اناا حبيت اعرض عليكم مشكلتي
بنات اناااا حبيت اقولكم قصتي واتمنى وكلي رجاا انكم اتردون علي بليز
اناا من اسبوع سويت عمليه كبس المعده اللي بعض يسمونها تدبيس المعده
ومن اول مانشيت من العمليه حسيت كاني اموت في اليوم الف مره وندمت قد شعر راسي
وحالتي انتكست اكثر من مره وحرارتي ارتفعت وصحت ندم
اناا متزوجه من 3 سنوات وعندي بيبي توه كمل السنه
وتميت اصيح شو سويت في عمري
كنت يالسه ومرتاحه مع ولدي وزوجي
الحين حتى مااروم اتحرك
يابنات
سووولي بالمنظار اللي هو خمس فتحات في البطن لتصغير المعده
وغير فتحه عوده في الخاصره فيها بيب اللي يظهر منها الدم اللي داخل الجسم
وهاي الفتحه راوتني الموت
وغير اني كنت ارجع اول ايام ارجع دم وروحي تطلع
والله تعبانه يابنات والله اصيح ليل ونهار
بعد اسبوع ظهرت من المستشفى
وكاني شفت الشمس من يديد
بس الالام الي تعبتني
والحينه هذا تاسع يوم من العمليه
ياخواتي حبيت اسالكم
هل اللي اناا فيه طبيعي ويمر على اي انسان يسوي هالعمليه
واذا في وحده امسويه هالعمليه بليز اتفيدني
هل بتم ندمانه طول حياتي اني سويتها والا مرحله وبتعدي
وهاي حاله وعابره
ارجوكم خبروني
اناا الحينه يالسه ويائسه في البيت ابغي احد يجاوبني ويريحني
بتمر على حالتي عشرة ايام وانااا الندم شيب راسي
حتى الماي مااقدر اشربه مثل الناس
ابغي اشل ولدي ومب قادره
الالام اللي في بطني ذابحتني
ارجوووكم راجتنكم رجوه
ابغي احد يرمسني ويرد علي
ابغي اعرف شو حالتي هاي بتم جذه والا مرحله وبتعدي
وجزاكم الله خير
والله لا يراويكم اللي شفته
الله يخفف عليج حبيبتي
تقصدين ربط المعدة صح،،، عشان ينزل وزنج
شوفي ما بقص عليج ،، زمااااااان فكرت أسويها بس قريت وااايد عن العملية و بعدين هونت،، قلت بالذات أنا أبا أنزل 25 كيلو بس،،، و بديت عالريجيم مع دكتورة،، و الحمدلله بفضل الله سبحانه خسرتهم خلال 6 أو 7 شهور،، و الحمدلله مرتاحة إني أنا ما سويتها
بس من يومين بعد قريت وحدة مسوية العملية و نازلة تقريبا 12 كيلو و الحمدلله هي مرتاحة،، و اعرف ناس مسوين شي منهم مرتاحين و منهم لا يعتمد على مدى تقبلج للعملية
سوي بحث في القوقل عن البنات في سيدات الإمارات اللي مسوين العملية و اقري قصصهم و استفسري منهم عشان تفيدون بعضكم أكثر
و حاولي تراجعين دكتورة ثانية قصدي بعيادة ثانية عشان تخبرج العملية كانت زينة و للا لا،،، لأنج لو سرتي عند نفس الدكتور أو العيادة أكيد بيمدحون شغلهم
الحمدلله عالسلامة على عموم،،، حطي بالج على أكلج وااايد،، لأنج إذا نسيتي عمرج و كلتي واااايد سبحان ممكن تضطرين تفتحين العملية بنفس اليوم و بتروح فلوسح كلها و تعبج كله عالفاضي
الله يعينج ويسهل عليج
اذا اللي تقصدينه ربط معدة
أنا أعرف 2 سوو العملية والحمد لله حياتهم الحين طبيعية
لا و واحد منهم رد ياكل و وزنه قاعد يزيد مره ثانية <<< يا خسارة تعبه 