هجر الزوج كيف نتعامل معاه؟؟؟؟

الموضوع مثل ما هو واضح من العنوان هو الهجر .. هجر الريال لمرته سواء هجره لها في الفراش او الغرفه او البيت كله (مثل ما يسوي ريلي)

طبعا الهجر نوع من العقاب اللي اباحه الشرع عشان يستخدمه الريال لتأديب زوجته .. بس المشكلة ان الرياييل ما يستخدمونه بطريقة شرعية لكن صارو يستخدمونه لإهانة الزوجة و إذلالها.

انا مشكلتي ان زوجي ماعنده الا الهجر يحل فيه اي وضع بيننا .. اي مشكلة مهما كانت بسيطة يكون جوابها عنده الهجر .. احيانا يكون الهجر في الغرفه بس يعني قعدته و نومه في غرفة ثانية و يتم على هالحال أيام .. و أيام يخلي البيت بكبره و بغيب عني و عن بناتي بالأسابيع و الشهور حتى ما يتصل

انا احاول دوم اني اتفاهم وياه و اوضح له ان حل المشاكل مايكون بهالطريقة بس لا حياة لمن تنادي.. لدرجة اني صرت احس انه كارهني و يدور اي سبب للزعل عشان مايتم عندي .. و صارحته باحساسي هذا بس طبعا انكر … على فكرة ريلي ملتزم وايد بس احيانا يفسر الدين على مزاجه عشان يبرر لنفسه تصرفاته

تصدقون بنات .. نحن صارلنا 8 سنين متزوجين بس للحين ماعندنا سكن ثابت .. يعني عندنا بيتنا الخاص بس حياتنا منقسمة بين سكنا في هالبيت و السكن عند اهلي .. لان اهلي ماعادو يتطمنون علي وياه .. حتى بنتي حليلها العام مادخلتها الروضة بسبب عدم الاستقرار هذا و هالسنة دخلتها بس بعد مو منضبطة في الدوام لان بيت ريلي في منطقة بعيدة عن بيت اهلي .. قولو هالسنة عادي روضة انزين يوم تدخل المدرسة شو اسوي؟؟؟؟

والله انا مع اني احب ريلي مووووووووووووووت بس في الفترة الاخيرة صارت فكرة الطلاق دوم على بالي .. لان الوضع هذا وايد يتكرر و الكل ملاحظه طبعا (مع اني والله ابد ما اشتكي لحد حتى اهلي بس شو اسوي كل شي صاير جدامهم)

وبصراحة ريلي طيب و زين معاي و مع البنات بس مثل ماقلتلكم اي شي يصير و يزعله حله الهجر..وطبعا المشاكل و الخلافات صعب الواحد يتجنبها (انا اتكلم عن الخلافات البسيطة اصلا ماشي يصير بينا غيرها) ..فما اعرف والله

شو رايكم بنات؟؟ كيف المفروض اتعامل مع هالوضع … انا قبل كنت كل ما طلع من البيت او الغرفه اتم اعتذر و اترجا حتى لو هو الغلطان بس ماشي فايدة … جربت اني اطنشه و اخليه اذا زعل لين يرضى روحه بعد ماشي فايدة … فكرت ادخل حد بينا بس اتراجعت لان ريلي ما يتقبل هالشي مهما كان الشخص اللي بيتدخل … يبتله كتب و مواضيع دينية عن الهجر المبالغ فيه و اللي بدون سبب بعد ماشي فايدة .. الحين فكرة الطلاق هي اللي مسيطرة علي .. والله ماتتخيلون المذله اللي احس فيها يوم يهجرني اسابيع و شهور و اهلي و الجيران يتمون يسألون عنه و يعلقون..

شو رايكم؟؟ شو التصرف الصح في هالوضع؟؟؟؟

سامحوني طولت عليكم بس صج كنت محتاجة افضفض و اتمنى احصل منكم النصيحة

لا حول ولا قوة إلا بالله

ذي فتوى قيتها في النت ويبت جزء منها

سلام عليكم ورحمة الله وبركاته وبعد:
فإنه لا يجوز هجر الزوجة إلا لو ظهرت منها علامات النشوز، قال تعالى : { فإن أطعنكم فلا تبغوا عليهن سبيلا } أي إذا أطاعت المرأة زوجها في جميع ما يريده منها مما أباحه الله له منها فلا سبيل له عليها بعد ذلك وليس له ضربها ولا هجرانها وقوله { إن الله كان عليا كبيرا } تهديد للرجال إذا بغوا على النساء من غير سبب فإن الله العلي الكبير وليهن وهو ينتقم ممن ظلمهن وبغى عليهن. [تفسير ابن كثير].
والحق أن حق الاستمتاع مشترك بين الزوجين، بمعنى أن للزوج الحق في الاستمتاع بزوجته وكذلك العكس، ذلك لأن الاستمتاع مقصد من مقاصد النكاح،

ربي يعينج على مصابج

ريلج انسان ملتزم وهذا شي في مصلحتج ,, بس انج تيبين له كتب تثقيفية ويتم على عادته ,, صراحة شي غريب ,, عليج برب العالمين الغالية ,, هو حلج الوحيد مع استشارة اسرية سعيا للصلاح ,, الهجر مب هين ,, ويسوي جروح وايد عميقة إذا ماكان له سبب مقنع ,, لازمكم حل قبل لا يوصل المشكل للطلاق ( الي بديتي تفكري فيه )

ربي يهديه لج ويسخركم لبعض

استغفري وايد وايد ,, وصلي قيام اليل ,, خلي نيتج التقرب من الله سبحانه وتعالى قبل اي مصلحة ثانية ,,
وان شاء الله رب العالمين بيجزيج بكل خير

ليش ما تستشيرين حد واعي ومثقف من اهله

أو تطلبين اطراف من أهله و أهلج يتفاهمون وياه ويتعهد

جدامهم بعدم تكرار الهجر