ريلي مايغار علي

السلام عليكم
شخباركم
طبعا موضوعي واضح من عنوانه
بنات انا معرسه من 7 شهور تقريبا .. احس ريلي مول مايغار علي..ادري بتقولون احسن لج وشو تبينه يغار ومادري شو .. بس والله هالشي يضايق فيني واحسه مايحبني.. اتخيلوا مره كنا سايرين المول وكنا صوب المطاعم .. قلتله نا بسير الحمام.. قالي انزين سيري .. قلتله ما بتي وياي؟ قال لا انا بطلب لي اكل .. اتخيلوا الحمام كان وايد بعيد عن المطاعم.. والمول متروس شباب .. اتخيلوا مشيت بروحي وانا مستحيه ومنزله راسي .. وانا من النوع الخجول وايد وريلي يعرف هالشي بس ياريته يقدر هالشي ويحس فيني .. وغير اني ما اتعودت على هالشي ,, ابوي فديته يوم كنت اسير وياه كان يوصلني للمكان اللي اباه ومايخليني امشي بروحي .. وحتى اخواني.. اما ريلي للاسف مايهمه اذا سرت بروحي ولا وياه.. اتخيلوا يوم رجعت من الحمام شفته قاعد ياكل عالطاوله ولا عالبال .. حتى ما اتصل فيني وقال ها وينج خلصتي ولا .. اتخيلوا واللي قهرني اكثر يوم وصلت عنده قالي ما طلبتي لج اكل يعني كان يباني اسير اطلب لي عشا بروحي بعد… والله انه بارد ولايهمه شي .. بخبركم عن موقف ثاني بعد .. اتخيلوا مره كنا سايرين فندق من الفنادق .. هو دخل عسب يحجز لنا غرفه وجي .. بعد ماطلع ويا السياره قالي انزلي انتي وسيري عطيهم الهويه مالج وانا بسير ابركن السياره .. اتخيلوا الرسبشن كله هنود وزلمات .. وهو داش قبلي وشايف كيف الوضع.. ماقال هذه حرمتي وما بخليها تقعد ويا الهنود .. اتخيلوا دخلت وعطيت الريال الهويه وسرت عنه حتى ماشليتها من المستحى وتميت قاعده بروحي ومستحيه حتى فيه هندي يا صوبي وقالي بتسيرين الغرفه .. قلت له لا بتريا ريلي .. احس اني كسرت خاطر الهندي .. لانه شافني بروحي ضايعه وسط الرياييل وريلي اللي هو المفروض مايرضى علي خلاني ولا اهتم بشي …اتخيلوا مره قلتله توه واحد طالعني بالمول وابتسم حقي .. اتعرفون شو رد ؟؟ قالي الشباب يطالعون اي بنت اصلا تمشي بروحها حتى لو كانت مب حلوه .. اتخيلوا جي رد علي .. والله اني مضايقه منه .. شو الحل وياه

شو هالبرود الي فيه !!
مادري شو اقولج يمكن مع الوقت تاخذون على بعضكم

الله بعينج

حاولي تحسسي ان هالشي يضايقج ، وقوليله بطريقة غير مباشرة عن اي موقف مع أبوج او اخوج ان ماطاعوا يخلونج بروحج ،،،،

امم هو فعلا يضايق .. بس انتي لا اتشوفينها انه هو مب مهتم. يمكن هو ما اتعود على جي (ما عنده اخوات .. اخواته اكبر عنه و معرسات) و لا يثق فيج وايد يعرف انه اذا انحطيتي في وسط هنود مثلا او رياييل ما بيسوون شي لانج اتنزلين راسج مثل ما قلتي؟؟ بس اذا يضايقج لازم على الاقل تنغزينه .. لانه ان شاء الله بتكملين وياه العمر كله و مب زين اتخلين هالشعور يضايقج

اعرف واحد من اهلنا جي ويا حرمته يوم يطلعون عادي هي تروح تتشرى بروحها وهو بعد نفس الشي ومره هي راحت الحمام وهو راح يتشرى وهي طلعت جان ما تشوفه وراحت تتشرى ويوم خلصت دقت عليه وينه

بس شخصيا اعرف هالريال وااايد غيوووور ومحااافظ وااايد يمكن هو واثق من حرمته او يمكن واثق انه محد يشوفها لان مثل ما قلتي عاديه مب ملكه جمال وجي يعني

ف شي رياييل جي يخلون الحرمه تاخذ راحتها والغيره والثقه موجوده اكييد

بالتوفيق

أختي يمكن هو ما متعود على مثل هذه المواقف مثل ما قالت الأخت , لازم ترمسيه لأنه يمكن ما ماخذ باله من الموضوع , رمسيه بصراحة. أكيد يحبج ويغار عليج , ربي يخليكم لبعض ويهدي سركم .