السلام عليكم خواتيه الغوالي
كنت وعدتكم اني انزل موضوع لخبز البرغر وتأخرت انزله بسبب ظروف والحمدلله اليوم تفيجت انزله ^__^
اكيد كثير منا يحب يغير ويدخل الوجبات السريعه بس الاحلى ان كل شي ينطبخ في البيت يعني ماتشترينه من برع
ولجذيه قلت افيد خواتيه العزيزات ونزل هالموضوع يلي خذيته من موقع اجنبي وللامانه اول تجربه لي ماضبط لكن ثاني مره
صراحه
الطعم لا يقااااااااااااااااااااااااااااااااااوم سواء بتاكلينه مع برغر دياي او حتى جبنه ^_^
انزين
المقادير هي :
تاخذين بطاط وتقشرينها وتسلقيها بماء لين تستوي طبعا تجربين تدخلين السكين لو دخل بسرعه يعني استوت
عقب تاخذين ربع كوب ماي من ماي البطاط وتحطينه ع جنب
البطاط تخلينه يبرد شوي عقب تهرسينه انا استخدمت محضرة الطعام لانه كان حار لا تهرسينه وهو بارد بيتعبج
خذي نص كوب من البطاط المهروسه بالاضافه لربع كوب ماي البطاط ماي البطاط يساعد الخميره وايد هني
2 ونص خميره طبعا مثل ماقول داااااااايما الخميره تجربين تحطينها بشوي ماي دافي عسبت تتاكدين انها عايشه ومب ميته ^_^ لين تلاحظين تضاعف حجمها
كوبين ونص طحين
6 ملاعق زبده اي مايعادل اصبع الا شوي زبده دافيه مب حاره
نص كوب حليب دافي
نص ملعقه ملح
2 م عسل
2 م سكر
ا بيضه
للوجه
صفار بيضه مع شوية حليب
الطريقه
بعد ماتهرسين البطاط تحطينه بوعاء الخلط مع البيض والعسل والشكر والزبده الدافيه
تحركينهم زيييييييين بمضرب يدوي افضل لج
الحين تضيفين الحليب مع ماي البطاط تحركينهم وتحطين عقب الطحين والملح والخميره وتعجنينه لين تتكون عجينه لينه تلصق شوي بليد بس المهم تكون ناعمه وطريه
الحين تغطيها بمنشفه نظيفه لين يتضاعف حجمها
بعد ماتضاعف حجمها بتحسينها وايد حساسه وناعمه ومن ناحية النفش وخلج حذره نحن مانبي نطير الهواء يلي بداخلها ويوم بتفردينها لا تستخدمين المشبك لالا تراج بتضيعين تعبج
فرديها بشووويه طحين ولا تكثرين منه عسبت ماتقسى الحين بيدج تفرديها شوي شوي عقب تقطيعها ممكن توزني كل قطعه او انتي وكيفج ع حسب الحجم ممكن ميني وممكن الحجم العادي
انا خليتهم 8 قطع
كورتهم شوي شوي حاولي ماتطلعين الهوا
دهنت صحن الفرن وباعدت بينهم وخليتهم تقريبا ساعه ممكن 40 دقيقه لان اول مره مانفشت عنديه والمره هاي طولت الوقت ونفشت مثل ماكنت ابي
الحين دهنت الوجه بالبيض والحليب حاولي مايطيح للصحن لانه بيأثر بنفشت العجين بالفرن وبيتعبج لمن تطلعيهم ^_^ ولو حابه رشي شوية سمسم وحبه سودا
شغلي الفرن ودخلي الصحن وخذي مقدار 2 م كبار ماي ورشيه على صحن الفرن يعني اللي يكون فوق النار مباشره وبندي بسسسسسسرعه
الهواء هني بيلعب دور في ترطيب الخبز والبخار بيساعد انها تنفخ بعد مايحمر من تحت وينضج شغلي من فوق بس للتحمير
هني الصوره تبين كيف من الداخل
اسفنجي ومنفوووش وناعم
طلعيهم وغطيهم بمنشفه نظيفه
لو تعرفين تسوين برغر بلبيت من مفروم اللحم او الدياي يكون ممتاز ولو مثلي كنت مستعيله حطيت الجاهز مع شرائح بصل وطماط وخس وصوص
ماتتخيلين النكهه يمي يمي شوي عليها
وبتجربينها مره وثانيه وثلاث
ملاحظاتي :
بنات لو جربتيه اول مره وماضبط لا تقولين مابجرب لا بالعكس من اساسيات الطبخ انج تجربين مره ومرتين وثلاث كل ماغلطتي بتعرفين وين غلطج وبتتجنبينها انا بصراحه يوصل احيانا لاربع خمس مرات لين اتقنعا وما اعجز واتملل ههههه الطبخ يباله طووولة بال ونفس عميق وانج تحبين الطبخ بنفسه لانج رح تجربين اشياء يديده وتبتكرين اشياء حلوووووووه
بنات المفروض يطلع عندج خبز خفيف ومنفوووش ومن داخل اسفنجي ولاتنسين نقطة انج تحطين 2 م ماي وترشين صحن الفرن مهم جدااااااا
وهني على قلوبكم
تريوني بموضوع ( الزربيان الهندي )
تسلم ايديكي