موضوع يديد بنفتحه عشان يكون حلقة وصل بيننا بشكل سريع ومركز
هاللا الله بالتفاعل والردود المفيده خصوصا ان الجو الحين رجع للأوضاع اللي عارفينها
شمس
حر
عرق
(sorry ما بحط صوره)
عطش
الموضوع انا اعتبره مهم جدا عشان جيه بنحط فيه تجاربنا ووصفاتنا ونصايحنا وكل شي يهمنا ونبغي نعرفه
وبنفس الوقت بيكون همزة وصل بينكم يعني سؤال منا وجواب مناك
بس رجاء بنات اللي تدخل وتشارك او تسأل او ترد على حد ياليت لو تمر ع الموضوع عقب ردها عشان تشوف اذا حد بيسألها زياده او حد عنده ملاحظه
وبعد نبغي تفاعل اكثر من البنات
انا عن نفسي بقولكم
بعدني مستمره على غسول N07 والتونيك ماله
احسه ينظف البشره عدل والحبيبات اللي فيه ناعمه وما تخدش البشره
التونيك مع انه مبيض بس ما يجفف البشره او يعطي احساس بالحرقان
هم الاثنين ريحتهم حلوه وخفيفه مب قويه ابدا
بالنسبه لكريم الحمايه من الشمس عندي هالاثنين احبهم وايد
هذا احبه لانه يشكل قاعده ممتازه للمكياج بالنهار خاصه اني ما احط فوقه فاونديشن عشان مايزيت ويهي او يكون ثقيل ع البشره بس بودره باسفنجه مبلوله
درجة الحمايه فيه 60
هذا الحلو فيه انه خفيف وايد يعني ما يشكل ثقل ع البشره ابدا ودرجة الحمايه 100
هذا لوشن مبيض من نفس ماركة كريم الحمايه الاول SOSKIN نفس الماركه سعاد لطفي توصف منها كريمات للبنات لمعالجة البشره
الماركه متوفره في الصيدليات
كل يوم العصر اغسل ويهي وامسحه بقطنه مشبعه من هالتونر وحتى منطقة الرقبه واتركه ربع ساعه
عقب احط كميه بسيطه من هالكريم الغني بالكولاجين
خفيف ع البشره وتمتصه بسرعه واخليه لين وقت المغرب اغسله
جربو هالصيف علاج منزلي للبشره بعلمكم اياه
زيت السمسم
عصير الليمون
استخدمي السكراب أول
عقب اخلطي كميه متساويه من زيت السمسم وعصير الليمون وادهني به ويهج
هالخليط يساعد على تنعيم وتفتيح البشره بصوره طبيعيه وبدون التسبب بالتهيج او مضرة البشره
اتركيه نص ساعه او ساعه كثر ما تقدرين وعقب غسليه عدل وادهني ويهج بلوشن SOSKIN
بتسئلوني ليش اتركه فتره طويله ع الويه بقولج لانه طبيعي يعني مافيه مواد كيميائيه مضافه له عشان تسرع عملية التفاعل ويا البشره فبيحتاج فتره أطول
أنا جربته لفتره كروتين ليلي كل يوم بس بدون السكراب كل يوم وحسيته نعم البشره واستوت منوره
روتيني الغذائي بيكون فيه تركيز على اكل البرتقال وشرب الماي والحليب والشاي الاخضر بشكل منتظم كل يوم
الصبح كوب حليب (أضيف عليه نسكافيه ) او هيل وزعفران
الضحى برتقالتين
العصر شاي اخضر واضيف له نعناع وعصير ليمون شوي
بالليل كوب حليب او روب بخيار
انشالله يكون الموضوع مفيد وحلو بمشاركاتكن
المشاركة الأصلية كتبت بواسطة الماركه شما 
ااااه ما أطيقه واكرهه مووووت
عكسج
خبريني شو تحبين فيه …خاصه في بلادنا الرطوبه تذبح وتسود الجسم على طول جسمنا عرقان
والله اني يوم اتسبح اخلي باب حمامي مفتوح عشان اييني براد من الحجره شوي
في الحمام او المطبخ الماي يغلي لين الساعه 11 بالليل
الشمس تحرق الجلد والشجر بعد
ما اخلي الشغاله تنشر الثياب الظهر لانه لونها يتغير (واجلبها بعد عشان اضمن الالوان تظل مثل ما هي)
ما اروم اسير الحديقه ويا بنتي مسكينه مره وديتها وعقب نص ساعه بغى يوقف قلبها من الحر والعرق
هاي كل ذكرياتي عن الصيف
أصلا ما أحب الصيف الا وقت السفر
المشاركة الأصلية كتبت بواسطة كشيخه بوظبي وانا بعد اترياج
بس بغيت اسالج عن الغسول ن 7 يناسب البشر الجافه لانه بشرتي وااااااايد جافه