قصه أعجبتني وحبيت أنقلها ألكن

السلام عليكم ورحمة الله وبركاته

هذي القصة شفتها بعيني .. محد قالي عنها .. شفت قصة تحكي كل شي الحب والظلم والأهانه والصبر ..بس من الآخر .. من النهايه .. وكل مادخلت في تفاصيل هذي القصه أقول لا اله الا الله … سبحان الله ..

فعلا ان الله على كل شيء قدير

القصه كالتالي :

أنا مبتعثه وادرس في كندا .. وصار لي سنوات أصلي صلاة الجمعه في المركز الأسلامي بحكم ان دوامي يوم الجمعه قصير وأقدر ألحق الصلاه .. ومرت الايام وكل يوم أعرف الي يشتغلون في المركز أكثر
وصرت تقريبا اعرفهم كلهم .. كنا نصلي مع بعض وحلقات تجويد يوم السبت وكذا ..

في شعبان الماضي .. لفت انتباهي وحده جديده في المركز .. وبين انها خليجيه .. وكنت مستغربه لأن أغلب الي يشتغلون بالمركز إما كنديات أو عربيات .. وكان الخليجيات نادر جدا .. يعني يجون يساعدون وكذا بس هالانسانه كنت أشوفها كثير .. كل جمعه .. دخلنا رمضان وصرت أشوفها كل يوم بصلاة التراويح .. وكانت تشتغل في المركز ومبين انها تعرف الكل ..

5 رمضان صلت جنبي التراويح .. بعد الصلاه انا كان زوجي في الجامعه قلت بدال ماارجع البيت واجلس لوحدي اساعد المركز هناك وجبت بنتي من الحضانه ورجعت المركز

وشفت هالانسانه .. وكان معاها بنت وولد توأم أعمارهم تقريبا 3 سنوات .. ماشاء الله تبارك الله .. في قمة الجمال والغريب ان عيونهم خضراء وشعورهم شقرا .. وينادونها ( ماما )

وهي جالسه تأكلهم .. الأم جميله جدا بس كجمال عربي أو خليجي بالأصح .. لكن أولادها كنديين بحت

جلست معاها وتعرفت عليها .. وانصدمت لما عرفت انها ( سعوديه )

بعد علاقة شهر ونص تقريبا عرفت تفاصيل قصتها العجيبه .. في البدايه خلونا نسميها ( ريم ) مثلا

قالت لي :

عشت حياتي كلها زي اي بنت سعوديه في بيئه محافظه جدا .. كانت امي مديرة مدرسة .. وشخصيتها قويه وكانت الكل بالكل في البيت .. بعد ماتزوجت ابوي جلسوا سنوات لين جابوني .. بعدها الله مارزقهم أطفال غيري

تقول عشت دلوعه الكل .. أمي وابوي .. واهلهم .. كانت طلباتي أوامر .. أبوي طبيب وأمي مديرة مدرسة .. وكان أمنيتهم أنهم يعلموني أفضل تعليم وكان هذا هدفهم .. أني أتعلم في أفضل الجامعات

يخافون علي من النسمه .. بس بنفس الوقت كنت عاطفية جدا وع نياتي .. وشخصيتي دائما ماتظهر قوتها لان تعودت امي تقرر عني كل شي .. وكنت جدا رومنسيه .. والدراسه مهمه بس الأهم اني اتزوج ..
من انا طفله أحلم اني أتزوج وأجيب أطفال .. وأمي وأبوي يحلمون أني أتخرج من أفضل جامعه ..

تخرجت من الثانويه .. طبعا الثانويه الي تخرجت منها كانت خاصه ولغات .. وأول ماتخرجت .. تفاجأت ان أهلي قرروا اني اسافر أكمل دراستي برا لأن هناك التعليم أفضل ..
والمفاجأه الأكبر .. أن أمي تقاعدت من عملها !!!!!!
عشان تروح معاي …

فرحت وقتها اني بسافر وبدرس برا وكذا كأي وحده تنتظر حياه جديده .. سافرت أنا وأمي وخالي ..
خالي كان محفرررر في الجامعه بالسعوديه لحد مافصلوه .. وأخذته أمي معاي قالت يمكن يدرس هناك على الأقل يتعلم لغه ..

رحنا وبدأنا حياه جديده مختلفه علينا كلنا .. أنا دخلت عالم جديد .. غير أبدا عن الثانويه .. أمي الي تعودت على قوة الشخصيه والعمل .. تركتها كلها عشان تشوف بنتها تحقق أحلامها ..
خالي بدأ يجد شوي ويهتم بدراسته ..

مرت السنوات وقبل آخر سنه من التخرج .. انخطبت ..

وكان بالنسبه لي أحلى خبر ممكن أسمعه .. بس كان العكس بالنسبه لأمي وأبوي .. انو كيف تتزوجين ودراستك و و و

انخطبت لولد عمي .. أكبر مني بعشر سنوات .. بس كان بالنسبه لبنات عائلتنا الحلم الي كل وحده تحلم فيه
وكم مره كنت جالسه مع بنات عايلتنا وهم يمدحون فيه ويتغزلون فيه وكلهم كانوا يتوقعون انه مستحيل يخطب الا وحده جميله جدا .. والي كنا كلنا مانتوقع انها راح تكون وحده مننا

الاسبوع الي انخطبت فيه كان اول اسبوع لي في اجازة الصيف الي رجعنا فيها للسعوديه .. وصار انواع النقاش والزحمه والشد والمد وانا واقفه اتفرج عليهم ..

امي تقول كبير .. اهله مدري وشو … ماراح تكمل دراستها ..
ابوي يقول الولد كويس .. من اهلنا .. بنشترط تكمل دراستها ..

وكان محور الحياه عندهم هي الدراسه .. انا كنت وقتها اتذكر كلام البنات عنه واحس بنشوه وانا احس اني انا المحظوظه الي راح تاخذه ..

وبعد جدل طويل .. وافقنا عليه .. واتذكر اني مااستخرت حتى لاني كنت اكيد احس انه هو الخير

انخطبنا لبعض قبل مااسافر وسوينا ملكه ع السريع .. واكيد اشترطنا اكمل دراستي .. وامي اجبرت ابوي يكتب بالعقد .. انها لو تبي تكلم دراستها ماستر ودكتوراه مايمنعها ..

ملكنا .. وكنت اشوفه فارس احلامي .. كان كلامه اوامر بالنسبه لي .. وكان يحبني .. وبعد ماسافرت ورجعت اكمل دراستي كانت امي ماتقولي انه اتصل عليها عشان مايشغلني عن دراستي .. وكانت تمنعني من المكالمات الطويله ..

مرت الأيام .. وتخرجت ..وحضر هو وأبوي حفل تخرجي .. وبعدها رجعنا للسعوديه وبدأنا تجهيز الزواج .. وتزوجنا ..

وبحكم اننا زوجنا ع السريع قال خلينا نجلس فتره في بيت أهلي على ما نجهز شقتنا على ذوقنا ..
وانا كنت ماارفض له طلب ابد .. اي شي يقوله كنت اقوله حاضر وطيب ..

كانت ايام جميله بداية زواجي منه .. ورجعنا من شهر العسل .. ورجع لدوامه .. وقدمت أنا ع وظيفه وفعلا لقيت بشكل سريع ..

الي فاجأني .. انه رفض اني أتوظف .. وكنت أعرف ان السبب عشان راتبي راح يكون افضل من راتبه .. وكنت اراضيه وقلت له الي تبي يصير ..

وماكنت اقول لاهلي اي شي صار معاي لاني اعرف امي وابوي ماراح يسكتون له .. بس انا كنت احبه وماابي افقده ..

مرت الايام وبدأ يزيد وزني بعد الزواج مره .. وبعد 8 اشهر كشفنا عن تأخر الحمل واكتشفت ان عندي تكيس في المبايض بسبب زيادة وزني ..

كان يتغير كثيييير علي .. صار يجرحني بسبب زياده وزني .. صار يتكلم علي بسبب اني ماحملت ..

كان دائما يحسسني بشعور انه افضل مني وانه يستاهل وحده احسن مني ..

وكل مره كان يضايقني فيها كنت انا ارجع اراضيه .. ولا اقول لامي شي عن الي يصير ..

ماطلعنا من بيت اهله .. كان يقولي اذا حملتي اطلع غيرها لا تفكرين .. كنت اشتغل طول اليوم ببيت اهله .. امه طيبه معاي ..بس أخواته كنت اعاني منهم .. ويحسسونه دائما انه يستاهل احسن مني ويتقصدون دائما يقولون له ان فلان تزوج قبلك وجاله عيال و و و

وانا في زياده وزن مستمره .. كل مالي ازيد اكثر .. بسبب الوحده والنفسيه السيئه .. مايخليني اطلع من البيت .. ماازور اهلي مع انهم ساكنين مقابلنا وحديقتنا مشتركه

صرت اطلع الصباح وهو في الدوام بدون مااحد يحس اروح افطر عند امي واجلس معاها وارجع قبل يجي
لين مره شافتني اخته .. وجابت طاري قدام اخوها وهي ماتدري انه مانعني ..

وقتها اول مره يمد يده علي .. !
تفاجأت .. بكيت .. انهرت .. مابيني وبين اهلي الا كم متر .. هناك كنت عايشه ملكه .. وهنا عايشه خدامه

كلمت وحده من صديقاتي وقلت لها كل شي قالت لي تستاهلين انتي الي سويتي بنفسك كذا .. ليه تسمحين لهم يعاملونك بهالطريقه ..

وفعلا .. قلت انا لازم اتغير واثبت له انه حتى لو هو اكبر مني بالسن مايعني انه يلغي شخصيتي ..

كلمته وقلت له غلط الي تسويه معاي .. قام سحبني للمرايه وقال شوفي نفسك لما تصيرين زي الناس وزي زوجات اصدقائي تعالي تكلمي ..

انجرحت .. ودفنت نفسي بالدموع .. وصرت احيانا الوم نفسي اقول معاه حق واحيانا اقول مو لهدرجه ..

مرت الايام ومر على زواجنا سنتين ونص وقام ينام في غرفه ثانيه يقول انا حلفت ماانام معك لين تنحفين وتصيرين انثى .. انتي سديتي نفسي ..

وقت الصباح كنت اشغل نفسي بأي شي .. الظهر اطبخ له ولاهله بحكم ان خواته في الجامعه .. والعصر معاهم ع الشاي والليل كلن يقفل عليه الغرفه وانا لحالي بالغرفه

امي وابوي قلبهم قارصهم ويسألون حتى عمي عني .. وانا اقولهم انا بخير واضحك واسوي نفسي احسن وحده ..

لين مره كنا جالسين كلنا خواته المتزوجات والصغار وعيال اخواته وعمي وزوجته .. وكانت اخته تسولف لنا عن وحده زوجها تزوج عليها وظلمها وكذا ..
قلت انا مسكينه ماتستاهل الله لا يسامحه مايبين بعينه ..

ماشفت الا ذاك الي قام منتفض من مكانه .. قال وش تقصدييييييين !! وماشفت شي لانه بكل قوته عطاني كف قداااااااااااااااامهم كلهم .. طحت بالارض وانا ابكي مو مستوعبه شي
قام يصارخ يقول والله لاتزوج عليك يالخمه .. يالدبا يالله تتحركين .. لا منك فايده ولا حمل ولا شي .. الوحده اذا مو كفو زواج ليش تتزوج ..

تقول انا من هول الصدمه مافهمت شي .. ماشوف شي لأن الدموع ملت عيني .. اسمعهم وهم يهدونه وعمي قام يمسكه وهو يحاول يضربني .. ويقول هي تقصدني بنت … ويسبني ويسب امي وابوي ..

تقول هذا موقف لو تمر عليه ألف سنه ماانساه ماانسى الأطفال وهم متخرعين يبكون .. ولا خواته وعيونهم بتطلع ووحده منهم تلف راسها فيها ضحك .. ولا انسى عمي يوم يحاول يمسكه ويقولي روحي لاهلك قومي بسرعه .. لانه يخاف علي منه .. ماانسى تفاصيل ذاك اليوم ابد ..

ركضت بدون شعور لأهلي .. دخلت عليهم وانا شبه جنازه .. بكييييييت بكا سنتين ونص وشافوا اثر الكف الي على وجههي منه ..

قلت لهم كل شي صار من تزوجت للحين .. امي قامت تصيح معاي وابوي ماشفته لأنه طلع من البيت وراح لهم

رفضت اطلع من البيت والحضن الي مافي احد بالدنيا اعطاني مثله .. حلمي بالزواج والأمومه انهدم

حاول عمي يرجعنا لبعض رفضت .. جا هو كثييير بس رفضت اشوفه .. كان يدق كثير على جوالي .. مارديت وغيرت الرقم بعدها ..
طلبت الطلاق رفض يطلق .. ورفعت عليه قضية خلع وكسبتها وخلعته .. كان يرسل عيال خواته الصغار عندنا البيت ومعاهم هدايا والا رسايل كنت ارجعها معاهم وماافتحها اصلا ..

علاقة اهلي بعمي توترت جدا وماصرنا نشوفهم الا بالصدفه في الحديقه اذا دخلنا او طلعنا من البيت ..

بعد كم شهر امي اقنعتني اطلع اكمل ماجستير بكندا .. وهي بتطلع معاي .. وفعلا جبت قبول ماجستير وطلعت على طول مع امي وابوي اخذ اجازه كم شهر وطلع معانا ..

ودخلت امي التحفيظ الي بالمركز الاسلامي الي بجنبنا .. وانا كنت ادرس وادخل التحفيظ معاها يوم بالاسبوع ..
تقول وتغيرت حياتي .. حاولت اتقرب من الله كثير .. حاولت كل شي في حياتي يكون لله .. كنت استغفر كثير ان الله يعيني على حياتي الجديده واترتاح من الذكريات ويعوضني خير لاني في بداية حياتي ..

تقول كنت بين فتره وفتره ادخل حسابي القديم في الفيس بوك واشوف اخر اخبار طليقي .. تقول كان مرسل لي رسايل كثييييير .. وكان يكتب شعر ندم .. وحنين .. مادري ايش ..

تقول وانا كل مايجيني حنين له .. كنت اتذكر اخر موقف .. ويروح كل شي

وتعلمت وصرت اقوى من قبل وشخصيتي اقوى من قبل .. وبدأ وزني ينقص شوي شوي بدون مااحس او افكر فيه .. لأني ارتحت نفسيا لحد ما رجع زي اول خلال سنه

بقي من الماجستير ترم واحد واتخرج .. تقول وكل يومي انا وامي في المركز الاسلامي وصارت لنا علاقات كثيييير وحياتنا مليانه بأهل الخير .. من كل الجنسيات ..

وانا صرت متطوعه رسميه في المركز الأسلامي .. وصرت على تدريس أولاد المسلمين اللغة العربيه يوم السبت ..

ومرت الأيام .. وفي ذاك اليوم جاتني مديرة المركز الأسلامي .. وقالت لي تعرفين الدكتور يوسف ؟
قلت لها أكيد ومين مايعرفه ..

الدكتور يوسف كندي ابا عن جد .. ومسيحي سابقا .. اسلم قبل 5 سنوات وحفظ القرآن الكريم .. ويتعلم اللغة العربيه دكتور في الجامعه رياضيات .. وصار عمود رئيسي بين أعضاء المركز الأسلامي في المدينه

قالت كلمني من اسبوع يريدك زوجه له على سنه الله ورسوله .. معجب بأدبك وأخلاقك ويريد زوجه مسلمه وأنتي من بلد مكة والمدينه ..

تقول سبحان الله .. اخر شي كنت اتوقعه اني اتزوج واحد كنت اشوف مثله في الافلام من ناحية الجمال .. وكنت اقرأ عنه في الكتب من ناحية التقوى والايمان ..

قلت قوليه انا مطلقه وتزوجت سابقا سنتين ونصف ماانجبت بسبب كذا وكذا ..

تدرين ايش كان رده ..؟

قال والله لو ماانجب منها احد .. يكفيني فخرا أني أتزوج من مسلمه ولدت وتربت على الأسلام .. وأول ماسمعته في الدنيا الأذان !!!!!!!!!

وسبحان من بيده كل شي ..

تقول فتحت الموضوع لأمي وأبوي .. وامي وافقت طبعا لانها تعرفه في المركز الاسلامي .. وابوي كان متردد بحكم انه كندي بس

وجاء لعندنا البيت في السعوديه وتزوجنا زواج بسيط جدا .. كأنه من ايام الصحابه .. وعارض الجميع على زواجي وماوقف معاي الا امي وابوي

والله العظيم مامر على زواجي شهرين الا وانا حامل …وبعد كم شهر اكتشفت انهم توأم !!!

والله ماعشت مع بشر أحن وأرق من زوجي ولا شفت أحد يقدرني حتى أمي وابوي مثل زوجي ..

كان لو اختلفنا على شي بسيط يقول انتي صح لأنك مسلمه قبلي وتعرفين اكثر حتى لو كان الموضوع ماله اي علاقه بالدين ..

تعلمت الدين الصح منه .. وربي عوضني عن كل شي عانيته وعن كل ألم ذقته .. وعايشه حياة سعيده

زوجي جمع بين الدين والتعامل وأهم شي فهم الدين الصحيح سافرت معاه أماكن كثير وعلمني كيف أكون فخوره بديني فيأي مكان بالعالم ..
ربي رزقني منه عمر و ساره
اسم امه ساره .. كانت مسيحه ولما سمى بنتي ساره على امه عشان يتودد لها حبتني وحبت اولادي مع انها من اول كانت تعاملني بكل احترام رغم اختلاف الدين .. والحمد لله ربي اكرمنا وأسلمت وانا الي نطقتها الشهادتين …

والحمد الله مر على زواجي اربع سنوات وهي اسعد ايام حياتي .. وأمي وابوي اسعد الناس لأنهم أخيرا تطمنوا على بنتهم مع الانسان الي الله عوضها فيه ..

سألتها عن طليقها وأخباره ..

تقول مره كنت عند أهلي واولادي اعمارهم سنه ونص .. طلعت من بيت اهلي انا وزوجي واولادي واحنا بالحديقه .. شفته وكان داخل البيت تقول مانزل عينه عنا .. وزوجي قال له السلام عليكم ورحمة الله وبركاته << تقول هذي عادة زوجي يسلم على الجميع
تقول جا وسلم على زوجي بس بحكم ان زوجي مايتكلم عربي كثير ماسولفوا ابدا تقول عيونه معلقه على اولادي وعلي .. سلمت عليه .. وقلت لأولادي
Say السلام عليكم to uncle

اولادي قالوا السلام عليكم .. وهو دمعت عيونه .. وقال سامحيني

وقتها كنت بقول اسامحك على ايش والاايش …؟
شفت الله كيف ينصر المظلوم …؟
شفت عوضي الي الله عوضني ..؟
هذا اانا الي كنت تعايرني ماتنام معاي عشان انا دبا وساده نفسك .. وانك متحملني ومتفضل علي .. شوف زوجي ..قدامك .. وشفني نحفت يوم بعدت عنك .. وشف عيالي قدامك يوم كنت تعايرني مااحمل ..!!

بس وقتها الله انعم علي بالحكمه وقلت الله يسامحك .. ويرزقك ..

وتقول من بعدها ماشفته بحكم اني عايشه مع زوجي في كندا .. بس الي اعرفه انه ماتزوج للحين .. وأخواته وحده منهم تطلقت وسبحان الله كانت اكثر وحده معذبتني

وهي الآن أخذت الجنسية الكنديه .. من زوجها وتوظفت .. في المدينه الي انا ادرس فيها وباشرت عملها من شهر 8 الماضي الي كنت اشوفها فيه

انتهت قصتها .. ويارب تكون سلوى وعبره لكل مظلومه وصابره ومطلقه .. ان الله يعوض خير من ماكنت تتوقعين .. وان الله يرزق كل انسان على قدر نيته

وعبره وعضه لكل ظالم .. وانسان مستهين في زوجته ان الله ممكن بين يوم وليله يغير من حال الى حال

وللأهل أتقوا الله في زوجة ولدكم او زوجة أخوكم .. الدنيا دواره وكلنا في الأخير للقبر ..لا تحجبك عن رحمة الله دعوة انسانه مظلومه ويردها الله لك في زوجك او اولادك

منقوله

سبحان الله ….تعوضت ماشاء الله
قصه معبره ..تسلمين خيتو

الله يسعدها
قصة جميلة جدا مشكورة الغالية

ما شالله
الحمد لله على كل حال

الحمدالله على كل حال
وتسلمين على القصه الحلوه

مؤثرة جداً

ابكتني القصة سبحان الله الدنيا دوارة