خواتي اللي سارت العمره تدخل تفيدنا

شحالكم خواتي انا ان شاء الله بروح العمره وهاي اول سيره لي وانا وايد مستانسه وان شاء الله ربنا يوفقني ويسر اموري ف بيغتكم تقوولي وتخبروني كل وحده منكم سارت هناك شو كان شعورها وشو سوت اول مره تسير فيها وكيف قضت وقتها هناك لاني انا حابه اقضي كل وقتي ف العبادات لانه الا هيه 10 ايام ابا اقضيها بكل خير وتقرب اللى الله ادعولي وفيدوني بمعرفتكم ويزاكم الله الف خير

تروحين وتردين بالسلامه ^^

انا رحت كذا مره .. بس اخر مره كنت صدق جاااده وملتزمه ف العبادات اكثر

يوم بتروحين شلي معاج كتاب دليل الحج والعمره وااايد حلو .. وحصن المسلم وطبعا قران كريم

ف الطريج سواء بالبر ولا ف الطايره حاولي تقرين هالكتب وتستغفرين ..

ويوم بتوصلين هناك حاولي دايما تصلين الفروض ف الحرم .. حتى الفير حاولي تروحين انتي وقروب حريم

واقري قران ف الحرم وادعي .. يوم اطوفين وتسعين ف الكتاب بتحصلين الادعيه كلهااا ..

وبث ^^

سبحان الله وبحمده

ياااااااااااارب اني اروح في خاطري

هلا اختي
تسيرين وتردين بالسلامه
انا يوم سرت كانت احلى سفره واحلى مكان اسيره ..تحسين بالراحه وبروعه المكان
كنت احاول ما افوت ولا فرض حتى الفجر..
وفي المدينه كنت اسير الروضه واصلي هناك …
وفي مكه اصلي تحت مرزاب الرحمه يوميا ..وصدقيني بتحسين العشرة ايام بتمر بسررررررررعه..
وخذي معاج كتيبات ادعيه ..بس لما تطوفين حول الكعبه حاولين تدعين من قلبج مب من الكتيبات..وتدعين الي في خاطرج
وتكثرين من قراءه القران..

الله يوفقج وتحملي من عمرج

انا سرت كذا مرة –ولله الحمد-

اول سفرة كانت غير وشعور غير لايوصف بصراحة

فرح ع خوف ع رهبة

(الله يرزقني واهلي ونسير )

من دخلنا الميقات وتغسلنا وصلينا ونوينا العمرة

يوم دخلنا مكة وشفت منارات الحرم دمعت عيني

وفي دعاء تقرينه لما تدشين مكة
ودعاء لما تشوفين الحرم

وحسيت بنوع من الخوف والرهبة

وزاد هالشعور لما شفت الكعبة

وصحت من الخااااااااااااااااااااااااااااااااااااااااطر –ما هموني الناس الكل بيطالع برايه —

طفت وصليت خلف المقام وشربت ماي زمزم وعقب سعينا

وكان وقت صلاة العصر صلينا ف يالحرم

وعقبها صلاة الجنازة

والحمدلله اغلب الفروض في الحرم

وانتبهي المسجد الحرام ما فيه تحية المسجد ركعتين شرات باقي المساجد

الطواف بالبيت هو تحية المسجد في الحرم المكي

اما المدني فتصلين ركعتين عادي

واذا حاسج عمرج تعبانة من شي

شربي ماي زمزم الين ما تحسين ان ضلوعج انترست من الماي –الاضتلاع — وادعي ان ربي يعافيج من اللي فيج

حتى لو اي شي

لو طلب علم او هداية او شفاء

كنا نسير قبل الفير بشوي ونيلس نقرا قران

ونصلي سنة الفير+صلاة الفجر

اذا تقدرين تقعدين الين ما تطلع لاشمس وانتي في مكانج تذكرين الله تنكتب لج اجر عمرة

وكنا نسير نصلي الظهر ونرد نتغدى في السكن

وعقب نسير لصلاة العصر

ونطلع نسير السوق اذا بناخذ شي

بس حاولي ما تكثرين من سيرة الاسواق

ونسير لصلاة المغرب ونقعد في الحرم الين صلاة العشا ء ونيلس الين تخف الزحمة وعقب نظهر ونسير السكن

او السوق في دربنا

بس نصيحة من اخت متحسفة ع الايام اللي ضاعت :

ارقدي من وقت ونشي قبل الفجر بساعتين او ساعة ونص

ودشي الحرم وصلي قيام الليل –لها اجر عظيم –رب العالمين يضحك لقائم الليل فرحا بما يصنع

* الدعاء يكون مستجاب في هالوقت لانه يكون وقت الثلث الاخير من الليل

* اقري قران –(ان قرءان الفجر كان مشهودا )

* كثري استغفار ( والمستغفرين بالاسحار)

يعني قسمي الليل عندج الي 4 ارباع

كل ربع ساعة لشي

بس خذي حد معاج لاتسيرين روحج اخر الليل حتى هناك الناس مات عندهم الضمير والخوف من الله

اول ربع ساعة صلاة القيام

ثاني ربع ساعة دعاء

ثالث ربع ساعة قراءة القران بتدبر وخشوع

رابع ربع ساعة استغفار الين ياذن الفجر

وفي طوافج وسجودج ادعي باللي خاطرج فيه

ولا تنسيني واهلي وذريتي من دعوة بظهر الغيب ان الله يفرج علينا وتتيسرامور اهلي واسير معاهم العمرة

واشتغل (اختج ام عبدالله )

انا لي امنية اني لوسرت العمرة هالمرة اقسم الليل شرات ما قلت لج

وان شاء الله تتيسر امور اهلي ونسير مع بعض

بتلقين كتبات في المكتبات الاسلامية

او عند الميقات عند اللي يبيعون برع

والنعال –عزج الله — حاولي تحطينه قريب عليج لما تسيرين للصلاة عن السرقات –صح انه مايسوى بس الارضية حارة كيف بتردين السكن

واذا بدشين الحرم للطواف والعمرة يمعوا كل النعول وحطوهن في مكان تعرفونه عشان لا تضيع عليكم

وبعد :

مثل ما قلت الناس ما قامت تخاف من الله -بتلقين شباب عفانا الله يتحرشون –بلغي عليهم الشيوخ اللي لابسين بشت او الشرطة

وعندج بعد الطيور اللي في ساحة الحرم خذي لهم حب بريال وانثريه لهم

ممكن تاخذين كرسي متحرك من الصيدلية وتطلبين منهم يوصلونها للحرم وتكون وقف

وسعره تقريبا 350 درهم وياينا رمضان والحج والناس بتستخدم هالكرسي وشوفي الاجر

ممكن تتشاركون في سعره

وبعد :

في السوق لا اطلعين بيزات لاي فقير الا بالدسة لان الافارقة اذا عرفوا عندج بيزات ما بيرحمونج

بيحاوطونج من كل صوب

في وااااااااااااااااااايد فقارى لو ع كل فرض تاخذين كم ريال وتعطينهم

والله يسر عمرتج

وعمرة مقبولة مقدما ان شاء الله

مشكوره حبيبتي ويزاج الله الف خير حمستيني وايد وانا بعد الحمدالله التزمت اكثر وان شاء الله رب العالمين يثبتنا على الدين والايمان يارب انا حاطه ف بالي ان شاء الله اصلي كل الفروض ف الحرم وباخذ قراني وادعيتي وياي

للرفع والاستفادة