صالونة الدجاج

نبدا بالمقادير :

1- بصل (2 صغار او وحده كبيره مقطه شرايح)
2- حبة بطاط كبيره مقطعه مربعات كبار
3- طماطم (1 كبيره مقطعه شرايح)
4- 1 فلفل حار بس قاصين الراس (واذا تحبون الحار وايد زيدوا)
5- 3 فصوص ثوم مهروس
6- كزبره
7- باميا
8-كوسة
9- فاصوليا خضراء (انا ماكان متوفر عندي)

البهارات اللي راح نحتاجها :
1- ملعقة صغيره بزار مشكل (بهارات)
2- نص ملعقه صغيره كركم
3- 1 ملعقه صغيره ملح
4- 2 ملعقة كبيره صلصة طماط

الطريقه :

-نحط البصل مع الثوم المهروس ونقلبه على النار لين مايتغير لون البصل ويصفر شوي ..
-نحط الدجاج معاهم ونقلب لين ماتتغير لون الدجاجه ..وبعدين نحط الفلفل والبطاط…ونقلب شوي ونغطيه لمدة 3 دقايق تقريبا على نار متوسطه

-الحين نحط باقي الاضافات(طماط كوسه والفاصوليا) نقلب المقادير مع بعض ع نار قوية

-نضيف البهارات وصلصة الطماط

وبيكون الشكل جي

– نصب ماي عليها ( حار اذا كنتي مستعيله) وكمية الماي لازم تغطي المقادير كلها والديايه ونغطي عليه ونخليه على نار متوسطه تقريبا لمدة نص ساعه.

-واخيرا ندخل عود اسنان في البطاط اذا حسيناه دش بكل سهولة يعني خلاص تقريبا خلصنا ..
– الحين نضيف الباميا والكزبره ونخليها لمدة 5 دقايق بس

وهذا هو الشكل النهائي…طبعا انا سويتها مع عيش ابيض …ممكن تستخدمون المرق للثريد او المرقوقه لانه فعلا لذييييييذه

وهالصحن للمتذوقون الصغار اللي هم عيالي
والله صدق اذا عيبهم الاكل اعرف انه فعلا حلو

بضرابه خلوني اصور ..كل شوي صبعهم طالع في الصوره