بدخل على طول بالموضوع
بنات أنا مشكلتي تكمن في مصروفي… أهلي يعطوني مصروف للجامعه تكفيني شهر عسب أصرف على أكلي و شغلات ثانيه.. بس دوم أحس أنه مصروفي يظيع على شغلات تافهه و ما تستاهل.. على انه أنا من النوع اللي ما يصرف وايد إلا للضرورة.. مثلا يوم أطلب من المطعم ربيعتي تطلب ويايه بس ما تتكرم و تدفع لنفسها فأضطر أنا اللي أدفع .. تصدقون انها تطلب اكل يكفي بلد و فوق كل هذا ما تاكله و الله حرام هالفلوس اللي ينصرف و بالاخير يسير الزباله.. و أحيانا يوم تعرف اني بسير الجمعيه تطلب مني طلبات من الجمعيه و ما تعطيني حقهم … يعني المصروف كله يظيع على ربيعيتي … بنات الله يخليكم ساعدوني لأني من أسرة محدودة الدخل و أبوي يصرف على اخواني و ما أحب أكون هم ثجيل عليه… و أكيد اللي تعاني مثلي تستحي تطلب من أبوها مصروف كل أسبوع…بنات الله يخليكم ساعدوني كيف أصارح البنت بطريقه غير مباشره و كيف أنظم مصاريفي؟؟؟؟؟
بس انتي لازم تنظمين امورج وتخصصين لكل شي مبلغ معين
واذا شريتي شي ويت وهي شرت وياج قولي لها ماعليه اليوم فلوسي ما تكفي
او ان ما عندج .. ومفلسه … صراحه مب حلوه منها ابد ماعرف كيف الناس جي لا حيا ولا شي
اعرف انج في موقف صعب بس ان شاء الله البنات يفيدونج اكثر
لاني حسيت فيج وانا لو كنت مكانج ما بعرف اتصرف ..
الله يوفقج الغلا ويعينج على هالصديقه !!!
الله يوفقج عزيزتي ويسعدج يارب
حاولي مرة مثلا تقولين حق ربيعتج انج ما بتطلبين شي اليوم لنه مصروفج مايسد ويادوب يكفي اشيا ثانية أهم يمكن تحس شوي وترد نفسها
والجمعية سيري لها بدون لا تخبرينها ^^ يعني مرة وانتي رادة الظهر من الكلية اخطفي ع الجمعية وخذي لي تبينه وكوني مسوية حسابج لهالشي
وان شاء الله أمورج تكون طيبة والله يخلي لج الوالد ويعطيه الصحة والعافية ويرزقه من خيره يارب
كل يووم شلي مبلغ معين حق الاكل و شوي حق السامان اللي تبينهن
و ا1ا قاالت قوولي انج مب حاسبه حسابها
شو تصرفين عليها
ياكرهي لهالنوعيه من البنات ..
عطيها كااااااااش ف الويه .. قوليلها والله انا ماصرف عليج هالاشكال ماييبها غير جذيه
شوفي انتي مره سويها عليها
اذا شفتيها سايره الجمعيه قوليلها فلانه اباج تيبيليه هالاشيا ولاتعطينها فلوس شوفي ردت فعلها !