ما سر قناعة بعض النساء بأنهن جواري؟

وكيف انه ضربها .. أو خانها ماخلى وحده ما زنا بها أو يوم فاضي يشرب خمر أويمكن لو يتله الحاله يتعاطى مخدرات .. أو يهددها كل شوي بالضرب و الطلاق أو يمن عليها ويعدد لها افضاله عليها أو أو أو أو .. الخ من سوالف الرياييل (الي ما يخافون الله) ويظهرون رجولتهم علىحريمهم .

نلقى ردود من بنات متزوجات و غير متزوجات يسون انفسهم المصلحين و يقولون لها اصبري ترى الريال ما يعيبه شي .. وياما حريم صبروا على رياييلهم .. من غير ما يشوفون الحالة كحالة مستقلة ,, وكأن الطلاق موت لا رجعة بعده إلى الحياة ! والاغرب ان في ناس يسمون هالردود عين العقل

ناسين ان نحن ادميات لنا كرامتنا و لنا وجودنا و ان الريال (اللي ما يخاف الله) ما بيصبر على زوجته في اقل الاشيا وما تقدر الحرمة تضمن معاه بتعيش لباجر والا بتنش وما بتشوف عيالها!

رسالتي لكل وحدة تظن انها اقل من الرجل: ان كنت متقبلة لهذا الحال فلك ذلك ولكن لا تقنعي الاخريات بأن يصبحن جواري ..

ادري البنات بيقولون انتي تتوقعين ان نقول على كل مشكله تطلقي! ولكن اعتقد انكم فاهميني ,, مب قصدي الا الحالات اللي فعلا تكسر الخاطر و مرت على في المنتدى واشوف بنات يمدحون الريال! وانا مب قصدي اخرب بيت حد ولا اهدم اسرة ولكني اتكلم عن الحالات القوية اللي الحرمة يكون لها شرعا الحق في الانفصال حفاظا على روحها وكرامتها واطفالها …

مرة كنت اسمع راديو وحده اتصلت على الشيخ عمر عبدالكافي وتمت تشتكي ريلها وكم يضربها وقالت له ليش يا شيخ نحن لازم نصبر وهم لا.؟؟؟ قال لها! من قال لك اصبري؟ ومن طلب منك ؟

أنا أأمن جدا أنه لو كل الحريم وقفوا يدا واحدا ضد كل ريال يسوي مالا يرضاه الله بالمرأة : لاعتدل حال الرجال :: لان الامهات اللي مثل هالحريم هم اللي يعلمون الريال انك انت اقوى واحسن وتروم تضرب وتذبح …
مثلما مافي رجل يرضى انه يتزوج بنت مش بكر ,, فالبنات اضطروا يحافظون على انفسهن
لازم البنات ما يرضن ياخذن واحد مب ريال بمعنى الكلمة .. عشان هم يضطرون يحترمونا

اتمنى مايكون في حد في المنتدى يفهمني غلط ويتحراني اقصد الفتنه او المشاكل .. انا كل همي بني جنسي واباهن يكونن اقوى