ஐ◄███▓ نصائح و أكل النفاس ▓███►ஐ ‏

قائمة الممنوعات من الاكل والحركات :

بشكل مبسط ….يمنع الجوع منعا باتا وهذا متعارف عليه لدى الكل

ممنوع الاكلات اللزجه ملوخيه وباميه البصل والشمام والبطيخ وبعضهم يمنعون الباذنجان والجريش لانهم يسببون غازات

عدم شرب الماء بكثره ……هذي ماني متأكده منها ناس وناس على حسب الجسم

ممنوع المشروبات الغازيه والسكريات ولا تكثرين من الحلو عشان السكر وزيادة الوزن ويجيب الخمول للجسم

ممنوع الحركه العنيفه وحمل الثقيل وصعود الدرج بكثره

ممنوع المشي حافيه وخاصه على السيراميك ….والتعرض لتيارات الهواء والبرد

ممنوع التنقع بكثره وان حصل فلا يزيد عن عشر دقائق

العطس والكح ….بس هذا مالنا يد فيه خخخخخخخ

ممنوع البخور بكل انواعه بالنفاس من تعطر وغيره
الجلوس بهدوء ورويه بدون عجله ويفضل وضع المخدات خلف الظهر وتحت الركب

.. ما يفضل فعله في فترة النفاس :

اولا واهم شي انتم تدرون اننا مالنا صلاة والنفسيه مو

شي …..فاحرصي اختي على تشغيل القران عندك ولو بصوت منخفض

احرصي على الاستغفار طول الوقت فهو يشرح القلب والصدر ويهون عليك

الاذكار لاتنسينها طول الوقت .. والتسبيح والتهليل

ثانيا لصحتك وصحة الجنين اذا صارت الساعه 9 …..افتحي الدريشه وخلي الشمس تدخل عليك وعلى ولدك وخليها على جسمك شوي هذا مهمممم لصحة عظامك وعظام الجنين كما انه يعالج الصفار اللي يجي للاطفال

خلي لك وقت الظهريه او العصريه تحطين لك زيت بشعرك ولا خلطه بجسمك (( هذا للي موب عجازات ))

لا تكثرين من التهوله والمظاهر وتكليف نفسك فوق طاقتها …كل وحده واللي تقدر عليه (لايكلف الله نفسا الا وسعها ) اهم شي الاستقبال الحسن والبسمه الطيبه وقدمي اللي تقدرين عليه
وكثر المظاهر يجيب لك التعب والموضوع ما يخلى وانتم سيد العارفين

اذا تقدرين حطي لك غساله صغيره …. حطيها بالحمام واغسلي غسيلك اول باول
اريح لك …..اذا عندك خدامه تعتمدين عليها خير وبركه

حاولي تنامين بدري مع طفلك اريح لنفسيتك وجسمك

نصائح ذهبيه للراحه البدنيه :

اذا كنت ممن يشكون الالم الكثي الزائد عن الحد فلا تترددين باخذ المسكنات من بندول وغيره

استخدمي القربه او الكماده الساخنه لتخفيف المغص في البطن او من تحت تحطينها وتجلسين عليها

او على اسفل ظهرك ……تريحك

افتحي الدش على الماء الدافئ واجعليه على صدرك مع التدليك الخفيف ….وذلك لتخفيف الالم وادرار الحليب …..واستخدمي كريم طبي لدهن الصدر لمنع تشقق الحلمات

اذا احتقن الصدر والطفل نائم او غير جائع او رفض الرضاعه فالجئي للشفط لان احتقان الحليب يؤذي الصدر ويسبب ارتفاع الحراره

لا تنسين اهمية شمس الصباح لك ولطفلك

اذا توفر عندك احد يمسك الطفل فاستغلي الفتره لنوم عميق لتتعدل نفسيتك ويرتاح جسمك

نجي لنظام الاكل :

الفطور ….( من 7 الى 10 )

على الر يق ….تمره مع رشاد تؤخذ مع أي شي حار …قهوة نفاس او حليب دافي
بعد ساعه …..حلبه باي طريقه تعجبك ….وهي تؤخذ بالعشر الايام الاولى فقط

بعدين الفطور اللي يعجبك::

مصابيب مع عسل

عصيده او محلى او حنيني او فريك

خبز بر مع عسل وبانكيك بر وحلاوه طحينيه لانها تدر الحليب بس لاتكثرين عشان السمنه

الظهريه ……

تشربين شاي اعشاب اللي يعجبك ( كمون – قرفه – يانسون – شمر – زنجبيل ………الخ )وممكن تخلطينهم لو حبيتي …………..تجنبي

الميراميه لانها تنشف الحليب

اللهوم ….او السفوف :

يابنات اهم شي باللهوم انه يؤخذ مع شي دافي قهوه او حليب دافئ …..لانه اذا كان بارد يلصق بالفم وجدارالمعده وما يصير له اي

فايده …..خاصة الرشاد

اللهومات كل وحده وطريقتها بس هي تؤخذ في الصباح والمساء

فيه نصيحه لكم ياحلوين ….اذا تأثر الطفل باللهوم اقطعيه فورا ……يعني مثلا يسبب له مغص او استفراغ او سهر وعدم نوم

الغداء……

مرقة اللحم ….مهمة جداا ترم العظم وتقوي الظهر وتدر الحليب ….يخلط معها شوي لهوم او حلب

ممكن مطازيز او مرقوق او قرصان

صحن سلطه خضرا

ممكن مرقة لحم او دجاج مع خضار منوعه من كوسه وجزر وبطاطس وبازلاء يعني مرق بس بدون
طماطم….ترشين عليه ماش مطحون او تطبخين معه شوية حلبه وتاكلينه مع خبز بر….او شوية رز للي يموتون بالرز وما يستغنون عنه خخخخخخخخ….لاتطالعون فيني انا ما احب الرز

بس ابتعدي عن الممنوعات

العصريه والمغربيه :
اشربي شاي الاعشاب

اشربي عصيرات بس لاتكون بارده

اكلي فاكهه بس لا تقربين المحظورات

ممكن قهوة قشر او قرنفل مع تمر ………………حطي مع القهوه اول فنجان مره بس لاتكثرين

العشاء :

مثل الفطور ……او اذا حابه شوربه من أي نوع مع سلطه وكاس حليب منزوع الدسم

ممكن دجاج مشوي مع الشوربه …..وحطي مع الشوربه ملعقه صغيره لهوم حق الشوربه ,, لحم مشوي ,,, مرقوق او قبوط …

ممكن حنيني او فريك …..اللي تشتهيه نفسك

ممكن وجبه سريعه بس لا تعلمين احد اكليها بالدس بدون ماحد يدري خخخخخخخخخخخخخ

يااويليه الحين بنطق

المغاطس والمره والتحاميل :

المره …

مع القهوه احسن شي كل صبح وعصر …..بس بالفنجان الاول ولا تكثرين

المغاطس تجلسين بالماي الدافيه مع الملح لمده لاتزيد عن 10 دقائق

التحاميل :
كل وحده وراحتها ,,,,,,,

فيه ناس تفضل الشعبيه يعني اللي يسونهم الحريم ,,,

وناس تفضل الطبيه

وناس ما تستخدمها ابدا

كل وحده ورغبتها ……

الغسول …..

…..يغلى الماء مع الارطا مع ملح خشن …بكميه تكفي اسبوع مثلا

وبعدين يصفى ويوضع في الحمام وتتشطفين فيه مره الصبح ومره بالليل

وممكن تستخدمين الجفت وتلقينه عند العطار ويغلى بالماء ويصفى

وتخلينه بالحمام وتتشطفين فيه ,,, لكن لا تكثرين منه لأنه يسبب سواد

للمنطقه الحساسه ,,, وفي ناس تغلى المره و اذا صارت دافيه تتشطف فيها ,,, مره وحده باليوم …

اتمنى يعجبكم النظام وتستفيدون منه ……….ودمتم بالف صحه وعافيه

والله يعينكم على الواء والواء ,,,

وحبيباتي ترا كله باجره عند رب العالمين …….فاحتسبوا الاجر

و لا تحرموني من دعواتكم لي …

وربي يرزق كل محرووومه