https://forum.uaewomen.net/showthread.php?t=714228
https://forum.uaewomen.net/showthread.php?t=727974
آخر أخبار بنتي أمونه … من بعدها ما شي خبر جديد .. لأنها راحت وما عاد لها وجود في هاي الدنيا غير الذكرى .. مثل ما قلت لكم قبل أمونه فيها مرض جلدي وصار ثلاث ارباع جسمها تسلخات وكان في ريلها جرح عميق وايد .. وكان معرض للبكتريا والفايروسات .. وفعلا صابها بكتريا قوي جدا..وكان لازم تاخذ مضاد بالوريد .. بس كان البكتريا اقوى منها وصار لها التهاب حاد وتسمم في الدم وتوفت وراحت وتركتني .. أن لله وان اليه راجعون ..
***********
ربي أنت تعلم أني لا اعترض على مصيبتي.. ربي أنت أحببتني فأبليتني .. ربي أحمدك وأشكرك على منح قلبي الحساس والضعيف القوة والصبر يا رحيم يا قدير.. ربي لك الحمد والشكر ..
– طلعت عصفورتي ( أمونه ) بتاريخ 7-5-2017م ، ونورت الدنيا بنورها .. كانت هديه من رب العالمين .. كانت رحمة من الله .. كانت ملاكِ الصغير .. كانت فرحتي وحلمي القصير .. كانت جميله وقويه .. كانت وكانت وكانت .. وصارت من الماضي وذكراها في قلبي وعقلي .. 46 يوم عشت أحلى وأصعب أيام حياتي !!!!!!! ، أحلى بوجودها .. أحلى بريحتها .. أصعب بمرضها اللعين .. المتوحش إلي ما رحم بنوتي .. وغزا جسمها بشكل فضيع .. لا رحم طفولتها .. ولا براءتها.. غزاها .. عذبها .. دمرها .. وأخيرا قتلها.. آآآخ ثم آخ ..
سرق فرحتي .. كسر خاطري .. قطع قلبي .. حرمني من ضناي.. صياحها في أذني .. نظراتها ما تفارق عيوني .. كانت تكلمني بعيونها .. تشكي لي آلامها .. كانت ملاكِ .. والله ملاك الرحمة .. كان وجودها بركه .. وجودها قربني من ربي .. وجودها قوة قلبي .. وجودها علمني وايد أشيا ما كنت اعرفها .. أولها محبة ربي لي .. صرت قريبه من ربي .. القرآن كان كتابي وانسي .. لا .. ما ضيعت وقتي في خرابيط .. وقتي كله قرآن .. ذكر الله .. الدعاء .. الرقي .. الصدقة……. .
يوم تأكدت عصفورتي أني تعلقت برب العالمين .. تركتني وراحت .. راحت بعيد .. طارت عصفورتي .. طارت روحها الطاهرة النظيفة من الذنوب والفتن الدنيا .. طارت وصارت طير من طيور الجنة .. طارت وراحت لعند أبوها العود ( رحمة الله عليه ).. طارت واقفة عند باب الجنة تترياني .. حبيبتي والله .. حياتي والله. .. الحين مرتاحة.. تعذبت والله تعذبت .
( 23-6-2017م) ودعتني بنظراتها .. ودعتني بهدؤها .. كانت امنوره بجمالها والله جميله … واتشوفني بعيونها فديت عيونها .. ودعتني .. حاولت تطلع من حياتي بهدؤ علشان ما أتألم .. فقدت الإحساس في جسمها .. وأعضائها واحد بعد الثاني انتهوا .. داخليا بنتي مدمرة ومنتهية .. بس .. خارجيا النور يطلع منها ..خارجيا كلها صحة ونشاط وجمال .. نظراتها نظرات الوداع .. آخر يومين تحملت وايد .. أتموت يبطئ .. بس ما صاحت .. حياتي والله ما صاحت ما كانت تبا أتعذبني و اتعبني .. ملاكٍ ..حياتي .. حبي وداعاً .. وعندنا لقاء في الجنة .. فديت عصفورتي .. صعب فراق الضنى .. اللهم طول بعمر ولدي عبدالله .. اللهم برحمتك لا تحرمنا من أولادنا .. اللهم لك الحمد والشكر.
25-6-2017م
عظم الله اجرج والله يصبركم يااااااااارب وان شاء الله بتكون طيره لكم في الجنه والاخره احسن لها من الدنيا
الله يرحمها برحمته ياااارب
ما تدرين حبيبتي يمكن كان المرض ايتم معاها لين ما تكبر وعلى طول عمرها تتعذب وبتروح عنج هي كبيره وقلبج بيحترق اكثر
ان لله وان اليه راااجعوون
حبيبتي والله
الله يصبرج ع فراقها وارتاحي لأنها طير من طيور الجنه وان شاء الله تتلاقون بالآخره
ويعوضج تن شا الله بالضنا المعافى باذن الواحد الاحد
ربي. يصبر قلبج
و الله عورتي قلبي من اول ما حكتيلنا عنها و أنا ادعي إنه الباري يشفيها بس حكمته ….
الله يرحمها و يصبرج ياعمري بمصيبتج و يرزقج إن شاء الله …