يومياتي في قراءة سورة البقرة وشو صار معاي

السلام عليكم ورحمة الله وبركــــــــــاته

ربيعتي خبرتني عن موضوع خطبتها وكيف انها حاسة انها غير متوفقة في الزواج ابدا مع انها لا ينقصها شي ابدا والحمدلله.. جمال وحسب واهل طيبين وشهادة ووظيفة وفلوس.. كل شي عندها والحمدلله وماشاء الله…

ولكــــــــــــــــــــــــــــن

محد يبى يتزوجها.. ويوم يتقدمون.. خلاص يختفون ولا يرجعون!!

كسرت خاطري والله.. حسيت اني بصيح عليها لاني من نفس حالتها للاسف..

سبحان الله والحمدلله.. اللهم لا اعتراض.. وانا لا اشكو الهم واعرف ان الزواج قسمة ونصيب وان شاء الله يكون نصيبي زين

المهم.. كانت وايد زعلانة وحزنت وقالت.. انا متأكدة ان فيني شي وحد مسوي لي سحر.. واهلها يبون يودونها عند المطوع.. الخ

سبحان الله اتذكرت اني قريت موضوع كم وحدة من الاخوات ان تيسرت امورها يوم قرت سورة البقرة..فلا اراديا قلت لها ليش ماتقرين سورة البقرة؟؟
واذا تبين .. حتى انا ببدأ معاج

وثاني يوم حصلت وحدة مطرشة لي ايميل بقصة وحدة وتجربتها في قراءة سورة البقرة وجان اسوي لها فور وورد وقالت يبالي ابدأ.. وانا نفس الشي قلت بدال ما اروح عند المطاوعة والله اعلم اذا صدق مطاوعة.. بقرأ السورة لمدة 40 يوم

الحين قررت اني احط يومياتي باللي يصير معاي.. وبشو حسيت بعد ما قريت السورة

صراحة بديت ليلة الخميس.. كنت تعبانة لان شكلي بزكم.. بس بديت والحمدلله..
وقريت سورة البقرة.. ونمت.. حلمت اني اكل قطايف بالقشطة (حتى وانا راقدة ابا اكل..لول).. وحسيت بطعم القشطة,, وقلت في خاطري ياليتها كانت قطايف الجبنة (لاني احب قطايف الجبنة..لول)

ويوم قمت.. الحمدلله.. ما زكمت صح اني كنت بين البين بس ما طحت مريضة (الحمدلله)

ليلة الجمعة..حلمت ان امي فارشة سفرة عند الباب (امي تحب النور او الاضاءة الخارجية.. ماتحب الليتات واللمبات اللي داخل البيت.. ويوم كنا في بيتنا الجديم كانت تفتح باب الميلس على مصراعيه عشان يدخل النور ونتغدى قريب الباب).. المهم..امي فرشت السفرة عند الباب وجمعت اليهال (عيال الفريج) عشان ياكلون معانا.. وييت انا وقلت اهووو شو ها مافي مكان هني.. خلاص انا باكل هناك في الميلس..

ويلست واختي العودة مجابلتني (للعلم اختي الكبيرة حــامل) وخالتي يالسة على يميني (للعلم خالتي عايشة في دولة ثانية) وشفت عمري اكل بيتزا وشي ثاني..بس ما اذكر شو هو!!! (فجعانة بس همي الاكل..لول)

ليلة السبت
رقدت والحمدلله نفسيتي كانت وايد هادية ومرتاحة .. (يالله ما احلى الراحة النفسية)
وحلمت بواحد في دوامي.. شعره كان مموج (مع انه في الطبيعة.. شعره سيدة) وحضني (يعي) وكنت مستانسة (ما صدقت حصلت حضن..لول) وقمت من الرقاد مستغربة بس هادية
ولين الحين يومي حلو ومافي اي مشاكل الحمدلله

اليوم رابع يوم.. برد البيت وبقرأ السورة وباجر ان شاءالله يكتب لكم اذا حلمت بشي او صار شي معين معاي

بنات.. اللي حابة تبدأ معاي ومع ربيعتي وتحط لنا يوميا شو حست واذا حلمت بشي واذا شي صار معاها عشان نتشارك.. حياها اللـــــــــــــــــــه..
ومكنم نستفيد.. ولا تنسوني في الدعاء..

واشكر..كل وحدة من الاخوات اللي دعت لي في الحج عن ظهر الغيب… والله يجزيها الخير ويدخلها الجنة لانها ما نستني..

اتريا تفاعلكم… وجزاكم الله خـــــــــــــــــــيرا

ملاحظة: انا كل يوم بتم اعدل في الموضوع وبضيف شو صار معي يعني كل يوم بتحصلون سطر او سطرين زيادة في الموضوع..

ملاحظـــــــة مهمة ومفيدة: اللي تبى تقرأ القران في الدوام وهي فاضية او فيها الحلوة وماتروم تمسك المصحف وتبى تقرأ من النت
حصلت موقعين وايد حلوين وصراحة الله يجزي كل شخص اشتغل على هالموقعين الجنة ان شاءالله.. لانه صدق متعوب عليهم

1. https://quran.muslim-web.com
ترومين تختارين القاريء.. وترومين تشوفي الصفحات مع التفسير مع خاصية الحفظ.. وااااايد حلو السايت

2. https://tanzil.info/
هذا السايت فيه اكثر من لغة.. العربية والانجليزية زالفارسية والهندية..ألخ وفيه ايضا التفسير واختيار الصفحة..ألخ بعد مفيد وحلو

انا ضفت السايتين للمفضلة عندي عشان ما اضيعهم… يعني الحين ما في عذر للتكاسل

مستجدات اليوم 4 وال5 على الرابط التالي-مشاركة رقم 69

https://forum.uaewomen.net/showthread…388440&page=10

مستجدات اليوم 6 وال7 على الرابط التالي-مشاركة رقم 140
https://forum.uaewomen.net/showthread…388440&page=20

مستجدات اليوم 8-14على الرابط التالي-مشاركة رقم 310
https://forum.uaewomen.net/showthread…388440&page=45

مستجدات اليوم 20-29على الرابط التالي-مشاركة رقم 492

https://forum.uaewomen.net/showthread…388440&page=71

مستجدات اليوم 30-40 على الرابط التالي-مشاركة رقم 493

https://forum.uaewomen.net/showthread…388440&page=71

الله يوفقج و يسعدج و يسعد ربيعتج و يكبر حظكم

الله يسلمج انا اقرا سورة البقره بشكل منتظم كل يوم تقريبا و الحمدلله احس براااااااااااااااااااحه كبيييييييييييييره طول اليوم و لا احاتي شي و باذن الله الواحد الاحد يرزقني الي في بالي و يرزق بنات المسلمين يااااااااااااارب .,.

على فكره انا كنت قبل ما ابدأفي قراية سورة البقره أحلم احلام هب زينه و تروووووع بشكل مستمر و الحمدلله الحمدلله الحمدلله من بديت اقراها انقطعت هالاحلام نهائيا

خلونا ما ننسى بعض من الدعاء بعد قراية سورة البقرة

هلا الغالية

انا ابغي ابدا وياج بس ابا حد يشجعني

ما اعرف كيف اقسم القراءة في اليوم

ياليت تساعديني

الحمدلله اقرأ البقره كل يوم تقريبا ومرتاحه عليها

السلام عليكم ورحمة الله وبركاته ..
اول شي احمد الله على نعمة الاسلام اللي نلاقي فيه حتى للحاجات النفسية,,حل..
اللهم لك الحمد..
استوت لي مواقف حلوة من قريت سورة البقرة حتى الاستغفار..
احس براحة نفسية و اموري الله يسرها الحمدلله..

خذت دورة و الحين تدريب,,لا احاتي بنتي و لا غيره..
احس كل شي يمشي..بيسر..

الحمدلله ..

اشكر مرورج العطر..
والله يوفقج ويرزقج اللي في بالج يارب.. عاجلا غير اجل
طرشي لي اسمج وان شاء الله بدعي لج بعد ما اقرأ اليوم السورة

اشكر مرورج العطر..

الحمدلله صرنا 3 الحين..
حبيتي الليلة بعد ماتصلين العشا.. اقري السورة (جزئين ونص تقريبا)… انا اقسم السورة ل5 اجزاء يعني بعد كل صلاة اقرأ نص جزء وعلى العشا اكون خلصت اخر جزء

انا سبقتج بيومين بس.. يعني بعدني في البداية.. واذا يتج الدورة.. اقري من الكمبيوتر او النت (بس اتأكدي من المصدر اول لاني مرات اشك في النت)
وان شاء الله.. الله يفرج همج ويرفع قدرج ويرزقج الزوج الصالح عاجلا غير اجل..

حطي لنا شو بيستوي معاج