جوق جدرا ) قريبه من تريمال هناك كله بنسيونات وشقق وبتلاقون من يأجر لكم ان شاء الله .. غير ذلك تحسينه قريه عربيه .. كله خليجين وعرب .. وقريه صغيره شرات الحاره ^_^

صوره من قرية جوق جدرا

– الانتقال في يلوا أفضل يكون بالميني باص ، رخيص جدا ، ياخذ ليره وحده بس على كل شخص .. تخيلو كنا نركبه من الفندق لوسط المدينة بليرة اما بالتكسي 35 ليره .. !! بس اهم شي لازم تنتبهون شو مكتوب على الباص أي منطقه ( تيرمل او جوق جدرا او ويسبنر …. الخ )

– على فكره كل سبت واثنين وخميس يصير سوق شعبي في نص البلد رخيص فيه كل شي .. احنا مطيحين هناك يومين .. صراحه اجواء يلوا غييييير
هالسوق جنب محطة الباصات .

صورة محطه باصات يلوا

احلى المناطق في يلوا :

– شلالات تيرمل Termal ( لازم تروحون لها بالباص افضل )
– ينابيع تيرمل الحاره ( فيها مسابح للرجال والنساء ) ممكن العائلة تستأجر حمام كامل لها
– قريه جوق جدرا
– كورنيش يلوا
– كورت كوي ( على طريق تيرمل )
– كوكشدرا و اوسبنر ( قراب وايد من تيرمل )

صورة من مدخل حمامات تيرمل الحاره

– للانتقال من يلوا الى بورصة بيكون بالباص / فيه وسط يلوا محطه باصات انتو قولو لراعي التاكسي او الميني باص( اوتوبيس ) واحسن الشركات هناك هي ( مترو ) باصاتها فخمه ونظيفه والتذكره 12 ليره للشخص ويقدمون المشروبات البارده والحاره في الباص .

– الطريق تقريبا ساعه .. وكله مناظر حلوة ^_^ جبال خضرا .

– عند الوصول الى بورصه بتلاحظون انها مدينة كبيرة نفس اسطانبول مو شرات يلوا ، بورصه مدينة كبيرة الافضل تتنقلون فيها عبر ( الدولمس ) Dolmus وهو تكسي بس لونه ابيض ، التكاسي الغاليه لونها اصفر ، المهم الدولمس هذا شرات الباص يعني يوقف يعبي زباين عددهم 4 .. وهو رخيص ياخذ ليره على الشخص ومابيوقف وايد لنها سياره صغيره وماتكفي وايد بس 4 ..

– نحن سكنا في فندق اناطوليا .. صح حلو ومتروس عرب .. بس الله لا يراويكم الحر المكيفات ماتشتغل من غير انه مشكوك في امره في بنات الحرام وايد .. ويسد اول ماتدش الفندق يعرض لك قنوات اباحيه .. بس بفلوس طبعا .. اذا تبا تشوف ادفع .. هالشي ماحبيته فيه .. المكيف + الاباحيه .

– للرجوع من بورصه الي اسطانبول .. عبر الباخرة نفس الشي .. قولو لرسبشن الفندق نريد نروح ل ( دينيز اوتوبيس ) خل يوفرون لكم تكسي .. يوديكم له ..

– المهم اكثر شي حبيته في بورصه ( اكلة اسكندر كباب ) روحو مطعم اسكندر في ميدان هيكل .. وذوقوه وقولولي رايكم ^_^

صوره اسكندر كباب

من اجمل مناطق بورصه :

– جبل اولوداغ ULUDAG فيه التلفريك تروح للجبل بالتكسي او الباص .
– داغ ترا يعني جبل << اقولكم خبره
– الشجرة التاريخية Big tree تقع بداية جبل اولوداغ
– شلالات كمال باشا
– حمامات اويلات المعدنيه ( ينابيع )
– شلالات سيد اباد
– بحيرة ازنك ( شمال شرق بورصه )
– حديقة الحيوانات الكبيرة
– منتزه لونا بارك
– الشجرة التاريخية Big tree تقع بداية جبل اولوداغ
– حدائق الشاي
– حديقة كولتور
– المسجد الاخضر ( ياشيل )
– ساحة هيكل يسمونه الميدان بعد
– الشلال الصغير روحوله بالميني باص
– السوق المسقف ( غالي ترا ) cover bazaar
– زفير مول

على فكره العداد في بورصة يبدا 1.25 ونفس الشي .. التكسي انواع الاصفر والابيض ..

صوره لمجرى الشلال الصغير في بورصه

شي مطعم جنب الشلال الصغير .. عطونا غدانا وخلونا نشوي .. حلوة الحركه

(( الشمال فيه مناطق مايعرفونها العرب .. ويجب السفر اليها بالطائره ))

طرابزون تعتبر عاصمة الشمال وتبعد عن اسطانبول تقريبا ألف كيلو ! .. فالافضل الذهاب إلى هذه المناطق عبر الطيران الداخلي .. التذاكر مب غاليه وايد ..

– عند الوصول الي طرابزون يفضل الذهاب الى اوزنجول بالباص لأنه رخيص .. ويقع في محطه تجمع باصات قريب من فندق irem وهو قريب من السوق الروسي ( روسي بازار )

(( صورة الفندق الي قريب من المحطه ))

– طرابزون جوها رطب .. احسن ماتقعدون فيها .

– طول الطريق من طرابزون لاوزنجول راح تنبهرون بالمناظر ..
شوفو المناظر الي في الطريق

– يوم توصلون اوزنجول بتستقبلكم بحيرة اوزنجول الكبيرة والمسجد ^_^

وهذا منظر للقرية من فوق الجبل

المناطق في اوزنجول :

– جبل شكر سو ( ماء السكر ) .. سو بالتركي يعني ماي .. هذا يكون فالصيف في القمه فيه ثلج

– اذا نبا نرجع لطرابزون من اوزنجول نسأل أي حد مثلا اصحاب البقالات او البنسيونات عن اوقات الباصات الي تودي لاوزنجول او ايدر .. او أي منطقه تبون تسيرون لها .. لأنه اوزنجول مافيها تكاسي ماشفت أي تكسي فيها بصراحه .

– في منطقه ثانيه موجوده في الشمال التركي وهي ايدر .. هي قريه حلوة وايد وباااارده ..بس مشكله مافيها اماكن ترفيهيه وايد .. حلاتها طبيعتها و برودها بس

– وشي منطقه اسمها متشكا .. صح حلوة .. بس مافيها شي حلو غير قلعه سوميلا .. وانا ماقصد القلعه لني مانصح حد يروح لها .. مافيها شي غير تماثيل مسيحيه ومش حلوة ابدا .. اما المنطقه الي حواليها رائعه اعتقد اسمها منتزه التندرا .

– وشي فالطريق ل متشكا منطقة كوشندرا بعد حلوة ومنتزه زيقانا و مغارة كاراجا في الشمال غرب .

– عموما متشكا تقع بين المطار وطرابزون تقريبا تبعد 35 كيلو من طرابزون .

– وشي مكان حلو مدحوه ناس لنا ويقولون بارد موت .. وهو مرتفعات السلطان مراد .

– عموما يعتبر الشمال التركي افضل من اسطانبول وضواحيها .. خاصه انه اهل الريف طيوين وايد .. ويرحبون بالغًرب والمسلمين ..

صور للشمال التركي ..

اوزنجول و جبل شيكر سو ( شوفو الغيوم قريبه)

آيدر

متشكا

.
.

واخر شي .. قوس قزح يودعكم ^_^

ان شاء الله تكونون استفدتو من اللي قلته ..

مشكوورة ايمي على التقرير الراااااااااائع ^ـ^