اشحالكن خواتيه .. عساكن بخير
مثل ما شفتوا في العنوان .. أبا مساعدتكن .. واعرف انكن ما بتقصرن ويايه
بغيت منكن طرقة مرقـــــــــــــــــــــوقة الدياي .. واباها سبايسي حاره شوي
من كمن يوم داقه في راسي وابا منها .. نحن ماحد فالبيت يعرفها للأسف ولا السيده والوالده
مره اربيعتيه طرشتلي امها مسويه تخبببببببببلت عليها …
بس ستحيت اقولها عن الطريقه لأنه اكيد امها بتسويها مره ثانيه ما ريد اتعبهم
يلا بنات همتكم .. ابا الطريقه لذيييييييييييذه ادق فالراس
واذا في اكثر من طريقه يا ليت تفيدوني
في انتظار تفاعلكم
بخبرج اكثر عن طريقه هي تسوي يا بخبز جاهز او عجين
بس طبعا الاروع العجين
اول شي المقادير
دياي مفور بماي فيه بهارات وماجي وبعدين تقلينه لين يحمر
(في ناس بس تفور وناس غير تقلي )انتي اختاري
بصلتين صغار مقطع بس من فوق على شكل زائد +
بطاط مقطع بالطول
جزرمقطع بالطول
فلفل باردمقطع بالطول
زنجبيل وثوم مدقوقين
نعناع وكزبره وبقدونس مقطعين صغار
فلفل حار (اذا تبين)
عصير طمام 3
صلصله طماطم
وبهارات بودره (بزار او كاري و كمون وهيل )
حلبه حب شوي
ليمونه يابسه يا مكسره او مخبوقه شوي
ومكعبين ماجي
وملح حسب الرغبه
والعجين تكونين مسوتنه من قبل
ماي
طحين منخول رقم 2
وشوي ملح
لكل 3 اكواب طحين 1 كوب ماي نفس الكوب
اعجنيهم وايد كثر العجن يخلي المقطعه احلى
وكوريهم خليه لين تخلص الصالونه من الفوران
الطريقه
اول شوي تحطين زيت
وتحطين البصل حركيه لين تحسينه استوى بني على اطراف واتنفخ حطي وياه الفلفل الحار اذا تبين
حطي عليه البطاط والجزر والفلفل البارد
وحركيه حتى يستوي لين وعقي حطي زنجبيل وثوم وتمي حركيه عشان مايلصق حطي عليه عصير طماط وخليه شوي ينطبخ وحطي البهارات ليمون اليابس والحلبه والماجي والملح
وحطي البقدونس والكزبره المقطعين
وترسي الماي على كميه العجين خليه لين يغلي وعقب يوم وتبدا تفور افردي كل وحده وحطيها داخل الصالونه مع التحريك عشان تتقطع شوي
وخليه لين تشوفين العجين صار لين
نحن نسوي تنور وانخله داخل يكون احسن عشان تستوي على راحتها وتاخذ كم ساعه
واذا ماعندج تنور حطي بالفرن لين تشوفينه صار زين
لكن اذا مابتسوين العجين قطعي الخبز اللي تبين طبعا مب رقاق يا خبز ايراني او خبز لبناني
وبالهناء
يا احلى طباخه .. ما قصرتي الله يعطيج العافيه