أنا عندي ولد عمره سنتين وثلاث شهور وماشاءالله عليه اتكلم ونطق بسرعة بالنسبة للي في عمره…
وكان يتكلم ويقول جمل والكل كان يحسدني عليه ويستغرب…
فجأة من أسبوعين صار يتأتأ في الكلام(يعني يكرر الحرف الأول من الكلمة)
مثلا: لو قال شوفي…بيقولها ألحين:ششششششششوفي وبهاي الطريقة
كل جمله بيكرر فيها أول حرف من كلمة لكلمتين..
وأنا وااااااايد أحاتي وخايفة عليه…
فيه حد مرت عليه حالة بمثل حالة ولدي؟؟
شسوي….في البداية انصدمت!!! وبعدين حاولت أطنشه وما أنبهه!!
وهو أصغر عيالي وعنده أخ وأخت أكبر عنه….
هييييييييه الغالية انا عندي مثل هالحالة
وهي بنتي الكبيرة الله يهديها يااااااااااااااااااارب
نفس ولدج من تبدى تقول شي تتأتأ ف الله يعييييييين
بس دام ولدج كان اوكي والكل يرمس عنه حبيبتي حصنيه ماتدرين شو فقلوب الناس…
تدرين انا بنتي ساعات تكون اوكي بس اتيها فترة تعلق عند الكلام..
الله كريم بس انتي لازم تحصنين ولدج قبل كل شي
حاولي انج اتحصنين ولدج .. وحاولي انج ماتخبرين عن سوالفه عند حد .. العين حق ..
بس تراها اصير عند اليهال .. وحاولي انج اتكونين معااه فالنطق الحرووووف والكلمات .. وانشالله بيتحسن
على فكره عيالي الحين ما شاء الله عليهم ما فيهم شي
أنا صار لبنتي يوم كان عمرها 2 ونص دخلتها حضانه وبسم الله عليها خذت اللغه الأنجليزيه بسرعه
ويتها هالتأتأه بس لما تتكلم معانا بلهجتنا أما بالأنجليزي مع مدرستها وربعها في الصف عادي من دون تأتأه .
وديناها عند دكتور أخصائي نفسئ يفسرلي حالتها .
قالي 5 % من الأطفال يعرفون الفرق بين لغتين وبنتي كانت من هال5% إلي يفرقون والحاله مش مستعصيه أذا عرفنا كيف نعالجها وإلا بتكون عاده عند الطفل أذا أهملت .
والعلاج قالي كالأتي .. محد يتأتأ مع الطفل بغرض المزح لان لكبار ساعات يتكلمون مثل ما يتكلم الطفل وهذا يعزز التأتأه ولا يعالجها .
الأم الوحيده المخوله بالرد على الطفل في حالة السؤال وتحاول أتشجعه أذا طلب أو سأل من دون تأتأه وتعطيه مكافأه بسيطه على المجهود الرائع إلي سواه .
يمنع منعاً باتاً من الأهل أنهم يعايبون على تأتأة الطفل نهائياً.
وسويت إلي قالي عليه بالحرف خلال أسبوع بنتي رجعت عادي ما تقولين هاي كانت أتأتأ .
وبعد أسبوعين سبحان الله أستفزتها بنت جيرانا وصرخت صرخه وحده وييت أكلمها وشوف شو إلي صار بس البنت رجعت أتأتأ أكثر عن قبل هنيه سبحان الله خفت .
بس كان العلاج بسيط نفس الأولي والحمدلله مرت السالفه على خير .. وأنصحج الحرص في تفهم الحاله وعدم أهمالها .
ما اكذب عليش ان هذا الشي وايد مأثر عليه ويخليني اوقات انهار وابكي طبعا ما قدام بنتي .افكر كيف بدخلها حضانه اخاف حد يعيب عليها واخاف اخليها في بيت الاهل حد يحسسها بشي ..صايره بخوفي مخلياها انطوائيه …بس اوقات اطمن نفسي ان وايد اطفال يشتكوا من نفس الحاله وممكن ان شاء الله علاجها وبصراحة ناويه اوديها دكتور نطق فقط للاطمئنان وعشان ما احس اني قصرت معاها .
انا عارفه مثل كل ام تحب ان يكونوا عيالها احسن ما يكون وما يحسوا بالنقص او الاختلاف عن الاخرين .. وان شاء الله يشفيهم ويخليهم لينا يا رب
مرة عمتي (ام ريلي ) قالت لي ان حميتي يوم كانت صغيرة الكل يستغرب من كلامها وفجاة صارت تأتأ
فيابت لها ماي مقرئ وتقول الحمد لله ردت مثل اول والحين ما شاء الله صف سادس
الله يحفظ ولدج