كل بنات تجمع مسافرات الكويت في عطلة عيد الاضحى حياكم بغيتكم شوي

1 – رايكم بالكويت؟

الكويت دولة حلوة و فيها مقومات سياحية بس الصراحة محتاجه للتطوير !

صح حبيبتي ديرتنا يبيلها شوي مع ان الحمدالله كل شي متوفر عندنا بس تقدرين تقولين ماكو تخطيط لكن
اللحين التنميه بالكويت ماسكها الشيخ احمد فهمد الاحمد الصباح ومعروف عنه قيادي بشتى المجالات
وان شاءالله جم سنه ةبتشوفون الكويت احلى واحلىيعني لا تزعلين يا مس حسيت اني فالامارات ايام الثمانينات –> مع اني مواليد تسعين لول

هههههههههه نفسي تراني مواليد 90

بعطيج مثال المباني و العمارات الجدييمه و المتكسره مسويه واجهة غير حضارية على الشوارع الرئيسية و المفروض يهدمونها

عدل كلامج مااعرف ليش محتفظين فيها

و الشوارع و الدوارات محتاجه اهتمام اكثر يعني ما شفت ورود فالشوارع ولا دوارات مميزة مثل الامارات

بالضبط هذا اللي نتكلم فيه انا وامي خصوصا لما نمر عند دوار البدع جان تذكرينا المفروض يزرعونه لان مكان مرور الامير و ابراج الكويت لازم يطورونها و يسوون لها صيانه باستمرار لانها رمز للكويت و مادري كيف مغبره و شكلها جديمه حييل

ابراج الكويت تنقصها الزينه من بره بس من داخل الاجواء فيها رووووعه

و هالاشياء ما تنتقص من جمال الكويت بس كلمة حق و قلتها بكل صراحة و حيادية
فديتج والله مهما يكون بالكويت سلبيات بتظل كويتنا حلوه ومافي شي يخرب عليها

و لاحظت شعب الكويت شعب يعشق المطاعم بشكل مب طبيعي .. و حتى اول يوم العيد نشوفهم بالمطاعم و فالويكند بعد حسب علمي الاغلبية لاازم يروحون مطاعم

لدرجة اني اقول حق ابوي المطاعم اكثر عن الاوادم في الكويت ما شاء الله

ههههههههههههههه صحيييييييييين لدرجه ان اللحين قاموا يسوون مجمعات خاصه للمطاعم على الواجهات البحريه جان لاحظتيهم

2 – تفكرون تعيدون الزياره ؟

حالياً على المدى القريب ما افكر اعيد الزيارة

بس يمكن فالمستقبل تتغير اشياء فالكويت و نرجعلها عشان نشوف اليديد ^.^

ان شاءالله لما بتردين بتلاقين الكويت احلى واحلى

3 – السلبيات والاجابيات بالرحله بشكل عام ؟

اولاً ببدأ في الايجابيات :

– شفنا دولة خليجية شقيقة و اتعرفنا على اهم معالمها و خذنا انطباع عن الحياة فالكويت و الشعب و العادات و غيرنا عن اجواء العيد التقليدية فالبلاد و استانسنا الحمدلله .

فديتج عساها دوم هالوناسه

الشعب الكويتي و خصوصاً البنات شعب طيب و مضياف و متعاون و يقدمون المساعدة بدون ما نطلبها و اتعرفنا على وايد ناس و صارت لنا صداقات و معارف من الكويت .

الشرف لنا حبيبتي وهذا من ذوقج

– عيبتني فكرة المطاعم الكويتية التراثية مثل فريج صويلج و الستينات و غيرهم .. لانها تعطي انطباع حقيقي للسياح عن تاريخ البلد و التراث و الماضي و كانت تجربة مميزة جداً .

اهي حلوه بس تدرين ماعمري رحت حق اي مطعم تراثي- الكويت فيها واجهة بحرية كبييرة ما شاء الله لانها مطله على امتداد الخليج العربي و معظم الواجهات البحرية مستغلينها بطريقة حلوة و مسوين كورنيش و استراحات و العاب وانا وحده من عشاق البحر و هذا اكثر شي حبيته فالكويت .
صح البحررر عندنا روووعه

– عيبتني الفعاليات العائلية المتنوعة في العيد مثل المسرحيات و الاحتفالات في المطاعم الكبيرة و الجمعيات يسوون حفلات لليهال و مهرجين و العاب و نطاطيات و مسابقات و العوايل يتجمعون مع عيالهم .. يعني حسينا باجواء العيد في الكويت .

عدل كلامج الاجواء فالعيد روعه اهني يعني تحسين بالاهتمام

اما السلبيات :

– شباب الكويت مب الكل لكن فئة كبيرة الله يهديهم طايشين و مستهترين جداً و مافيهم روح المسؤولية و يومياً مسوين زحمة على شارع الخليج العربي بالسيارات و الاستعراضات و الاغاني و الحشرره .. و هالحركات تعطي السياح انطباع سيء عن الشعب الكويتي مع ان الخير باقي في أمتي مثل ما قال الرسول صلى الله عليه وسلم لكن الخير يخص و الشر يعم !

بعض شبابنا الله يهديهم مستهتر ولكن اعتقد اللي انتي تقصدينهم المقيمين اللي يتكيوتون ( يسوون روحهم كويتيين)
مممممم لان يوم بالعيد الاستهتار كان اغلبه منهم الله يهديهم بس هذا مومعناته اني ادافع عن الشباب الكويتيين المستهتر لا بالعكس بس مجرد شي ووضحته

– لاحظت الكويت مافيها التزام ولا تطبيق جاد للقوانين .. خصوصاً قوانين السير و المرور وايد مستهترين فيها و الشرطة متساهله من هالناحية .. يعني الدنيا سايبه ذكرتني في الامارات قبل 10 سنوات بس الحين اتغير الوضع عندنا نهائياً

عدل عدل

– المطار محتاج تطوير و اهتمام اكثر و تقديم خدمات اضافية للمسافرين .. مثلاً يوم رجعنا من الكويت كنا بنتعشى قبل موعد الطيارة بس مافي غير كوستا كافيه فقط و كان زحمة و السوق الحرة صغييرة و كل الكاكاوات والاكل اللي فيها بالجملة يعني اكياس كبيرة ما يبيعون بالحبة !

حبيبتي بالمطار واااااايد مطاعم غريبه ماشفتيهم!!
في بيتزا اكسبرس – اكثر من ستاربكس – كنتاكي – برجر كنج – كوستا – باسكن الروبنز – فنيليز – وفي ماكدونلدز صوب البوابات امممممم وغيرهم بعد
بالنسبه حق سوق الحره اهما مصغرينه لان فيه محلات تجاريه بالمطار مثل دبنهامز وغير وغير مادري لو لاحظتيه؟
بس ترا مطارنا تحت التوسعه لوتلاحظين ان اكو مكان مسكرينه يشتغلون فيه

4 – الاماكن اللي رحتوا لها؟

رحنا مارينا مول و مارينا كريسنت و سوق شرق و مول 360 و الأفنيوز و مجمعات شارع سالم المبارك و مجمع المهلب في حولي و مطعم فريج صويلح و مطعم ميس الغانم و سوق المباركية و سوق الصفاة (البلوكات) .

حلو حلو

اما الاماكن اللي كانت في البرنامج و ما رحناها بسبب ضيق الوقت ؛ المركز العلمي و المدينة الترفيهية و ابراج الكويت (بس شفناها من برع) و مجمع الكوت والمنشر و اسواق الفروانية (مثل العربيد و الحمرا و الخيمة مول) و مجمعات حولي القدييمة والصغيرة (مثل النقرة الشمالي والجنوبي و مجمع بيروت و مجمع العثمان) و مجمع الاوقاف للجلابيات في مدينة الكويت .

عيل طافتج هالاماكن5- مكان السكن؟

منتجع موفنبيك البدع 5 نجوم قريب من السالمية على شاطي البدع و كانت تجربة حلوة ..

حجزنا شقة بغرفتين نوم و حمامين الله يعزكم و صالة و مطبخ مفتوح على الصالة بسعر 1600 درهم اللية تقريباً و السعر شامل بوفيه افطار يومياً حق كل العايلة .

و تقييمي للمنتجع 8 / 10 .. حلو و نظيف و المسابح متنوعة و الخدمة ممتازة جداً (كل ما نطلب شي دقايق يكون عندنا و بدون جارج اضافي) و الاسعار مناسبة و بوفيه الريوق لا باس فيه بس العيب الوحيد البحر كان مسكر و متلوث يعني ما تقدرين توصلين للشاطي بس تيلسين من بعيد .. و برع المنتجع وايد مطاعم و كافيهات تقدرين تسيرين لها مشي شرات تشليز و فرايديز و سراي و كوستا و ستار بوكس و شوكليت بار و حلوة اليلسات فيها المسا .

حلو والله
بس غريبه شاطئكم مسكر!!
شاطئنا احنا مفتوح

6 – اي اضافه حابين تضيفونها ؟

ما شااء الله وايد اتكلمت و قرقرت و ما خليت ولا شي لوول
بالعكس استانست بمداخلتج

بس باختصار كانت تجربة حلوة و استانسنا الحمدلله و احلى شي اني اتعرفت عليج يا مس الكويت و كسبتج اخت عزيزة و غالية و يزاج الله خير ما قصرتي ويانا في التجمع و ان شاء الله نتلاقى في دبي المره اليايه ^.^

فديتج والله حبيبتي الشرف لي انا

7 – ناطره تقاريركم المصوره اذا سمحتوا

افا عليج ما طلبتي .. احلى تقرير لعيوونج بس عطيني كم يوم لين ما اخلص الصور و اصغرها ^_*