مـــحتارة ::: بعد الولادة كيف بنظم وقتي مع عيالي :: بلييز هلب

هلا خواتي

مســاكم الله بالخير

فديتكم انا ألحين في التاسع و موعد ولادتي تاريخ 3 7

ألحين نيي للمهم … أنا الحمدلله عندي بنتين الكبيرة عمرها 3 سنوات و الصغيرة عمرها سنة و 7 شهور

يعني عيالي صغاااار ,,, وداااايماااا أفكر كيف بقدر أنظم وقتي وياهم من بعد مااا أربي … أحس وااااايد صعبة

أنااا عندي خدامة بس الخدامة هبابها بشغل البيت و التنظيف و الغسيل و هالسوالف… أناا ساكنة في بيت بروحي

تعرفون وااايد أحااتي رقادهم وكيف أقدر أرقدهم ,,,, والبيبي أول ما ينولد تعرفون كيف رضاعته

أحس واااااااااايد بضغط

ألحين اللي أباه منكم فديتكم,, تعطوني نصايح كيف بنسق وقتي وياهم

وإذا فيه شي أقدر أشتريه مفيد لليهال عسب يخفف الضغط عليه شوي

مثلا أنا شايفه في بيبي شوب شرات الكرسي يشتغل بالكهربا هزاز و فيه موسيقى ع ألف وشي

تحسونه بينفع وإلا لا؟؟؟ خاصة للبيبي

بليييز بليييز تفاعلوااا وياي و عطوني من خبراتكم

دمتم بود

أم سارة

للرفع

والله انا بروحي اعاني عندي بس بنت وحده عمرها سنه وشهرين ويوم اربي بيكون عمرها سنه واربع شهور واحس اني ضالمتنها واايد وحاسه بذنب ومب عارفه شو اسوي ان شالله البنات يفيدوج ويفيدوني

هلا حبوبة،، انا أختي كانت مثلج،، الله يحفظ عيالج و عيالها،،
بس قدرت الحمدلله تنظم،،
بالنسبة للكرسي اللي يهز،، أحس ينفع،، بدل ما اتمين 15 دقيقة تحاولين ترقدين البيبي،،
خلي النونو على الكرسي الهزاز وانتِ يلسي ويا الصغارية … تعب ولكن ما باليد حيلة حبوبة،،
أنا اختي كانت تسير عند الوالدة عشان تخفف الضغط اللي عليها

ان شاء الله تربين بالسلامة

واول شيء واهم شيء بعد الولادة انج تمنعين هههههههههه الله يحفظ لج عيالج مساكين صغار وجذا ما بياخذوون حقهم حراام

المهم

بما انج في بيت بروووحج لازم يكون عندج غرفة للاطفال للرقاد بس خاصة يعني سرير للكبيرة عادي واللي عمرها سنة شيء في بيبي شوب سرير بحواجز وواطي تروم تنزل وتصعد او حطيلها دوووشك

ليش طريت مكان رقادهم ان مهم اذا وحدة منهم رقدت ما تنشش الثانية خخخخخخخخ

زغرفة ثانية او صاله للالعاب حطي زحلاقة صغيرة وتلفزيون ومريحانة بلاستك ولعبة الميزان اترسيها لعوووووب

عسب يوم تيلسين ترضعين البيبي ما يزعجووونج وحطي لج كرسي الرضاعة يبيعونها في بيبي شوب او غنفة مريحة

لان انتي بتتعبين ما شاء الله 3 صغار يوم يلعبون تروووومين تنسدحين على الغنفة وتطالعينهم

ني للجدول :

الصبح يوم تنشين نششيهم من وقت وياج يتريقون ويلعبون اي شيء واذا يبغون يرقدووون اوكية بس ينشون قبل 3 الظهر عسب يرقدووون فليل من وقت لان اذا رقدوووا بعد 3 مستحيل يرقدووون من وقت بيتعبوونج

والعصر سويلهم وجبة ولعبيهم والبيبي اول شهرين يرقد ومب مال لعب

الساعة 8 حاولي ترقدينهم بعد ما تعشينهم عسب تفضين حق عمرج وريلج بعد على الاقل ساعتين بدووون صدعة وحشرة الصغارية يرزووون

وحطي في بالج مب بس راحتهم لازم انتي تفكرين في راحتج لان اذا انتي ما ارتحتي مستحيل بيرتاحووون

الله يوفقج ان شاء الله ويسهل عليج

والسموحة جان تفلسفت شوي

الله يعينا بس

مشكورة الغلا

شورج أخذ الكرسي؟ أحس وااايد بينفعني

والله ياريت عندي حد يخفف عني الضغط