وزن الحامل . والمعاناااااه

السلام عليكم ورحمة الله وبركاته
خواتي الحوامل الله يعييينا جميعا ويسهل علينا هالمرحلة من الحمل…. والجاي أعظم…
الحمد لله على نعمة العيال والصحه والعافية والأطفال المعافين…
موضوع وزن الحامل صار من المواضييع الهاااامه جداااا … ماتشوفين حامل إلا ووزنها زااايد وشكلها متغير 180 درجه "إلا من رحم ربي"… والصحي انه الحامل ماتزيد أكثر من 13 كيلو إذا كان وزنها طبيعي وإذا كانت زايدة الوزن ف 8 كيلو هو الوزن الطبيعي للزيادة…
ياترى كيف نحمي نفسنا من شراهة الحمل ؟؟؟؟ ومن إغراءات الأكل في كل مكان سواء في البيت أو في الزيارات أو في التسوق والمولات.. من المعروف أنه الحامل عندها قابليه للشراهه والجوع في كل وقت .. وعاداتنا الغذائية "تزيد الطين بله" فما الحل؟؟؟
الوحده منا أتقول ألحين أنا حامل ومابفكر في هالموضوع .. وماتشوف نفسها بعد الولاده إلا زايده 20 كيلو يبغيلهم حوالي السنه ونصف لين ينزلون وبمجهود كبيييير…
شو برايكم الحل؟؟؟ اللي عندها تجربه تفيدنا ويزاها الله ألف خير عن الحوامل جميعا…

حبيبتي هالشي طبيعي لكل حامل..واحسن لها التغذيه بالعكس هالشي حلو فالحامل عسب اتغذي عمرها واتغذي اللي فبطنها..وماشاء الله اغلبية الحريم اللي فيهن صحه وحامهن خفيف ومايحسن فيه وياكلن ويمارسن حياتهن الطبيعيه..
انا اتمنى امتن لاني واااايد تعبت فحملي وحامي كان خايس بمعنى الكلمه لين آخر الشهر الخامس وانا ارجع احسب للاكل خمس دقايق ويظهر ووايد ضعفت لدرجة اني يوم كنت اسير المستشفى تعبانه على طول يرقدووني يخاافوون من حالتي لاني كنت حامل بتوأم ودقات القلب عندي وااايد متسارعه وضغطي يرتفع ووايد ضعيفه وزني وانا آخر الشهر الخامس يوصل42واتعب من كثر الترجيع كنت فاليوم الواحد13ولا اكثر ارجع..الحوامل يرجعون ظهورهن لورى ويرتاحون وينسدحوون بس انا ماقدر مووول ارجع ظهري لورى انا كنت انحني لجدام من كثر الثجر والكل كان يستغرب من شكلي ويهي كان داش لداخل ماشي خدوود وعيوني ظاهره والعمود الفقري فظهري وااضح والله الشاهد ايدي اللي يمسكها يقول عوود ام ريلي كانت اتسكر كف ايدها موول على جتفي اتصدقين من كثر ما ايدي مستويه ضعييفه بالمره..ماكنت احب آكل شي موول..
احمدي ربج على هالوزن..بعد ما ربيت طبعا تعرضت لولاده مبكره فالشهر الخامس اسبوع كنت وبدخل السادس وماتو عيالي والحمدالله ع كل حال بس يوم وقفت على الميزان زخوو راسهم اللي عدالي و وزني38..هذا كله بسبة وزني لان جسمي ماكان مساعد اني احمل وخاصتا اني حملت فبجري تووم كرهت حياتي من الوحام وحتى الولاده طلعت عيوني..
الله يسهل عليج حملج وولادتج لاتحاتين وزنج الحينه ففترة الحمل حاتيه بعد ماتربين ادخلي النادي وسوي رياضه واسترجعي رشاقتج^_^..والله يقومج بالسلامه انتي والبيبي..

انا نفس الشي زاد وزني مع الشهور لكن ضعفت بسبب الوحام

لا اختيه لازم تحاسبين على وزنج حتى لو حامل الحامل ما تحتاج الا 200 سعره زياده في اكلها تعرفين كم 200 سعره يعني قطعت توست بس والشهور الاخيره تحتاج 500 سعره زياده على اكلها وسبحان الله كيلوات الحمل ماتروح بسهوله زيدي بس بالمعقول لين 12 كيلو احس اوكي انا زايده لين الحين 10 واحس وايد مع اني طويله ووزني الحين استوا قد طولي وبعد ريلي يقولي متنتي فما بالج باللي يزيدون 20 وفوق هذا الشي مب صحي والجسم ما يتحمل ضعف ومتن ضعف ومتن
حاسبي على اكلج كلي الشي المغذي ابتعدي عن الحلويات والمقالي والغازات لو اشتهيتي شي اكلي عن خاطرج اشوي بس ما تدمنين

حاولي خيتو انج تسوين كنترووول .. و لو شي في خااطرج كلي طشووونه ..
المفروض بما انج حاامل انج تعوضين بالأكل الصحي .. >> طالعي منو يرمس خخخخخخخخ
المهم .. تبين تتفادين الزياااده الكبيره .. اشربي ماي وايد لأنه ما بيخليج تيوعين وايد و لو تبين شي كلي منه عن خاطرج لا تكثرين واايد .. و حاولي تنوعين في الاكل .. كلي من كل شي بس ب مقادير معينه ..
و ما عليج كله بينزل بعد الولاده .. انا وزني زااااايد و زاد اكثر يوم حملت و من ربيت كل اللي زدته راااح و فوقهم كيلوين بعد ^_^ و الحين رديتهم اهيء اهيء

سبحان الله مو كل الحريم سوا تدرين انا واااايد ضعفت عقب ما تزوجت وبعد زواجي بشهر حملت وضعفت اكثر الوحام عذبني واحينه الحمد لله خاز عني الوحام بس امي وخواتي وعمتي دووم يقولولي ليش ما تا كلين مع اني ماشا اللله علي اكل بشراهه ويوم اروح عند الطبيبه تقولي وزنج ما يزيد مثل ما هو … ما عرف ليش انا احينه وزني 52 ما عرف احسه اوكي ….مع العلم انا بالخامس…