السلام عليكم ورحمــــــة الله وبركاته
إذا بتجيكون مشاركاتي بتلاقون أني ما أشارك وايد، طبيعتي أحب أقرا أكثر مما أشارك، لكن اليوم الشي اللي خلاني أطلع من صمتي اليلسات العائلية وكلام ربيعاتي المعرسات والمنتديات النسائية والقشة اللي قصمت ظهر البعير كان موضوع في الصفحة الرئيسية في المنتدى لحقن دهون الجسم في "المؤخرة"
كل شي قام يثبتلي أنه كثير من النساء مستعدة تفرط في دينها و تتجاهل عقلها عسب منافسات تافهة وسطحية بينها وبين الحريم وتقلدهن تحت مسمى "الكل جي عادي شو فيها" ومستعده تفرط في دينها عسب ريلها يجوفها حلوة!!
ماعاد وايد مهم عند وايد من الحريم شو هو الحلال وشو هو الحرام، شو هو العقلاني وشو هو الغريب واللي ما تقبله النفس!!
مجتمعنا يوم عن يوم بدا يخترب، وللأسف دائماً خراب أي مجتمع يبدأ من النساء لأن النساء فتنة وهن بدورهن يخربن الرياييل واذا ما كانن قد المسؤولية كأمهات بتخترب الأجيال الياية بعد…
خلينا ناخذ الموضوع حبة حبة… وأنا اركز عالمعرسات لأن المفروض أنهن الأعقل والأحشم بحكم أنهن محصنات ولأنهن قدوة للبنات…
يوم الوحدة معرسة وأم وطالعة بهالعباة الضيقة والمخصرة واللي كمها واسع وايدينها طالعه وغيره مما يغضب الله وفوق ها عيونها مب فراسها عسى ما مر واحد الا تسوي له سكان عيل وين العفة الجميلة ؟؟ احنا ملحقين عالمراهقات ولا على اللي الله احصنهن و المفروضات أنهن عقل وثقل وحشمة؟؟ وعلى شبابنا السلام بين هالفتن ، حتى في مسجد الشيخ زايد أيام التراويح أمهات ويا عيالهن طالعات من المسيد بكل كشختهن وعيونهن مب فروسهن!!!
يوم الوحدة تدوووور دوارررة في النت على الملابس التنكرية مب حرام لكن هي مب عارفة شو قاعده تسوي في ريلها، يوم تلبس له ممرضة يوم بيجوف ممرضة ما بيقدر يطالعها بنظرة عادية، وهلم جرا… يعني انتي تخربين ريلج بايدج وتخلينه يصاب بالسعار الجنسي…
يوم الوحدة بدال لا تراعي عيالها اللي قاطه مسؤوليتهم عالخدم و تضيع وقتها في محاولات لنفخ مؤخرتها و براطمها و تنتفلي في حواجبها عشان ريلها، حبيبتي لو اغضبتي الله عشان هالريل الله ما بيبارك لج في حياتج معاه… صدقيني الأهم من أنه يفكر فيج كشيء جنسي انه يحبج كانسانة والحب من الله واذا اغضبتي الله عشان محبة انسان وين تبيييين الله يباركلج وياه ويخليه يحبج؟؟ ياما حريم عاديات مرضيات الله ماخذينهم رياييل أحلى عنهن ويموتون عليهن، وياما ملكات جمال وفوق جمالهن لاعبات في عمارهن بما يغضب الله عشان هالرياييل ورياييلهن مووول مب مسويين حقهن سالفة…
أنا ما أقول لا تكشخون بس الكشخة لها مكان ووقت وحدود عقلية وحدود دينية… ولا أقول لا تهتمون بالزوج لكن الأهم ربج ودينج عقب ايي الريل والعيال… والوقت اللي تضيعينه في أشياء تافهة قضيه ويا عيالج ازرعي فيهم قيم وأخلاق تحميهم من الزمن الياي اذا ها زمنا ونحن اللي تربينا على كل شي زين جي، فما بالكم بزمن الجيل الياي!!
الحياة مب براطم ومؤخرة منفوخة و غمازة صناعية وخدود منفوخة وما بتكونين انسانة مميزة لأنج لابسة عبي تغضب الله ، وريلج ما بيحبج اذا اغضبتي الله عسب تحصلين على هالمحبة… والعفة مهمة وااايد في الحياة صدقيني شكلج غلط وانتي معرسة وام عيال وتبصبصين وحتى الخوات اللي مب معرسات ترى والله العفة حلووووووووة ومريحة ولذيذة، أحلى شي يوم تقولين بغض بصري عشان الله يعوضني خير ويباركلي في حياتي والله تحسين بلذة….
أتمنـــــى محد يزعل مني لأني أصلا ما أحب أتكلم ولا أتدخل في حياة حد لكــــــن والله من قهري على بنات البلاد ولأني أبا لهن الخير… طريج الله واضح وطريج ابليس واضح ومعروف كل طريج وين يودي وشو فيه، وراحة البال والسعادة و النهايات السعيدة معروف في أي طريج نلاقيهن.
المشاركة الأصلية كتبت بواسطة رائدة أعمال 
العفو حبيبتي حياج 
المشاركة الأصلية كتبت بواسطة دلوعه حمودي تسلمين من طيبج
المشاركة الأصلية كتبت بواسطة مياسة العود آميــــن يارب العالمين 
ربي يسلمج اختي.