قبل العرس باسبوع اعترفلي انه يحب وحدة

انا متزوجة من 8 شهور وريلي اكبر عني بــ 9 سنوات وانا جامعية وهو ثانوية .. ما عندي عيال لين الحين وريلي قبل العرس باسبوع اعترفلي انه يحب وحدة من اربع سنوات وهي معرسة واظن كانت مشكلة بينها وبين ريلها عشان جي كان ريلي الضحية تمثل عليه دور المحبة وللعلم سوا وياها كل ما يخطر على بالكم وطلعات واسواق ومطاعم وعندها بنتين من ريلها .. قلت ما عليه مدام اعترفلي يعني خلاص انتهى كل شي بينهم وهو قالي جي انه خلاص وانها ردت لريلها وهو قرر يعرس لانها ماشي امل انها تطلق.

المهم في يوم زواجنا سافرنا شهر العسل وانا قلت خلاص بعيش حياتي وهناك قلت حق ريلي بكلم اهلي قال اوكي خذي التلفون لان انا ما كنت ماخذة تلفوني وياي وقالي اتصلي وانا ماسكة التلفون شفت انه شي مسج واصلنه ولا اردي فتحت المسج ومكتوب (( انا بخيرلا تحاتيني كلهم عندي والبيبي ميت من 9 ايام هالله هالله في حرمتك بس تحت وايد يعورني ) سوري ع الكلمة بس والله جي كان مكتوب.. فهمت انها كانت حامل وانها اجهضت هالسبب انها تركت ريلي لانها كانت حامل وردت لريلها .. بنات والله العظيم حسيت قلبي انقبض .. قلت هو عندي بس قلبه عندها وكنت اراقبه ويوم انا ادش الحمام هو يتواصل وياها بالمسجات

من هذاك اليوم والله انا عايشة بداومة مالها اول من تالي واحس اني اقل عن غيري وما خبرت ريلي اني شفت المسج لين ردينا البلاد .. احس كل ما ابي اسووي شي ريلي يعرفه وحتى سوالف العبايات يقول هي ربيعي يقول ها المكان حلوو بس غالي وربيعي يقول هاي العيادة اوكي حق المراجعات ( عيادات نسائية ) .. احس كل سوالفنا يخبرها وكم مرة شفت ف تلفونه مسجات فاضية من نفس الرقم وخذيت الرقم واتصلت وتاكدت انها وحدة ..
واجهته وانكر وصاح وقال بس تبي تطمن علي واني خلاص تركتها وانا احبج وابيج انتي .. قلت مابي اخرب حياتي وانا توني عروس قلت اوعدني قال اوعدج ونسيت السالفة وخليت عمري نسيت بس انا مستحيل انسى
كم مرة شفت ف تلفونه هالرقم من سجل المكالمات وانه بينهم تواصل وانه يكلمها يوم يطلع من البيت .. واجهته مرة ثانية وانكر وقال انتي مريضة نفسيا وانا تعبت منج ومن شكوكج ( بنات انا متاكدة وهو يبي يخبلني ) .. ورحت اتصلت في الحرمة قلتلها انا حرمة فلان وانتي تتصلين في ريلي بس ابي اقوولج حسبي الله ونعم الوكيل عليج واذا تبينه خذيه وانا برد بيتنا حرام عليج جي تسووين فيني .. قالت منو فلان والله ماعرفه وراس بناتي وعيب عليج تتصلين فيني ترا بوديج الشرطة ( شوفوا الجذب والنذالة) قلتلها حرام عليج بس ما كانت تخليني ارمس وتقولي يا ماما رووحي عند ريلج انا ماعرفه وتنكر الحقيرة..

احس والله انا غبية اصدق كلامة واصدق لاني ابي اعيش حالي حال الحريم.. اشووف الناس اقوول ليش ريلي جي .. شو ناقصني والمشكلة يقوول انتي كاملة واتمنى عيالي يكونون مثل تربيتج واخلاقج.. من اول ما عرسنا هالريال ما ياب لي وردة وانا كل مرة اييب له هدايا ومسجات حب واسويله مفاجات .. وحتى يوم ميلادي انا اقوله ترا اليوم يوم ميلادي ويوم تخرجي قلتله ترا اليوم انا تخرجت بس كلمة مبرووك طلعت منه .. طبعا مجاملة م والله مابي هدايا مابي شي بس مابي يخوني

عنده تلفونين نوكيا وبلاك بيري وكلهم ع الساينلت اتخيلو يروح الحمام يخلي الباب مفتوح يخاف افتش تلفونه وغير الباسورد مال تلفونه الثاني ( البلاك بيري الي فيه صور وفيديوهات وصاخة ) وانا اصلا ما افتش تلفونه لان مابي اعور قلبي زيادة .. والبارحة كنا طالعين وشفت ليت التلفون يولع وما رد عليه
انقهرت وسكت ويوم ردينا البيت نزلني وقال بروح بطلب عشاء وبرد .. بس عشان يفتك مني
يوم رد قلتله ليش ما رديت ع تلفونك يوم رن قال اي تلفون ما رن انتي تتوهمين لا تفكرين جي تراج بتستوين مينونة

يا عااااالم انا متاكدة وشفت بعيوني انه رن وهو يبي يشككني في نفسي وكله ينكر .. ومن البارحة ما ارمسه ومسويه له طاف واقووم بواجباتي الزوجية بس والله قلبي يعورني وتعبانة وااايد والله

خواتي ساعدوني شوا اسووي وياه تعبت والله كل يوم ادعي له بالهداية هو يتحرا هو اكبر عني وانا صغيرة وما اعرف بس اعرف كل شي وساكتة مابي اخرب بيتي

وجزاكم الله خير