هلا بخواتي لا تفكرن ولو مجرد تفكير بالإجهاض

هلا بخواتي لا تفكرن ولو مجرد تفكير بالإجهاض أنا أستوت لي قصه بحملي كنت آخذ حبوب ليزر علشان حب الشباب وبعدين تركت الحبوب وبعد شهر حملت وسرنا المستشفى وطالع الدكتور ملفي وقال لريلي لازم حرمتك تجهض الجنين….. حسبي الله ونعم الوكيل عليه فر عقل ريلي بكلامه قاله بيطلع معاق ومتشوه ويمكن ناقص له أيد أو رجل وحاول يقنعني بس رفضت والمشكله الدكتور قاله روح مستشفى قريب من بيتكم علشان تجهض حرمتك هناك وريلي خلاص مقتنع بكلامه حاول يقنعني وأنا رافضه تم يهدد بالطلاق وأنه ما بيتحمل مسؤوليته وصحت لين ما عورني قلبي حررررام والله حرااااام وداني بيت أهلي وتم يقنع أمي بس أمي ما عطته فرصه طاحت عليه تقوله حرررام هذا عطيه الله وفي أحد يرفضها وتميت بيت أمي فترة وأنا حالتي حاله تعبانه و أفكر بالجنين ولا بزوجي ولا شنو بيستوي عقب لما أربي المهم قلت إذا يبت ياهل معاق الحمدالله هذا أختبار من الله وبصبر وكل شيء بأجر عندالله وخلاص توكلت على الله وتم ريلي يتصل ويحاول يقنعني وأنا رافضه كملت 3شهور حمل وأنا أقول ماقدر الله وما شاء فعل بعدين رجعت بيتي وريلي مب متقبل هالحمل كله يدعي على الجنين في بطني حياتي أستوت جحيم وتخيلو 9 شهور وأنا على أعصابي أفكر جاعده على نااااااار …. سرنا أنا وهو عيادة خاصه علشان أسوي صورة سونار للبيبي قالتلي أنتي حامل ببنت سألتها مبين إذا كانت متشوهه أو فيها خلل لا قدر الله قالت لي مب مبين لو ييتي قبل بالشهر 3 كان بيبين لاكن الحين صعب البيبي كبر فرحت وايد أن الله رزقني ببنت شكرت الله وقلت الحمدالله رب العالمين وأشكرك يارب على كل شيء المهم ظهرنا من العياده وتهاوشنا أنا وريلي على نفس السالفه وزعل وعصب وتميت أصيييييييح وأقول اللهم ألهمني الصبر بس الصبر يارب وتمر هالمحنه على خييير ويا موعد ولادتي وياني الطلق وسرت المستشفى وتميت أعاني كنت ما أفكر بالآلام كنت والله أفكر ببنتي ومتشوقه أشوفها وكنت جاعدة على أعصابي والله وكنت أدعي ربي يلطف بي والحمدالله أول ما قالولي بنت قلت الحمدالله سألتهم أهي بخييير زينه فيها شيء قالتي الدكتورة لا الحمدالله البنت بخير ووزنها وكل شيء فيها زين لا تحاتي قلت هاتوها أبي أشوفها وأضمها لى صدري وأول ما حطتها الممرضه على صدري صحت وصحت ومب مصدقه أشوف وجهها ويدها ورجولها قلت الحمدالله توكلت على الله والله كافئني لاني توكلت عليه ومن توكل على الله فالله حسبه مب مصدقه الحمدالله يارب فرحت قلت للدكتوره نادولي ريلي أبيه يدش يشوف بنتي قالت أوكيه طلعت قالت له مبروك ياتك بنت الحمدالله كل شيء فيها زين ريلي ما صدق دخل علي باسني من راسي قلت له سير شوف البنت اللي كنت ناوي تجهضها وأنا أصيح من القهر لأني طول 9 شهور وأنا أعاني أفكر وغير المشاكل والضرابه قلت له سير شوف بنتي اللي كنت بتذبحها سير وتميت أتحسب على الدكتور اللي خرب حياتي وخرب علاقتي بزوجي حسبي الله ونعم الوكيل …. الحين عمر بنتي 6شهور وايد متعلقه بأبوها وأهو وايد متعلق فيها ويحبها حييييل ومدلعنها آخر دلع الحمدالله الله يراوينا قصص يشوفنا كيف أيمانا فيه وللعبره والله تعلمت دروس الله يهدي سر كل واحد ووحده مهمومه وحزينه وهذي قصتي أقولها للعبرة وأدعولي أن الله يجمعني بزوجي في الدنيا والأخرة آآآآمين

الحمدلله ، الله يحفظكم ويخليج لريلج وبنتج

يا حليلج والله تصدقين ان قلبى عورنى ودمعت عيونى وانا اقرا قصتج الله يباركلج فيها الغاليه واحييج على قوة ارادتج وثبات ايمانج وتوكلج على الله والله ما خذلج لان الله ما بيخذل عبده المؤمن المتوكل المحتسب المسلم اموره لله والله يثبتج على صراطه المستقيم يوم الحساب ويهدى ريلج ويخليلكم البنوته الحلوه امييييين

الحمد الله على السلامة والله يخليها لكم الله سبحانه إختبر إيمانج وصبرج والحمد الله الله رحيم بعبادة الله يجمعج بهم بالدنيا ولآخرة يارب

سبحان الله !! قصتج حلوه ومؤثرة وفعلا من يتوكل على الله فهو حسبه … يزاج الله خير ع طرحج لتجربتج

سبحان الله الله قادر على كل شي

تسلمين ويخليج للي يحبونج يارب تسلمين على المرور