حبيت انزل هذا الموضع للأخت (يا سيدهم كلهم) وافتح عيونها على امور كثيره كانت ممكن تسويها مع زوجها وتخليه ينسى اللي يحبها،، صدقيني يا اختي الشي اللي ما يكون مبني على ركايز قويه مستحيل يدوم وخاصة العلاقه الزوجيه
ختيه انا مريت بنفس تجربتج تماما،، بدا من الملجه الين ليلة الدخله ونفس الصدمه اللي انصدمت فيها لكن الفرق اللي ما بيني وبينج انا كنت احبه من اول يوم شفته فيه وانا تعلق قلبي فيه وكنت ما اتخيل حياتي بدونه وحتى بعد ما عرفت انه يحب وحده ويخوني معاها
أنا كان غريب عني وما يقرب لي شي،، وانتي كنتي بنت عمه يعني في رابط قوي بينكم وكنتي تقدرين تحننين قلبه لج بس لو بذلتي مجهود شوي الحين كان وضعج غير وكنتي انتي اللي بتكونين كسبانه
حاسه فيج وفي كل شي مريتي فيه لأني مريت بنفس الشي،، شعور واايد صعب في اول ليله لج مع اللي مفروض يكون شريك حياتج تكونين طبعا راسمه لج اشياء حلوه معاه بس تنصدمين بشخص داخل من بينكم ومخلي حاجز بينج وبينه
ريلي تم فتره بدون ما يدخل علي،، تخيلي كنت البس واتعطر واتكشخ وهو عادي ولا كاني موجوده عنده فالبيت بس ما استسلمت وخليته في النهايه يحس فيني كانثى،، ووالله كنت احس فيه يوم كان اييني كان يباني بشوق وحب مش بس تادية واجب وهذا اللي خلاني ما استسلم
يمكن انتي بعد حالتج احسن من حالتي بوااايد،، انا اللي كان يحبها كانت توصل عندي الين البيت وبدون خوف من حد وكانت تتجرا علي بعد بس كنت اتعامل معاها بنفس الوقاحه وكنت انا اللي استفزها وكنت ادور المشاكل اللي تخليني احتك فيها،، وكنت اخلي ريلي في الواجهه لأني كنت اباه يعرف اني مب هينه
والله يا اختي ما استحي لو اقولج كنت اتبع اسلوب الخبث والمكر عسب اميل ريلي لي،، كنت اسوي اشياء واوصل نفسي للمستشفى يوم كنت احس انه بيسير يشوفها كنت احاول اقطع كل وصل من بينهم،، كنت اسوي اشياء اخليه يحس بتانيب الضمير،، ايام كنت اتدلع عليه وايام كنت اصيح وايام كنت البسه،، وكنت ابين له اني احبه بافعالي بس بكلامي كنت اجافيه وكنت متعمده اسوي هالشي لأني كنت ابا اشغله فيني وما اعطي الثانيه تاخذه مني حتى بالتفكير
تدرين كنت يوم احس انه معاها كنت اتصل عليه وانا اصيح وكنت اصيح نفسي بالغصب وكنت اختلق اشياء مش موجوده بس عسب يودرها واييني،، اذكر مره لبست عبايتي وتلبست واتصلت عليه اباه يوديني السينما وكنا في الويكند قالي انا مشغول وما اقدر،، فقلت له انا بسير ويا ختيه وعيالها وقالي روحي،، وانا في الحقيقه كنت بروحي واختي مش معاي،، وخليت الدريول يوديني ووصلت المول وكانت الساعه 9 ورديت اتصلت عليه وقلتله انا في المول توني واصله واختي اعتذرت ما بتي،، وانا خلاص وصلت وخذت تذكره للفيلم وبدخل العرض،، اقولج تخبل واشتط علي وقالي ما تدخلين اليوم الويكند واكيد شباب الأهل موجودين ومكن يشوفونج وطبعا الكلام اللي ماخوذ خيره وانا كنت اكلمه بكل برود بدخل وفعلا سويت اللي اباه ودخلت،، تصدقين ما لقيت الا ثلث ساعه الا متصل يقولي انا في المول انتي في اي صاله واي فيلم!! تدرين بعد ما خذ التذكره وكل شي قلتله لا اتيي تيلس عندي دور لك على كرسي بعيد عني وايلس فيه،، كنت ابا احسسه اني مب محتاجتنه بكل شي في حياتي واني اقدر ادبر نفسي معاه او بدونه،، والريال اذبحيه لكن لا تهمشينه بس في نفس الوقت لا تحسسينه انه كل شي في حياتج لانه بيطلع فوق راسج
والله واذكر يومها يا اختي يوم ركبت السياره تم يصارخ علي ويرفع صوته لاني ما سمعت شوره ومشيت اللي في راسي،، سكت في ساعاتها وتميت اصيح واصيح لأني اعرف الريال وايد ضعيف جدام دموع الحرمه مهما كان قاسي،، واذكر يومها المسكين ما خلا شارع ما حاط فيه يحاول يهديني
انا اخبرج عن سوالفي لاني ابا اوضحلج كيف الحرمه تقدر تجلب الامور لصالحها
وانا من بدت معاي المشكله فتحت قلبي لأمي وخبرتها ببعض الأمور صح مش كل المشاكل بس فديتها امي لولها جان انا الحين مطلقه ويالسه في بيت ابويه،، هي اللي اصرت علي اني ما اهد بيتي وهي اللي تمت تنصحني اني ما ارمس حد عن مشاكلي لأن الناس ما ترحم وبدال ما يحلون المشكله راح يخربون بيتج وبعدها بيتشمتون
صدقيني يا اختي لو حاولتي تجمعين نفسج وفي داخلج اصريتي انج ترجعين ربلج لج بتقدرين وخاصة مبين انه حن لج من المسجات اللي يطرشلج اياها،، لا تستسلمين وخليج وراه اذا مش علشانج علشان بنتج اللي محتاجه ابوها وصدقيني يا اختي بتكون حياتكم وحبكم اقوى من العلاقات اللي تمت بزواج عادي،، حاولي على الاقل عسب ترجعين ثقتج في نفسج وصدقيني ما بتخسرين وبعدين الطلاق مش شي هين وخاصة انتي بالذات ما بتقدرين تبدين حياه يديده مع حد ثاني وبتحسين ان ما عندج ثقه في نفسج فعسب جي اقولج حاولي
انا الحين ريلي يمووت ولا ازعل عليه وعنده انا وعياله وبيته اهم شي عنده ومن الاولويات في كل شي،، واللي يشوفنا يقول متزوجين عن حب مب جنه مرينا في ظروف صعبه وقويه
ورساله ثانيه اوجهها للبنات اللي استخفوا بموضوع الاخت،، ترى البيوت اسرار ما انقالت عبث،، وفعلا في ناس عايشين مع بعض تحت سقف ومن بينهم عيال بس في الواقع اغراب وما يتكلمون حتى مع بعض ويوم اييها بس تادية واجب لا اكثر ولا اقل وهذا اذا كان فعلا اييها
لا تعتقدون ان هذي المشاكل مش موجوده او انها ماخوذه من سيناريو فيلم سينمائي،، اللي عندها نصيحه للبنت او كلمة مواساه تقولها للبنت بس لا تجرحون فيها لأن اللي فيها سادنها يا جماعة الخير
واذا اتنو مرتاحين ولله الحمد ترى في غيركم لا يعاني المرين في حياته
من بعد ما طرحت مشكلتي في المنتدى ياني كم كبير من الرسايل من بنات عايشين نفس ماساتي او حتى اكبر من مشكلتي بس ما اطروحها في المنتدى،، وانا بعد انصحهم ما يطرحونها لأن للأسف في ردود تكسر خاطر الواحد وتخليه يندم انه كتب مشكلته عالعام
واخيرا كلمه للبنات اللي قالن ان الحرمه اللي يحبها الريال ما لها ذنب وانها تحبه واتدافع عن اللي تحبه،، اقولها اي دين يحلل اللي سوته هذي خرابة البيوت،، المفروض كانت تنسحب من حياته بعد ما تزوج ولا تشل ذنب الحرمه طول حياتها لأأنها كانت السبب في خراب بيت الله عمره بعقد موثق على سنة الله ورسوله
واللي تبا تعرف قصتي،، تدخل على هذا الرابط
آهنيج
صح كلامج ومشكوره على طرحج
سالفتج ما انساهااااا .. وما انسى كيف صبرتي عليه
الله يوفقنا ويوفقكم
ربي يوفقج اختي والله اهنييييييييييج واصفقلج بحراره
صدق اهنيج على قوتج و الله يديم السعادة
