سالفتي غريبه شوي ، انا الله يسلمكم تعبت من نظرة الناس الي تحكم علي بالظاهر !
أنا ما احب اروح اي مكان بدون ما اتعدل و اتمكيج و اترتب ، نفسيتي تتعب لأني أتعودت على هالشي !
هذا مب معناته اني يوم اشوف وحده مب متمكيجه و عباتها ساده احسها مب كاشخه ! بالعكس وايد احترمهم ، و اتنمى ايي اليوم الي اكون فيه جي .. اهم شي الوحده تكون مرتبه و مرتاحه من الشي الي تسويه، والاهم من هذا كله التعامل الراقي و الشخصيه المتواضعه..
انا بطبيعتي احب اتمكيج يوم اطلع و احب العبي الملونه والقصات اليديده … احب الألوان احيانا تغير مزاجي ..بس طبعا مب الوان منعقشه لا …شي يكون لايق..
قبل كنت لازم اتدخن قبل ما اطلع من البيت ، بس الحمد الله الله هداني وودرت هذي العاده الي ما وراها الا الآثام …
و من بعد ما ملجت غيرت في ستايلي وايد، قمت احط الشيله هذا اهم شي ، و احين احاول اعتمد العبي المسكره مع انها تلعوز فالمشي ..بس بديت اتعود عشان خاطر ريلي…
لكن نظرة الناس و حكمهم عليي من مظهري شي وايد يضاايقني مادري ليش !
وحده الله يسامحها مدحتني ..او تتحرى عمرها مدحتني بس هي واااااااااااايد جرحتني .. قالتلي .. " شكلج يعطي وحده لعابه مالت سوالف و شردات ، بس يوم احتكيت وياج حسيت شخصيتج قويه و اثبتتي وجودج فالدوام بسرعه !!"
الله يسامحها والله احسها لمحت لكلمه ثانيه مابا اقولها .. بس الله يعلم اني في حالي و اتكشخ حق عمري مب عشان حد او لنوايا ثانيه !
البنت انا مسامحتنها بس كلامها ضايقني شوي … هذا موقف من وايد مواقف مرت عليي في حياتي لو ذكرت غيرها بتستغربون .. والسبب انه الناس تحكم بالمظهر !!
حبيت اطرح موضوعي للنقاش و خلونا نشوف آرائكم بس بدون تجريح رجاءا ^_^
ردودكم بتنور صفحتي *_^
ربي يوفقج
انتي بروحج يالسه تقولين عن عمرج انج تحبين تتمكيجين وتلبسين عبي ملونه
اكيد الناس بتنظرلج هالنظره !
انا اتكلم عن النظره يعني من اول ماتحكم عليج تحكم عليج انج انسانه مب زينه على قولتها راعية شردات
اما اذا كنتي محتشمه محد بيرمس عنج
بس طبعا مب كل وحده تتمكيج معناتها مب زينه
ونفس الشي على المحتشمه شي منهم بس مظهر
بس انا اتكلم عالنظره ^________^
وموووفقه 
لو كنتي في محيط نسائي هالشيء بيكوون جدا عادي
على العموم عشان خاطر ريلج البسي عبي مسكرة حتى لو قصات واذا الشغل عليها خفيف ما يخالف بتطلعين انيقة
وعلى الميكاب والالوان خليها للمناسبات واليلسات النسائية بس واذا حبيتي تطلعين والا تسيرين اماكن مختلطة كفاية بودرة خفيفة ومسكرة وجلوووس يعني شيء يبينج طبيعيه
وربي يوفقج آمين
بصراحة اي واحد او وحده يشوفوا بنت في السوق لابسة عباه بقصات وحركات والوان
ومكياج بيقولوا عنها حركات
انا لمن اطلع ويا اهلي او ويا اربيعتي نشوف من هالنوعية اقعد اقول استغفر الله شو هاااااااااه !!!
او
الله يهديهن بصراحة نهائيا مب شي البنت لمن تكشخ وتطلع
اولا حرااااااااااااااااااااااااااااام تعرفين شو حرام تخيلي كل واحد يشوفج بهالزينة راح تأخذين
اثامه وغير جية ماراح تكوني مرتاحة الي يغازلج والي ترمي عليج كم كلمة تضايقج
والي تشوفج من فوق لتحت يعني انت خسرانة بكل الاحوال
شوفي انا اكلمج بصراحة من غير مجاملات تبين تكشخين عندج الاعراس او قعدات الحريم
بس تطلعين بهالكشخة في الاسواق او الاماكن العامة والله حرام انا عن نفسي اتضايج واايد
لمن اشوف البنات بهالحركات صدقيني لو احد مدحج بس من داخلة مب محترمج
والسموحة ع هالرمسة مستحيل اي واحد او وحده تحترم بنت حاطه مكياج ولابسة عباة كلها حركات
ياحلات البنت الي تطلع بعباة سادة من غير حركات ومغطيه ويها وتخاف الله في نفسها وفي لبسها
الله يوفقج اختي ولو حبيتي تسوي الشي سوية لربج مب علشان ريلج ^^
الله هو الي بيعطيج الاجر ويوفقج في حياتج سوي الشي وانت مقتنعة فيه وتكسبي فيه رضا الله
والسموحة اذا كلامي ضايقج بس هذه احقيقة ياغالية
/
والله اختي تصير الكثير منا يحكم على الناس من اشكالهم
حتى انا كنت جي بس الحمد الله صار في وعي من كثر ما اقرا مثل هالمواضيع
قمت ما اتسرع بالحكم
واصلا تلقين بعض الناس حتى هم مثل الشخص اللي رمسو عنه
لكن الواحد مايشوف عمره
يمكن هاي عاده فيج ممكن مع الايام تروح
انا من ايام مراهقتي احط مكياج مسسسستحيل اظهر بدون ما اتعدل بس اتغشى
حتى لو الصالون بتحنى او اي شي ثاني سوؤاء بالثياب او غيره
وكنت استغرب يوم اشوف بنات يايين الصالون بجلابيية البيت ومب متعدلين
وبعض الاحيان كنا نستهزء لانه متعودين على نمط معين
بس الحين قمت احسدهن يظهرن ع طبيعتهن وبالعكس حلو
والحمدالله بالتدريج استغنيت عن المكياج والاشياء الاوفر في اماكن مالها لزمه
ماعليج الزواج مابيقصر وياج ههههههههههه باجر بتتكاسليين حتى شعرج مابتسحينه
المهم خليج واثقه من نفسسسسسسسج واكيد اللي تاخذ فكره عنج
مع الايام ويوم بتحتك بج بتعرفج عدل وبتتغير نظرتها
الاهم البنت ماجذبت عليج وكانت صريحه وياج وانتي اثبتي لها انج غيررررررررر
الحمد الله