السلام عليكم شحالكم بنات وحريم
اليوم موضوعي عن الماركات او بالاخص باريس غاليري ويمكن اكثر عن وحده رمسو بنفس الموضوع او مقارب (على فكرة نزلت الموضوع في المكان المناسب ولا لا ماعرف) ههه
نرجع لموضوعنا
الله يسلمكم انا من اسبوع تقريبا كنت شاريه هديه حق ريلي قلم من اسكادا وساعة اقنر من باريس وكلهم طلع سعرهم بعد الخصم 2450درهم
وانا اعرف انه ريلي مايليس سوع ولا يشل قلم كذا مرة اهديت له ساعه ومالبسها وقلم بس يحتفظ فيهم فالبيت
بس هالمرة اوني خذت له ماركة وتناسب للدوام
المهم سويتله حفلة صغنونه فالبيت واهديته وهو عرف انه من باريس حسيته اتضايج قال ليش تشترين وانا م البس ومكلفه على عمرج المهم باختصار توصلنا انه القلم مايحتاجه واني لو ارده واخذ اي شي حقي او عطر المهم انا خذت القلم وبدلته لانه كان شي حفلة حق اختي قلت بروح بشتريلها ساعة وخذيت لها من ميشيل كورس تمت اللي هناك تمدح وتقول توه واصل وخذته عاد انا
على فكرة اللي كتبته فوق كل هذا كان من باريس اللي عند روتانا مب اللي فالمولات
وعقب كم يوم قبل لا اكمل اسبوع رحت ابدل ساعت ريلي بساعة ارخص ولون ثاني وبياخذ له عطر اول شي وبالباقي بياخذ ساعه
رحنا ان وريلي باريس اللي في بوادي لاني قلت بسال عن عطر من جوسي كوتير وراويته الصورة وماكان موجود لانه مخلص
عقب ريلي اشترا له عطر بلاك كشمير وانا عطر لاكوست وبالباجي خذنا له ساعة من بوليس وردينا البيت وريلي تم لبسنها تقريبا 4ايام وعقب اكتشف شي
هننننننننننننني الصدمة والاصل اللي في الموضوع (ادري طولت عليكم بس بغيت تعرفون التفاصيل وتنصحوني )
اكتشف انه الساعه ميد ان شاينه ( صناعة صينيه )
والمعروف السوع تكون من بريطانيا ايطاليا الولايات المتحده على ما اظن اذا ماخاب ظني مب تكون كوبي في نفس هالمحلات
استغربت قلت كيف اونه مكان راقي يبيع بهالمستوى وبهالسعر لا ويقص عى الناس
الحين اباكم تنصحوني شو اسوي اروح لهم وشو اقولهم عندي الفاتورة بعد ريلي قالي تستاهلين عسب ماتروحين بروحج مرة ثانية وتشترين من اماكن مانروح لها اصلا قال برايه خلاص لبستها
قلت له برايه شو يعني الناس تشتري ساعه تيودها اكيد بتلبسها وماكملنا اسبوع قلت بعد بروح اشوف الموضوع عند اختي بعد الهدية الساعه اللي خذيتها من باريس اللي عند روتانا من وين بلد الصنع
على فكرة نسيت اخبركم يوم يت ارد الساعه في باريس اللي في بوادي في واحد منهم عيونه ملونه ويلبس قفاز اسود بايد وحده جنه مال حراميه ههههه اللي فالافلام قالي ليش ماتروحين تبدلين من نفس الفرع ومن هالكلام يباني ارد من الفرع اللي خذت منه بس مارديته وقلت مابرده دامني وصلت عندكم واللي فالفرع الي رحت له قبل قالي عادي تبدلينه اي وقت واي فرع المهم شكله حسيته مايباني ابدل عندهم بس غصبن عنه بدلت عندهم
الحين اذا انكر او قال اصلية شو اسوي وهي مكتوب صناعة صينيه يعني كوبي مب اصليه واضح
قلت بخوفه بقوله بدق حق الشرطه ههههه مادري اذا يستاهل او لا بس اذا عصبت منهم يمكن اسويها فالحظة غضب
واسمحولي طولت عليكم وايد
اباكم لو كنتو مكاني شو بتسون
مشكورين مقدما
ان الماركه مركزها الام ف ايطاليا ولا فرنسا وسويسرا وغيرهم
بس التصنيع والتجميع فالصين لرخص الايدي العامله هناك
ف يكتبون ميد ان جاينا
بس هو اصلي ١٠٠٪
عاد انتي ردي واستفسري منهم و هل في ساعات تجميع فغير بلد ولالا
روحي بوتيك الماركه اللي خذيتي الساعه منها وخل يخبرونج اذا الساعه اصليه او لا
والخيار الثاني انج تطرشين ايميل حق موقع الماركه نفسها وتعطينه السيريل نمبر للساعه وبيخبرج اذا اصليه او لا وعقب تاخذين الايميل وتودينه باريس غاليري اذا الساعه مب اصليه عسب يردولج بيزاتج لانه في حالة ماردوها سيري قدمي بلاغ اعتقد غش تجاري او شي جيه وطالبيهم بتعويض بعد عسب ما يقصون على خلق الله
أختي عادي الحين كل شي ميد إين تشارينا !!!!! .. معظم الماركات الإدارة بس بالبلد الأصلي.
معظم الالكترونيات والأدوات والثياب وكل شي 
.
راسلي الشركة الام واعطيهم الرقم وتأكدي. فكرة رائعة من fffooo
بالتوفيق
والسلام عليكم ورحمة الله