ابا وصفات خالية من دهون او طرق طبخ اكلات صحية
لان الوالد الله يطول لي بعمره اخر فترة عنده حموضة وكل ما اكل قام يتعب وياخذ دواء حموضة
من يومين وقف ياكل معنا كل ما يلسنا نتعشا اشوفه بس ياكل فواكه او روب فقط
مقهووووورة صدق اريد اغير نظام الغذائي مابيه يتعب اكثر
ماعرف من وين ابدا
شو انقص وشو اكثر فالوجبات مرةةةة ملخبطة
هلب بلييييييييزززز
المقادير والطريقة
تسلقين المعكرونة .. وعقب ما ينزل منه الماي تحطين معاه بقدونس مفروم وعلبة ذرة وشوية ملح وليمون وزيت زيتون او بدل الزيت تحطين علبة روب وتخلطينه وبالعافية
خضار مشوية بالفرن :
كوسا وزهرة وبطاط ومشروم وبصل تقطعين الخضار وتحطينه بصينية .. هاتي طاسة حطي فيه ماي وكركم وثوم مبشور وشوية بهارات مشكلة وملح وصبي على صينية الخضار غطيه بقصدير ودخليه الفرن .. عقب نص ساعة شيلي القصدير ..لين يجف الماي ..
دجاج بالفرن:
دجاج صدور مقطعه مكعبات .. بصل مقطع .. بطاط مقطع.. ثوم مبشور .. كزبرة ..ملح وكركم .. ملعقتين زيت .. تخلطين المقادير كلها وتحطينه بصينية وتغطينه بقصدير وتدخلينه الفرن تقريبا ساعه.. واذا شفتي عليه ماي شيلي القصدير وارفعي النار لين يجف الماي
فتة :
حمص مسلوق .. روب .. بقدونس .. خبز محمص تخلطين المقادير وتقدمينه .. وبالعافيه
توست ..جبن حلوم قليل الدسم .. طماط .. تبشرين الجبن والطماط وتخلطينه مع بعض وتوزعينه على التوست وتحطينه بالشواية ..
وتقدرين تسوين ورق عنب من غير ليمون وشوية زيت زيتون
والله يخليكم الوالد ويطول بعمره ويعطيه الصحة والعافيه
كوسا محشي بس لا تحطين صلصة لان الصلصة تزيد الحموضة
واللحوم بانواعها تقدرين تسوينه بالفرن مع ملعقة زيت فقط ومن غير طماط لان الطماط المطبوخ يسبب حموضة
الحمضيات مثل البرتقال والليمون والكيوي والصلصة والزعتر والنعناع والزيت والاكلات المحمرة تزيد الحموضة
الموز يريح المعدة وبشكل عام الاكلات المسلوقة والمشوية تناسب مرضى الحموضة .. ولازم ما يترس معدته لحد الشبع ولا يخليها فاضية لفترة طويلة ..