انا مقهوره يابنات ومصدومه مب قادره اصدق اللي صار اتخيلوا انا صار لي معرسه من سنتين وكنت واايد مستانسه مع ريلي ماكان مقصر علي بشي والله أي شي اطلبه على طول اييبه لي ويعاملني احسن معامله ويسوي دايما الاشياء اللي انا اباها وغير كلام الحب اللي يقوله لي ما بنكر انه لازم كل يوم يقولي احبج واحبج ومرات يزيد ويقولي انا مرتاح لج والله لايحرمني منج .. والله من هالمعامله حتى كنت واايد واثقه فيه غير هو جدامي وايد محترم حتى انا ما افتش تلفوناته او شي الا اذا صوبه بفتح شي وبس لاني كنت واثقه فيه ثقه لابعد الحدود .. اتخيلوا قبل يومين كان توه راد من الدوام فر تلفونه وبنتي تمت ادق على الشاشه بنتي صغيره عمرها 8 شهور يعني أي شي تشوفه جدامها تضربه وتلعب فيه اقولكم ضربت عالشاشه وانفتحت محادثة اختي ترى ريلي ضايف خواتي من ايام الملجه عنده عالبلاك بيري خواتي صغار الا وحده منهم واللي هي انفتحت محادثتها هذه كبيره اشوي عمرها بالعشرينات والحين مالجه كان ضايفنهم عاساس اذا انا ما ارد عليه او شي فيسأل عني ايام الملجه طبعا وتموا عنده لين الحين .. اتخيلوا يابنات شفت اختي كاتبه له اخر شي ( توصل بالسلامه ان شاء الله ) قلت يمكن كانوا متكلمين بموضوع عادي وقالها انا الحين برجع البيت لانه كان ياي من الدوام وكتبت له جي .. طلعت السالفه مب جي .. اتخيلوا شفت اختي اللي هي اختي من دمي ولحمي اختي اللي تربيت وياها وعشت وياها طفولتي طلعت تخوني .. اتخيلوا .. شفتها مطرشه صورها له وهو كاتب لها فديت هالشفايف وخاطري امصهم وخرابيط .. والله اني من كثر ما انصدمت على طول صرخت بويهه ماقدرت اقرا واسكت قلتله انته ترمس اختي واطرشون صور لبعض وكلام وصخ امبينكم اقولكم سحب عني التلفون ومسح المحادثه عشان ما اشوف الباقي .. وسألته من متى انته اتكلمها قالي من 3 او 4 اشهر ولما سألت اختي قالت انهم يرمسون بعض من ايام ما كنت انا حامل .. تعرفون طلع من سنه ونص يرمسها وهي ترمسه وانا ماعندي أي خبر .. اتخيلوا اختي اللي هي اقرب اخت لي تخوني انا وايد ويا هالاخت ونص اسراري عندها شوفوا كيف جازتني .. كنت أي شي اشتريه حقي اشتريه لها بعد واعطيها فلوس واطرش لها رصيد رغمنه انا ما اشغتل كانت قطعه من روحي واخاف عليها وايد وفوق اني معرسه ووعندي بنت بس كنت وايد اكلمها وهي ماقدرت هالشي .. وريلي اللي ضحيت بكل شي عشانه طلع يخوني وبمنو باختي .. انا بالحمل وايد تعبت وايد وايد لدرجة محد يتصورها كنت بين الحياه والموت .. وحامي تم مستمر للشهر التاسع كله ازوع واللعاب 24 ساعه يطلع لي وكل يومين حاطين لي مغذي وشوفوا اخرتها ريلي واختي استغلوا فتره تعبي وساروا يرمسون بعض والله مب قادره اصدق انا منهاره وايد الحين من يومين اصيح ومب عارفه شو اسوي .. ما ابا اقعد عند ريلي وما ابا اسير بيت اهلي عسب ما اشوف اختي .. وين اروح ماعرف .. ماعندي حد افضفض له غيركم ريحوني الله يريحكم لاني خلاص منهاره والله مب مستوعبه اللي صار
الله يعينج ياختي
ادعي ربج يفرج همج
والله مادري شو اقولج غير الله يقويج
الزمن اكبر معالج للالام
خليها ع الله
بس انتي خليك ذكيه كيف تحافظي ع بيتك وريلك من هالاخت عديمه الانسانيه والاحساس
وتقربيا مافي وحده من مرت بالخيانه الزوجيه بس الذكيه الي تحااافظ ع بيتها وزوجها
انتي كثري من الاستغفار وحطي شروط لزوجك وان شاء الله ربي بيصلحه لك ويرد لك رد جميلا وراح يعررف قيمتك بس لا تفضحينهم واختك هذي حطي لها حدود من حديد من تعديها وخلي تعاملك معها رسمي لابعد الحدود ولا تعطينها اكثر من حجمها هي ولا شئ امامك وانتي الجبل الي ما يهزه ريح وانتي الشمس الي ما تتغطى بالكف وانتي القمر الي ما يسده ظلام الليل وانتي الورد الي الكل يغار ويعجب بجماله
وربي يكون ف عونك ويصبرك
زوجك يكلم ويراسل بنات اوكيه بس وصلت لاختك هذي قويه حبيبتي لازم تتخذي قرار صارم واذا اختك تراسله على اساس انه زوج اختها من الافضل انها ماتراسله وتقطع علاقتها نهائي فيه لانه اساس حرررررررررررررررررررررررررام واذا لزم الامر تدخل امج او احد من خواتج تلزمها وتوقفها عند حدها والافضل تغيررقمها.الله المستعان.
وغير كذا زوجك ضعيف ايمان والشيطان شاطر
وانتي تفاهمي مع زوجك انك مو مستعده تعيشي مع انسان خاين وبينكم بيبي يعني كيف راح يتربى هالطفل بين المشاكل والخيانات الزوجيه قولي له انا حابه اربي طفلي بجو نظيف بعيد عن المشاكل واذا تحملتك الحين بكره مراح اقدر اتحمل
الله يوفقك اختي ويهدي ويصلح حال رجالنا الدنيا امتلت عجايب
استغفر الله العظيم
اكثر شيء يخلي الواحد في قمة انهياره الخيانه فما بالج باختج تخونج اه واه واه
اختي سمحيلي خطأ واكبر خطأ ان يكون في تواصل خير يتواصل ويا خواتج والله ان الشيطان بالمرصاد لبني ادم ، ما اظن تنسين وﻻ اظن يكون الغفران سهل
ابدا مب سهل ،وخاصه وسمحيلي اسمي اختج افعى الي رضت تضر اختها بها الشكل
وانتي المقربه والحبيبه ، اختج هاي قلعيها خلي عﻻقج بها سطحيه واقل واحقريها
مجرد سلام واحذري تردين لها وتخبرينها شيء ،ترا يمكن من كثر ماتمدحين ريلج وتحبينه هي طمعت فيه …
وعندي نصيحه من جانب الريال ، ﻻزم تتخذين اسرع اجراء تحسسين ريلج انه سوا فيه اكبر ذنب واكبر خيانه ومستحيل يتسامح عليه ،ﻻزم تحسسينه انه بيفقدج ،خلي يحس انج غاليه ﻻ تخلين الشيء يمر بسهوله ﻻن اذا مر بدون شيء نهائي بكون عادي وبينعاد ﻻزم يحس ان مافي امل انج تردين له علشان يحس بحجم الي سواه
اختي احس بشعورج وشعور الوحده الفضيعه وان مالج حد تلجأين له
شعور هو في قمة الضياع
تعرفين فتحي القراءن وقري وقري وصيحي وتأملي كلمات رب العالمين وصلي لج كم ركعه
والله يا اختي ماشي يبرد ويريح غير هذا
ﻻن المصيبه اكبر من شكوها للبشر
والله يخفف عنج