مشلكتي بنات متعبتني ؟؟؟ نصائحكم

السلام عليكم ورحمة الله وبركاته
بنات انا بطرح مشكلتي عليكم من اجل النصائح ومن باب الفضفضة لاني والله احبكم بالله قصتي تبدا من انا وريلي من بداية شهر رمضان نفطر ويا اهله امه واخواته لانو ابوه متوفي ويفطرون معانا اخوان زوجي وحريمهم واتفقنا احنا وهم ان كل يوم الفطور علبيت المهم انا لاحظت من اول يوم افطر فيه وحدة من حريم اخو ريلي ايلي هي سلفتي وبعد زوجها وعيالها ما ياكلون وطنشت السالفه مع انو والله حز بخاطري عالاقل يعطوني اجر المهم اليوم الثاني كان الفطور عليهم قام اخو ريلي يقول لزوجي حرمتك ماتاكل يقصدني انا مارديت عليه وراح زوجي قال كلن يري الناس بعين طبعه انا حرمتي تاكل المهم وطاف هاليوم ونفس الحالة انا اطبخ ماياكلون لا هي ولا عيالها ولا زوجها حتي زوجي اتضايق وفجاءة قامت مرته ما تكلمني من غير سبب ورحنا بيتها كان الفطور عندهم ولا استقبلتنا ولا ضحكت ولا سلمت حتي رحت انا قلتها سالتها عن اخبارها وبعد سوت طاف من الخاطر والله انا اتضايقت وحسيت بقلة القيمة وهذاك يوم وهذا يوم لا اكلمها ولا تكلمني واحس عمري وايد مضايقه وبعد صارت تاخد سلفتنا الثالثة وتقعد تكلمها وتضحك واياها وطالعني من فوق لين تحت واحسها تكرهني ولا طيقني وانا وحدة ما احب يكون الي اعداء مع حد صراحة واعرف انو هالموضوع تافه بس انا مضايقة حتي ريلي غصب عني ما يحب يزعل اخوه واخوه حاط دوبه من دوبي انتي ما تاكلين من اكلنا وانتي مادري شو وانا ما ارد عليه ولا زوجي

انتي سويتي الي عليج ،،

واذا مب عاجبنهم النظام خلاص كل واحد يفطر في بيته
او كل وحده تسوي الفطور الي يعجبها وتتجمعون في بيت الام

وانتي دام ريلج وامه راضين عنج لا تهتمين بالباقي

ليش اتعبين راسج وتفكرين باشخاص مب مسوين لج اعتبار

ريحي راسج وفكري بس بالاشخاص الي يحبونج ويحترمونج ،،، لا تركزين ع الباقين

طنشيها ولا تشيلين همها حبيبتي ..

يا حبيبتي انتي والله
انا يمكن اكون اكثر وحده حاسه فيج
ﻻن مره كاتبه موضوع مقارب لموضوعج

كنت منقهره ومتضايقه
صح موضوع تافه بس يقهر

بس انا الحين اتصرف ولا كانه احد موجود
يعني بالمختصر
تصرفي بطبيعتج بس هي كانها يدااااار … سوري ع التشبيه

بس جد والله دخلي وطلعي وطبعا لاتعطيها اهتمام
ولا تقعدين معها ف الجلسه الا اذا زوجج معج

وانصحج بعد حاولي تتجنبيها لدرجة انج ماتورينها نفسج
عشان تنسينها وتنساج عقب لما بتشوفيها بعد فتره
بتحسين انها مووول مش مهمه … هذا اذا مارجعت تكلمج بنفسها

اذكر وحده م الخوات عسى الله يسعدها
ردت علي … ان ﻻزم حد م اهل زوجج يطلع مش على هواج
وبلفعل كل وحده ساكنه مع هل ريلها يطلعلها حد من تحت الارض

وعلى فكره ترا اغلب السلفات حتى لو يعاملون بعض معامله زينة
في موجوده غيره الا من رحم ريي

كذا من الله فطررره
بس انتي صفي نيتج وحاولي ماتشلين فقلبج شي
ودايما رددي … ربنا لاتجعل في قلوبنا غلا للذين امنوا

وانسيها ومارسي حياتج ولا كانها موجوده

الله يكفيج شرها
ويبعد عنج كل حاسد وكل ظالم وكل فتان يارب

ادري طولتهاا وهي قصيره
بس لاني ماره بوضعج
وسويت هالاشياء والحمدلله فحالي بعيد ع كل حد

الله يعينج غناتي طنشي وريحي راسج وسوي مثل ما قالن الاخوات

يمكن انتي تسرعتي وقلتي لريلج عن سالفة حرمة اخوه انها ما تاكل لا اهي ولا عيالها
اذا فطرتي عندها المرة اليايه اكلي نص اكلهم وسوي توثيق يعني صوري الاكل الي تاكلينه
وحطي صورة الاكل دي بي وكتبي تسلم ايد ام فلان على طبخها الفنان هههههههههههه
ترى الموضوع ما يستاهل هالحساسيه كلها
والله بعض المواضيع يبالها حل باسلوب ساخر
والله يهدي النفوس