~ قصتي ويا الحمل ~

امم بكتبلكم سالفتي ويا الحمل واللي ما الها بارض تقرا قبل لا تظغط ع الX ترفعلي موضوعي بدعوة حلوة بظهر الغيب لاني واآاآاآيد محتاجه دعائكم

آخر دوره لي كانت تاريخ 12_2_2017 حلو ,,
تاريخ 11_3 سرت عياده خاصه عسب اسوي فحوصات عاديه عسب اطمن اذا في شي يمنع الحمل وما كنت حاطه فبالي شي

سوتلي سونار مهبلي وطلع انه فيني قرحه قويه وراوتني اياها ,, المنطقة صدق ملتهبة من الخاطر وقالتلي انه هالقرحه تجتل ( تقتل ) الحيوانات المنويه قبل لاتوصل للرحم وللبويضه ..

وعقب سوتلي سونار عادي وقلتلي كل شي تمام الرحم والمبايض ,, الحمدلله في شي اوكي ,, ويوم شافت الكلى قالت هاي كلية واحد عمره عشر سنين ,, مادري ليش يمكن لانه صغيرة خخ ,,

وسوتلي تحليل بو. وسالتني اذا الدورة منتظمه قلتلها تشرف تاريخ 12 أو 14 أو 17 يعني تختلف فترتها أحيانا 28 وأحيانا 30 وجيه قالتلي اذا محصورة بين هالايام معناتها منتظمه ,, وانا أحس لأ مادري والله كيف عدتها منتظمه ,,

الموهيم دخلت عندها عقب التحليل وقالتي مافي شي !! وعطتني موعد ع أساس أول ما تخلص الدوره أسيرلها أسوي كوي للقرحه ,, ووصفتلي مضادات وتحاميل وحبوب ..

الأخت تريت اليوم الثاني عسب تنزل الدوره بس ما نزلت ,, وسرت العب كرة ويا الشباب الصغار خخ الأخت حاطه فبطنها بطيخه صيفي ,, هع ,, اوني الا انزلها ,,

ومرت الأيام وماشفنا شي ,, وقلت يمكن اتاخرت بسبة الأدويه اللي أخذها ,,

وعقبها قمت أحس بألم فبطني تحت شرات ألم الدورة وأكثر بعد ,, والله انش فالليل ولا الصبح ما أرقد من الويع ,, وأحيانا أحس انه شي ينزل بس يوم أجيك مافي شي !!

وعلامات الدورة مبينه فيني ,,

وعقب 10 أيام قلت شو السالفه ؟ يعني اوكي اذا الدورة ما نزلت بسبة الادويه شسالفة الويع اللي فبطني ,, وهوب ع نفس العياده ,,

أول ما دخلت استلمتني النيرس اونه يلا ماما في سوي كوي ,, حظراتهم قاريين الفايل مالي ع اساس اني يايه الموعد خخ ,, قلتلها لا انا ابا اشوف الدكتورة ,,

دخلت عند الدكتورة شفت ملفي عندها وقالت ها خلصت الدورة قلتلها أساسا ما شرفت ! قالت والله انشالله حامل ما فحصتي قلتلها لأ ,, وسوتلي سونار بس ما شافت شي لا كيس ولا شي

قلتلها انزين وبطني والويع اللي اييني ,, قالت بنسوي تحليل بو. عسب نتاكد من الاثنين ,,

وطلعت النتيجه وزقروني وسرت شفت النتيجه ع المكتب بس الدكتورة بعدها ما يت ,, عاد الفضول خخ ,, قريت ع الورقه مكتوب Pregnant test = positive والله هاييج الساعه من الزيغه نسيت شو يعني positive & Negative والله ارتبكت وما عرفت شو السالفه ,, يت الدكتورة وقالت مبروك حااامل أنا من الصدمه والله ويلست احلفها انه صدق خخخ ,, حسيت عمري هبله خخ ,,

بس كملت الدكتورة كلامها وقالت : سبب الالم هو التهاب قوي فالبو… قالت 500 والله ما عرف من وين يابته هالرقم !! وقالت هالالتهاب عادي يطيح الجنين ,, وكتبتلي ( فوليك أسيد و دفاستون ) وقالت اشربي فاليوم 3 لتر ماي ,,
وعطتني موعد عقب أسبوعين عسب اتشوف اذا طلع الكيس ولا لأ وقالتلي انه ع الأكيد انه حمل متأخر !

بس أنا ما سرت الموعد اونه مب زين السونار واايد ,, بس والله من ميته من الزيغه ,,

الموهيييم تاريخ 13_4 سرت مستشفى حكومي طبعا لازم المذله والله اني سايرة الساعه 6:30 المغرب ودخلت ع الساعه 11 لا وبعد الدكتورة سارت ويت المناوبه الثانيه وماشي غيرهم يعني اي حد بيربي يهدونا ويسرون !! والله انذلينا من كثر ما نتريا ,, ويوم دشيت تبا تخلصج بسرعه ,, قلتلها السالفه وسرت اسوي السونار بين الكيس وفيه الجنين ,, بس يا فرحة ما تمت قالتلي انها ما تشوف نبض فالجنين وانا اقوللها يمكن لانه حمل متاخر قالت يمكن والله يا بنات بدال ما هي تريحني انا اللي اخفف على عمري ,, وقالتلي تعالي عقب أسبوعين بنشوف ,,

وللحين اتريا وما أعرف شو السالفه هذا اول حمل لي وما عندي فكرة ما اعرف شو السالفه وشو اسوي ولا متى أسير وهل هالشي طبيعي للحمل المتاخر ؟!

للعلم انه حسابي بيطلع غلط ع حساب الدورة لانه الحمل متاخر !! يعني تفرق أسبوعين ولا ؟!