هذي كل تجهمزاتي لحفلة الـfmaily day 200،،،،

السلام عليكم،،،،
طبعا الحفلة اساساً كانت ومخططة لابني لانه كمل سنتين،،،، ولكن بعد تفكير وبعد ما قرات الفتوى عن عيد الميلاد،،، قررت أني أغير الحفلة كاملة وتكون family day 2024، وطبعا ما كانت بنفس يوم ميلاد ولدي،،، وكانت النية بأني ألعب الأطفال وأفرحهم على شرف ولدي طبعاً ،،،،

في البداية جمعت كل أسماء الأولاد والبنات الي بيحضرون ،،، وحصرت اسماء الكبار وعددهم ،،،
وحطيت رقم تقريبي للعدد علشان البوفيه والهدايا ،،،،،

الهدايا
قبل اسبوعين تقريبا جمعت مجموعة كبيرة من الهدايا من اخواتي اللي في المنتدى،، يعني بالدرزن والدرزنين،، على حسب الكمية الموجودة والمتوفرة عندهم
كراسي،فوط سحرية، بيض حيوان، بيض نبات، جهاز صابون سحري، العيدان الفوسفورية ، دفاتر باربي للبنات مع تلوين، لمبات مع إضاءة،
من تويز آر آس خذت 3 شنط مكياج للبنات ،،، 5 مكينة خياطة ،،، وخذت لعب تركيب 2، وألعب فكر وأربح 4 للأولاد ،،، مسجل بارني،،، وبعض الخراويش للأطفال

للمسابقات
خذت من تويز ار اس لعب التركيب 2، وحبلين لشد الحبل، و2 كيس خضار وفواكه، كرات ملونه وسلات وخذت بعد لعبة اللي فيها كروت وكل متسابق يطلع كرتين نفس الشكل،،،
وخذت دراهم حلاوة على الفريق البنات والأولاد اللي يحصل على مجموع أكبر،،، هذا اللي يذكر ويحضرني حالياً،،،، وكتبت جميع اسماء افراد العائلة علشان اللي يعرف يكون شجرة عائلة

الزينة
خذتها من تويز أر أس وكانت كلها بلون الأحمر مع الورنج والأصفر البطاقات والزينة اللي تتعلق على الحائط ،،، والزينة اللي تتزين بين الأعمدة أو في الحيط ،،، وثنتين مكتوب عليها party is here، وخذت الفراش اللي ينفرش على الطاولات (4)، وخذت الاكواب والصحون والكلينكس والسبون،،،،
طبعا حاولت بقدر الإمكان أن ما يكون مكتوب على أي شي من اللي خذته happy birthday
وخذت بعد أكياس للحلاوة وحطيت في صندوقين للكبار وللصغار

بوكس صغير
هذي البوكسات صارحة وايد وايد حلوة وتسلم يد الأخت UAE Dreamsكانت مسوية لي علب صغيرة بعد علشان حط فيها كم حبة حلاوة،،، وطلبت منها انها تحط لي صورة ولدي وينكتب عليها family day 2024 برعاية (ولدي)

وطلبت منها بعد بطاقات مكتوب عليها (نشكركم على حضوركم family day 2024
من (اسم ولدي)،،، إلى (اسم صاحب الهدية)

طبعاً ان أفضل ان الهدايا ما تتوزع عشوائي علشان كل حد ياخذ الهدية اللي تناسبه بالنسبة للسن وللجنس إذا بنت أو ولد ،،، وبنفس الوقت تضمنين في زحمة الحفلة إن الكل خذ واستلم هديته،،،

طبعا خلال الأسبوع اتصلت في كذا مكان برجر كينج، فندق روتانا العين، مطعم الديوان العين وحفلتي لتنظيم الحفلات ،،،
وحطيت لسته بارقامهم واللي ابغيه والعدد واليوم والساعة ،
استقريت يوم الخميس على مطعم الديوان وسويت بوفيه، ورحت مكان حفلتي وطلبت من عندهم (100) بالونة بالغاز باللون الأبيض والأحمر والذهبي على ألوان الزينة اللي اشتريتها،،، وأنا مارة كارفور شفت اللي يبعون البالونات كلمت الرجال وطلبت منه ايجار لبس الشخصية الكرتونية مال تلي تابس وخذت اللون الأحمر، وطرشت السواق يوم الجمعة الظهر وياب لي اللبس،،، علشان واحد من الإهل يلبس أحسن علشان الأطفال ما يخافون،،،

يوم الجمعة الصبح، طرشت ولدي عند الأهل علشان ما يلخبط ،،، طبعا لضيق الوقت خليت كل الشغالات اللي عندي يجلدن الهدايا،،، ويقسمنها علشان ما نتلخبط ،
وجمعتها وكنت كاتبه كل الأسماء في بطاقة ولزقتها على كل هدية ،،،
وطبعا ما نسيت الكبار جمعت الأشياء والأغراض الي عندي وخليت الشغالة تجلده،،، كهدايا للكبار،،،

طرشت الدريول يا خذ لي 3 طاولات ،، و12 كرسي للكبار،،،
العصر قعدت انا وزوجي وزينا المكان طبعا كان في البيت وقسمت المكان للبوفيه وطاولات الأكل من جهة اليمين ،،، ومن اليسار كان الكراج وفيه اعمدة، وساعدني وايد في التزيين في أربع جهات و ،، غطيت باب الكراج بطاولتين بفراش اللي اشتريته من تويز ار اس وحطيت عليه كل الهدايا،،، والطاولة الثالثة كانت لكل ما احتاجه للمسابقات،،، والبالونات ووزعتها على سقف الكراج وكان كل المكان بهالطريقة مزين،،، وفرشت سجاد للأطفال تحت ،،،، وجانب المقابل لحيط الكراج صفيته كراسي للكبار علشان يشجعون الصغار،،،،
وعلى فكرة كنت مخططته أنه برجر كينج أو محل حفلتي يزين،،، بعدين شفت شي بسيط والزينة مشتريتنه بنفسي ،،،وكانت روعة وانا ما تخيلتها،،،

وحطيت طاولة كبيرة بين الكراج ومكان البوفيه للكيكة (وكنت طالبة شمعة الورة من المنتدى)، وحطيت الصحون والأكواب والسكين، والكلينكس،،،

المهم في بداية الحفلة خليت ولدي يوزع على الاولاد واخترت وحده من البنات توزع العيدان على البنات،،، وفي التوزيع كنت اختار كل شوي حد:
في بعض المسابقات ما قدرت العبهم ما شاء الله عليهم طبعا ما قدرت اسيطر عليهم، وكل ينتظرون الهدايا، ،،،

لعبتهم مسابقة شد الحبل،،،
والمسابقة الثانية طلبت من الشغالة تقطع موز على شكل دوائر ووزعتها لكل البنات والأولاد وحطت لهم 4 حبات،، والكل حاط ايده وراءه وخليتهم ياكلون،،،
ومسابقة فريق بين الاولاد والبنات ،،،وقفتهم طابورين وامامهم سلة الفواكة والخضار صناعية وخليت كل واحد واقف اول الطابور يمسك سلة فاضية ويركض وياخذ نوع من الفواكه ويحطه في السلة وبعدين يرجع ويعطيه للي واقف وراءه وبهذي الطريقة لين ما تخلص سلة الفواكه ونشوف منو اللي جمع أكبر عدد من الفواكه،،،،
ومسابقة وزعتها على كل بنت وولد ياخذ سبيكة معدنية عبارة عن حلاوه من داخلها،، وطبعا الأطفال ما يعرفون وموب مركزين على العدد المكتوب في السبيكة بعضها 50 و2 و1 ،، كان على بالهم حلاوه وبس،،،
وبعدين جمعت السبائك اللي عند فريق الأولاد وقعدنها نعدها عقبها اكتشفوا شو اللي خذوه،،، وجمعت سبائك البنات وجمعوا الأرقام ،،، والرقم الاكبر طبعا هو الفائز ،،
ومسابقة،،، التركيب طبعا اللي يخلص قبل،،، ومسابقات كثيرة بس بصراحة عدم هدوءهم يضيع الوقت،،،

وفي أثناء الحفلة وبين المسابقات طلبت من واحد من الأهل انه يلبس اللبس لشخصية الكرتونية ويا من خلف الأطفال وتفاجئوا وقعدو يركضون ،،، وبعدها خليته يوقف ويصور مع كل واحد يعني اللي يبغي،،،

وبعدها تجمعنا وقصينا الكيكة طلبت منهم أنهم يتفضلون على العشاء ،،، طبعا الكبار كانوا مخلصين أثناء تصوير الأطفال مع الشخصية الكرتونية،،،
وبعدين جمعت البالونات واخترت بنت وولد لتوزيعها،، وبعدها وزعت الهدايا عليهم وكل طفل خذ لها ما يقارب 3 إلى 4 هدايا بالإضافة إلى كيس الحلاوة،،،
وبعدها وزعت عليهم السلة اللي فيها بوكسات صغير للحلاوة،،،

وكان الله غفور رحيم،،،، أدري اني طولت بس حبيت اخبركم شو سويت بالتفصيل ،،، وآسفة على الإطالة ،،،

ومن المواقف الطريفة نسيت اخبركم،،،
طبعا هدايا الكبار حطيتها في كيسة ، وأثنا تجليد الشغالةعطيتها جلاد خاص للكبار يعني موب لتويز ار اس،،، الغبية راحت ما خذه الهديه للكبار مع الجلاد وغلفتها بجلاد تويز ار اس ،، فلما قعدت الزق البطاقات على الأكياس اكتشفت انها محطية جلاد الكبار ومغلفتنه ،ههههههههه ،،،،

ما اريد اطول عليكم ومشكورين،،،،،

صراحه الله يعطيج العافيه علي الشغل هذا أهم شي أستانستوا وسويتي جو لليهاااال بس تعالي خبرينا كم كانت ميزانيه الحفله هذي وياريتج حطيتي صورها عسب نعيش الجو ولاتنسين خواتج في المنتدي عزمينا السنه اليايه ويهي لووووووووووووووح صح.

اول شي كل عام وولدج بخير وصحه وسلامه وعقبال 100 سنه

ثانيا
ماشاء الله عليج ،، افكار عجيبه وحلو الواحد يرتب بروحه وبنسق على ذوقه

يعطيج العافية ،،، ونتريا الصور اذا عندج

استانسوا وايد وايد ،،، ولا وقلت إلهم كلكم تفتحون الهدايا في البيت واللي يفتحها في بيتي ما بيحصل باجر على هديه (على بالي بقص عليهم ،،، طبعا الكل فتح هديتها في بيتي وطلع وكل واحد يشوف الثاني ويقول انا ابغي بعد ) ،،،،، الحمدلله كنت مسويه حسابي لكل شي،،،

بالنسبة للميزانيه بحسبها معاج،،،
البوفيه (2700) درهم مع 3 طاولات كبار وكل طاولة 10 كراسي،، وطبعا الأكل كان لـ40 شخص،
تويز أر أس (2500) تقريبا،،، البالونات (البالونه الوحده على 6 دراهم = 600) درهم، البوكسات والبطاقات (250) درهم، الحلويات ما يقارب (500) كان مع شويت أغراض من الجمعية،
اللبس للشخصية الكرتونية قال لي أي شي تعطيني إياه (عطيته 100درهم) ، ولما رجع الدريول اللبس كان يبغي زيادة )،،، الهدايا اللي من عند الأخوات اللي في المنتدى الجورية (1250)، وميرة الأمورة ( 1250+90) 1340 درهم تقريبا،،،
طبعا غير هدايا الكبار ما حسبتها لانها عطور كانت عندي ومجموعة من بودي شوب، ولوحده عطيتها صندل ماركة،،،
المهم هذا اللي اذكره يعني ما يقارب 7390 درهم ،، هدايا الكبار كانت بـ(1610) درهم، وطبعا ما انسى بعد بدلة ولدي كانت عبارة عن dg بـ 1000 درهم والصندل موسكينو بـ550 درهم،،،
شي غير،،، بعد هههههههههههه

فعلا والله الواحد يرتب بنفسه احلى بوايد ،،، ولأن معظم اللي ينظمون الحفلات ما ينسقون مثل ما تبين وأسعار خيالية على الفاضي،،، ومشكوره حبيتي على مرورج ،،، ومساعدتج ،،،
بالنسبة للصور موب كثيرة ،،، بس بحاول إن شاء الله

مـــــاشـــــــــــــاء الله عليج .. والله افكــــار رهيييييييييييييييبه ومتنوعه .. وفعلا ما اعتقد اي محل حفلات بيرتب بهالتنوع والترتيب وهالكثر بهالسعر

كل عام والحبوب الصغير بألف خير وعقبال العمر كله يارب ^__^

أبا أشووووووووووووف

ليش ما عزمتيني .. بييب فلوحي …!!

كشخة ماشاء الله عليج شكلج بدعتي .. بس حرام ما صورتي