وجهي في خبر كان – الرجاء مساعدة الكل وخاصة مس شوكولاته

السلام عليكم ورحمة الله وبركاته

بنات بتخبل عمري تحت الخمس وعشرين وبشرتي تلوع بالجبد كأني عيوز ام 50 سنة
الصراحة ما اهتم فيها بالنسبة للكريمات …. تصدقون ولا مره فعمري استخدمت كريمات لها
وعيوني:
ههههههههههه مترهلة وبدت فيها التجاعيد والسواد

اتمنى انكم تساعدوني وخاصة المشرفة مس شوكولاته لان خبرتها وايد حلوة

خبروني عن أفضل منتجات البشرة و العيون <<<<<<<<< بشرتي دهنية للأسف وبين فترة وفترة تطلع لي حبوب خخ

والله لما قلتي دهنيه قلت بالعكس اشهر بشرة معروفة عالميا بانها لاتشيب سريعا

عزيزتي ان شاء الله كلامي ينفعج بس اهم حاجة سوي تقشير زيلي كل الجلد الميت ويوميا حطي لج برنامج للعناية وعن تكوني كسولة شدي حيلج بتشوفين ويهج صافي وحلو وبترتاحين لما تعتنين بالجسم يوميا

واكيد الاخت شوكليت بتضيف نصايحها الجميلة

مرحبا حبيبتي
25 وتجاعيد هاي وايد صعبه يمكن تكون عوارض الجفاف فيها ومش تجاعيد
ترا حتى البشره الدهنيه مكن تتعرض للجفاف بسبب نقص الماء والدهون اللي فيها ما تعوض عنه
أهم ملاحظه حطيها في بالج ان بشرتج تعبانه من زمان ..بالتالي مافيه شي سحري ينعشها بسرعه …أوكيييي؟
المهم
هاتي أول شي: كرتون ماي من الاكواب الصغيره وخليه عندج بالحجره وطول اليوم اشربي منه (هالطريقه حق البنات اللي تقول أنسى)
ثاني شي: امر للي يسويلج الاكل كل يوم قولي له ابغي صحن سلطه خضرا كل يوم مرتين (ع الغدا وع العشا)وكثري فيها من الخس والبقدونس والنعناع والخيار والفلفل البارد وابشري عليها جزر وشوية طماطم (التتبيله بتكون نعناع جاف وعصير ليمون وزيت زيتون وملح وفلفل)
ثالث شي :العصر وجبة فواكه غنيه بالماي والفيتامينات (برتقال ..كيوي..تفاح..رمان..)اختاري اللي يعيبج طبعا

هاي اهم 3 نقاط في التغذيه الداخليه لمشكلتج ركزي عليها وايد لأنها مهمه جدا جدا واستمري عليها على طول مثل ما قتلج المشكله يبالها وقت

نشوف الحين العلاج الخارجي وبيكون على مراحل حسب النتيجه اللي بتوصلين لها
المرحله الاولى :
اول شي بشره دهنيه محتاجه غسول اوكي يخوز الدهون اللي فيها ويتركها نظيفه ..وعقبه محتاجه تونر يسكر المسام اللي استوى نظيف وبالتالي مفتوح عشان ما يتسبب لج بالتلوث اللي يتبعه التهابات وحبوب
ثاني شي لوشن مرطب (لوشن ومب كريم) اللوشن تكون صيغته أخف وتناسب البشره الدهنيه تستخدمينه بالنهار
ومافي مانع طول اليوم ترشين ويهج بماي ايفيان ينعش بشرتج ويزودها بالماي للطلبقات السطحيه لان الطبقه السطحيه ما يوصلها الماي من داخل الجسم بسرعه
ثالث شي محتاجه مرطب حق الليل خالي من الدهون تماما لان بشرتج دهنيه وهالكريم بينحط عليها طول الليل ما نبغيه يسد المسام يكفي الزيوت اللي تفرزها
رابع شي سكراب نوعيه ممتازه (جربي سكراب THE FACESHOP شوفي اللي بالسكر او الفراوله او سكراب من مجموعة التبييض هذا انا استخدمه وممتاز وبيريحج اذا بشرتج فيها حبوب ماراح يخدشها ) وعقبه ماسك يجفف الدهون وانصحج بالماسكات الجاهزه على شكل شرايح قماشيه او بصيغه كريميه 3 مرات بالاسبوع لمدة شهر وعقب مرتين بس بالشهر

المرحله الاولى استمري عليها شهر وهي تهدف الى ادخال اكبر كميه من الماء الى الجسم وتعويد البشره على روتين يومي بنزيد عليه شوية اشيا في المرحله الثانيه بتكون علاجات طبيه باذن الله
(اذا استمر وجود الحبوب في الويه )

مستلزمات ممكن تستعينين بها خلال هالمرحله وتحتاجين شراءها:
مجموعة فيشي للبشره الدهنيه جدا وهذا شكلها

مجموعة البشره الدهنيه من THE FACESHOP Fبزيت شجرة الشاي

او بالليمون

ماسكات جاهزه من ماركات معروفه او محلات ممكن توصلين لها بسهوله وحسب ميزانيتج
شوفي كلينيك موجود في باريس غاليري او اريج (الاسعار غاليه)
وبعد هيمالايا قناع النيم والكركم هذا ممتاز وانشاءالله بيعيبج وايد وبيساعد في حالتج (السعر في متناول الجميع)

بالنسبه لكريمات ترطيب العيون أنا بعدني اشوف كريم العيون بفيتامين E من بوتس هو التوب ونقطه صغيره جدا منه تكفي والتجربه خير برهان

هالاشيا الي اتذكرها الحين والسموحه على القصور
اي شي يخطر في بالج خبريني عنه او اذا فيه نقطه مب واضحه
ملاحظه مهمه : اذا الويه فيه حبوب ابتعدي عن استعمال الفرشاه في غسله عشان ما تنخدش الحبوب وتنفتح

6
واي فديت قلبج انا
ماقريت الرد بس شو شفت اش قد كاتبة ومتعبة عمرج كلت بشكرج قبل بعدين بكمل قراية
ان شاء الله في ميزان حسناتج يارب

مشاء الله ما قصرت مشرفتنا الحلوة ربي يعطيها الف عافية ^^

بعد حبوبة لو تقدرين تروحين عيادة جلدية تسوين فيشل وتنظيف عميق للبشرة + نصائح مس شوكلت

بتصير بشرتج من احسن مايمكن وصحية اكثر

الفيشل والتنظيف بينعش بشرتج ويزيل كل الخلايا الميتة والحبوب ويخلي البشرة مستعدة للإستقبال المواد الفعالة في الكريمات والماسكات اكثر

موفقة يالغلا

ماشاءالله مس شوكليت كفت ووفت ربي يعطيها العافيه