**عشااااااااء ابــــــــــوي الغالـــــــي الصحي !!!!**

اشحالكن الغاليات
حبيت أقدملكم طبق من أطباق ابوي الصحية واللي هو عبارة
((كباب ويا خبز الرقاق ))

عندي الوالد الله يحفظه أبد ما يداني أكل المطاعم ويحاول انه يمنعنا منه بحيث إنا نسوي أكل المطاعم عندنا فالبيت وحبيت أقدملكم مثال على هالشئ وكل الاطباق المدروجة تحت طازجة 100%
وللأمانة الشغالة هي اللي سوت هالاطباق بإشراف الوالدة اكيد الله يحفظها

أولا : الكباب

طريقته : تيبن اللحم المفروم (أفضل يكون لحم طازج ومفروم بفرامة البيت او عند اللحام) واللي تعذر عندها تستخدم اللحم المفروم المجمد عقب تفورين اللحم فالماي طشه ويا شوي ثوم وملح لين ينطبخ وتشخلينه عن الماي وتخلينه ناشف مرة بدون ماي وعقب تفرمين بصلة كبيرة + بقدونس الكمية حسب الرغبة وعقب تخلطين البصل والبقدونس واللحم المفروم الناشف ويا شوي فلفل اسود وثوم وملح وملعقتين طحين وتشكلينهم مثل الصورة اللي ظاهرة فوق بشكل طولي واذا حبيتي عادي شكل كور. وعقب تحطينه فالفريزر لين يبرد ويتماسك عدل وحزة العشا اطلعينه وتحطينه فصينية فرن وتشعلين النار أول شي من تحت ومن يستوي تبدينها وتشعلينها من فوق وعقب ما يخلص تحطينها فطبق التقديم.

ثانيا: التبولة

تيبين الخضروات التالية: البقدونس والكزبرة والبصل الأخضر والطماطم والنعناع وتغسليهن عدل طبعا قبل تقطيعها طبعا التقطيع أقصد فرم يعني صغير صغير تقطعينهم وعقب تيبين البرغل المنقوع مسبقا فالماي وتنشفينه وتضفينه ويا الخضروات المفرومة وعقب تحطين عليهم شوي زيت زيتون ورشة ملح وليمون.

ثالثا : الحمص

الحمص عشان تسوينه فالبيت لازم تيبين النخي الطازج وعقب اطبخينه فالماي والأفضل تحطينه فجدر الضغط عشان ينضج بسرعة طبعا ممكن قبل جم يوم تكونين مسوية هالطريقة وتحفظينه فالفريزر فجيس الحفظ وكل ما تبين تسوين الحمص اطلعين جيس وتسوين منه بدل المعلبات ، المهم تحطين النخي فجدر الضغط ويا ملح ووشوي سمن وطبعا ماي يغطي النخي كامل وتصكرين عليه لين يستوي من شفتي الحبة نضجت وصارت لينه تري شوي لين يبرد وعقب فالخلاط الكهربائي خذي كمية من النخي المطبوخ واخلطيه فالخلاط مع شوية ماي لين يستوي مزيج الحمص وعقب ضيفي عليه الطحينية مالت الحمص ومن ينخلط حطيه فطبق التقديم ويا زيت زيتون واذا في سماق ممكن تحطينه بعد.

رابعا: خبز رقاق (خبز رخال)

طبعا خبز خليجي معروف وخاصة فسلطنة عمان ودولة الامارات ومحد يعرفله غير اللي يسويه من قبل لأن شوي طريقته صعبة أثناء الخبز سألوا امهاتكم خخخخخخخ لكن العجينه مالته سهلة أظن طحين وماي وشوي ملح ولازم تكون العجينة لزجة او سو سيرش فجوجل واتبعوا الخطوات الخبز. بس لا تحترقون فالطوبج.

خامسا : البطاطا المقلية

اذا تحبين يبي بطاطس طازجة وقطعيها بشكل طولي بس ما تكون رقيقة وايد ولا تكون سميكة وسط وفي الات خاصة تقطعلج البطاطا بأحجام متساوية وعقب تبهرينا شوي بملح وشوب بهارات وكركم وتقلينها فالزيت أو فالة تقلية الشيبس .

وسادسا : العشاء الصحي المنزلي أفضل من المعلبات وعشا المطاعم (نصيحة البابا)

وهني وعااااااااااااااافية ع قلوبكم

صج صحي بالعافية

ومشكورة عالموضوع

تسلم ايد الوالده وباعافيه عليكم
والله يالغلا صدقه ابوج الاكل تسوينه فالبيت نظيف 100%
ماتعرفين بالمطاعم جيف يطبخونه
وهل الطباخ يوم يسوي الاكل ما يمسك مكان وصخ او يحك نفسه مثلا هههه
عموما يعطيج العافيه غناتي

يم يم ماحب اللحم بس شكل الاكل حلو والله يحفظ الوالد صدق في كلامه
محرومة من التبولة بسبة الحموضة اهئ
وخبز ارقاق عاد ابصوب

والله حلاة اكل البيت غير
تسلمين حبيبتي و سلمي ع الوالد و الوالدة

اشكركن خواتي عالمرور وعالردود الطيبة << واتمنى تجربونه