خواتي ربي يسلمكن أريد أخذ ليسن ولا أعرف وش أسوي ولا وش الخطوات،
أريد تساعدني إلي منكن جربت تخبرني وبالاخص ليسن اليديد ،
يجولون مستوي إجراءات وخطوات وأيده وأختكن ولا أعرف شو السالفه ،
فالي تساعدني وتوضح لي يزاها خير وربي ييسر لها أمورها يارب
وبالتوفيج اختى
ماقصرت ثمايل عالشرح
اذا في امارة ابوظبي ومدينة العين مثل ماقالت لج الاخت ثمايل
بعطيج بالتفصيل الخطوات وعشان بنات العين يستفيدن بعد
الخطوه الاولى :
الذهاب الى ادارة الترخيص ترخيص السائقين في منطقة فلج هزاع لفتح ملف لاستخراج رخصة القياده
طبعا في قسم خاص للنساء الحمدلله يخلصون معاملاتكم بكل يسر باذن الله
ساعات العمل:
من 7:30 صباحا حتى 8:00 مساء
الاوراق المطلوبه:
صورة جواز السفر
صورة الهويه
صورة خلاصة القيد
صوره شخصيه
مب متاكده اذا خذو مني بس اللي اعرفه انهم صوروني من كاميرتهم الخاصه بتكون للملف
لليسن بياخذون الصوره من عندج اطمني
طبعا لازم يكون معاج ولي الامر سواء الاب او الزوج
وفي حال وفاة الاب يروح المسؤول عنج الام او الاخ وطبعا هني بتحتاجون لـ اوارق اضافيه مثل حصر الارث والتوكيل الخ
بعد ماتخلصين بيعطونج ورقه تاخذينها وتروحين تسوين فحص نظر بيكون بنفس المبنى
وعليه 25 درهم ثم ترجعين لنفس المكان السابق تخلصين الاجراءات الباقيه وتدفعين 100 درهم
بتعطيكم الايصال وورقة عنوانها موعد واستمارة فحص السائقين
الخطوه الثانيه
الذهاب الى شركة الامارات لتعليم قيادة السيارات في مزيد معسكر الشركات بتلقون لوح ارشاديه
اول ماتوصلون تروحون لخدمة العملاء في قسم للنساء مخصوص اول شي تسونه طباعه تطبعن الاوراق يسون لكم معامله وتدفعون مبلغ 20 درهم وتعطونهم صوركم
وجواز السفر او الهويه مع استمارة فحص السائقين توقعون ع المعامله وتذكرون مستواكم التعليمي ثانوي جامعي الخ
ثم تختارون موعد الحصص النظريه صباحي او مسائي حسب اللي يناسبكم
عباره عن اربع حصص كل حصه مدتها ساعتين لدرسين يتخللها استراحه
الحصص نوعين في مكثف عشان تخلصون بسرعه بيوم واحد هاي سعرها بيوصل الف وشي او الفين درهم حسب اختياركم
الحصص العاديه الغير مكثفه بتكون اربع ايام ورا بعض او يومين في الاسبوع الاول ويومين بالاسبوع الثاني حسب المتوفر تدفعون لها 830 درهم شامل سعر الامتحان
يعني قولي سعر الحصص 780 والامتحان 50 المجموع 830 درهم
#ملاحظة الحصص المكثفه صح انتي تدفعين مبلغ كبير لكنج مابتحضرين كل الدروس بيعطونج تقريبا اربع دروس والباقي درسيهن بروحج في البيت بعكس اللي تختار الحصص العاديه تاخذ 8 دروس
وبتطبع لكم الجدول ومواعيدها ومكانها مع كتاب طبعا الكلاسات بتكون بالطابق الاول
الحضور لجميع الحصص النظريه في حال ماحضرتي بتكون في غرامات الخ المكان مرتب الكلاسات النسائيه منفصله حرمه ادرسنا وقسم خاص للنساء في غرفة انتظار وحمامات الدروس موجوده بالكتاب في حال حبيتي تدرسين منه. مثل ماذكرت الحصه ساعتين بالتالي تاخذون درسين و ماتكون مرتبه ممكن اول حصه لج يكون الدرس السادس فهالشي ماحبيته الافضل تكون مرتبه لان انا اول درس لي كان عن السلوك والاخطاء والحوادث جي بخاف ومابتشجع لوول
الحصه الاولى: سلوك القياده والاداب الانسانيه على الطريق +بعض المواقف الحرجه
الحصه الثانيه:قواعد المرور والشواخص المروريه وعلامات الطريق+ القياده داخل حدود المدينه
الحصه الثالثه: معلومات عن السيارات +القياده في الظروف الصعبه
الحصه الرابعه: قاعة السلامه +القياده خارج حدود المدينه
بعد الحصه الاخيره سيري خدمة العملاء واحجزي للامتحان
الامتحان النظري عباره عن 45 سؤال اختياري تخلصينه في ربع ساعه او اقل عشان تنجحين لازم عدد الاخطاء ماتتجاوز تسع اخطاء علامة النجاح 36
انصحكم تقرون الكتاب قبل الامتحان بيوم حلن الاسئله اللي في اخر الجابتر بتكونون في السليم
ولا تستهينون في الامتحان صحيح هو سهل بس بعد يفضل تحضرين له لان بالفعل في بنات يرسبن وان رسبتي بتردين تاخذين كلاسات نظريه مره ثانيه وتدفيعن فلوس
نتيجة الامتحان تظهر بعد نص ساعه اذا نجحتي تسيرين خدمة العملاء تقولين لهم انج نجحتي في الامتحان النظري بيسألونج اذا عندج خبره بالسواقه ولا لا؟؟ في حال ماعندج اي خلفيه عن السواقه تحجزين لدروس العملي تدفعين 2690 درهم في حال بغيتي كلاسات مكثفه بتدفعين 200 درهم زياده المجموع بيكون 2890 درهم
واذا تعرفين وعندج خلفيه بتدفعين 50 درهم ويسون لج امتحان تحديد مستوى وماعرف الاجراءات الاخرى المهم ارخص مابيدفعونج الالفين
الزبده بخبركن شي ممكن يفيدكن ويوفر فلوسكن #
دوري لج مدربين سواقه يعطون دروس سواقه خارج المدرسه حتى لو ماكنتي فاتحه ملف خذي دروس عمليه
سواء قبل فتح الملف او بعد فتح ملف سيري تعلمي السواقه خلال كلاسات النظري
جي بتكون عندج خلفيه عن السواقه ومابتضطرين تدفعين 2690 درهم لكلاسات العملي في المدرسه.
وعقب هالكلاسات بعد بتضطرين تدفعين 2024 وخرده لكلاسات ثانيه عمليه عندهم خارج المدرسه
يعني حسبي بيدفعونج لليسن في حدود 8000 درهم زياده او اقل حسب شطارتج ترسبين ولا لا
وغير المواعيد البعيده ساعات الكلاسات تكون بعيده بالشهور مب متوفره تضطرين تتريين وايد
انا عرفت هالشي عقب ماخلصت
المهم اذا حد منكن يبا نماذج امتحانات النظري تراسلني وبطرش لكن
كنت مسويه لي وكانت عندي مواقع فادتني في الامتحان النظري