حلى أيسكريم الشعيرية بالصور >> ادخلوا ما بتندمون

شحالكم خواتي عضوات المنتدى عساكم بخير ومرتاحين

أكيد بتقولون فخاطركم هاي مب مصدقة عمرها كل يومين منزلة أكله >>> خخخ

شو أسوي أنا أموت عشي اسمه طباخ وفخاطري كل الناس ياكلون من أكلي

أحب أفيد وأستفيد وأييب اليديد >>> شعر صح خخخ

الموهيم ،، يبت لكم اليوم حلى روووعــــة عن تجربة ماخذتنه من منتدى من فترة
وجربته وطلع شي شي مو أي شي ،، ودوم أي وحدة تذوقه تقولي أبا الطريقة
وخاصة الرياييل يموتون عليه >> إغراء للمتزوجات

عاد أنا ما عندي غير هالمنتدى ومن أسبوع طايحة تصوير كل يوم أكلة
والأهل يضحكون علي >> أستوديو مب مطبخ خخخ

وايد سولفت صح
الحين أخليكم مع السويت أتمنى ينال إعجابكم..

حلى أيسكريم الشعيرية

المقادير:
1 كيس شعيرية باكستانية
ربع زبدة صغيرة
عدد 2 كريم كراميل
1 بسكوت شاي

خلطة الوجه:
2 كيس دريم ويب
1قشطة
ثلاث حبات جبن كيري
3 ملاعق حليب بودرة
حليب مركز محلى الصغير (أنا استخدمت الكبير تقريبا ربعه أو أكثر شوي حسب الذوق)
ربع كوب حليب سائل

الطريقة:
نحمس الشعيرية بالزبدة حتى يصير لونها ذهبي ونضعها في الصينية

نسوي الكريم كراميل كما هو موضح فئ الكرتون

ونصبه على الشعيرية وهو حار

نرص البسكويت على الشعيرية ونشربه بقليل جداً من الحليب السائل

نسوى خلطة الوجه في الخلاط

ونصبها على الوجه

نزينها بأى نوع من الشوكولاته (أنا زينته بالعسل اللي يكون ويا الكريم كراميل وعدلته بالشوكة)

نخليها تبرد في الثلاجة لين تجمد طبقة الكريمة وعقب تكون جاهزة للتقديم

اسمحولي الصور شوي مب واضحة لأنه تصوير تلفون
وإذا عندكم أي استفسار لا تترددون نحن حاضرين للطيبين ^^

هني وعافية عقلوبكم