حبيت اكتب لكم تجربتي عشان الكل يتعض منها وفنفس الوقت يمكن غيري يستفيد من تجربتي..والله يبعد عنكم كل شر يارب العالمين..
قبل فترة بسيطه كنت محلله ولله الحمد طلعت حامل..وعلى طول قلت براجع احسن لان قصص حملي اللي فاتت كلها كانت صعبه يعني عيالي يتموت ل6و8شهور فبطني ويموتون..
لكن هالمره بصراحه كانت اخس تجربه مريت فيها..لان نفسيتي تعبت وايد وايد..واللهم لك الحمد لولا رحمة رب العالمين جان الله يعلم شو كان حالي..
المهم عقب ماحللت..رحت لدكتورة معروفه فبوظبي اكيد الاغلب يعرفها بس من غير ما اذكر اسماء…الله يسامحها..فحصت عليه دم عشان اتشوف نسبة الحمل..وسوتلي فحص بالسونار وقالتلي الحمل صغير ومايبين الحين تعالي لي عقب اسبوعين!!
انا فنفس الفترة كنت مداومه ع اذكار الصبح الحمدلله واقرا آيات الرقيه وسورة البقرة يوميا ولله الحمد..
فجأة حسيت بالم وايد قوي فجهة اليسار وماكنت اقدر امشي وايلس وكنت فالجامعه والحمدلله ان 2من ربيعاتي وياي يزاهن الله خير ماقصرو على طول راحو زقرو نيرس الجامعه وخذتني..اتصلت فريلي بسرعه وخبرته..وياني خذاني وعلى طول رحت الكورنيش..
دخلت الطواري والدكتورة حولتني تصوير..يوم حولتني تصوير اتفاجأت ان هرمون الحمل وايد مرتفع واصل 6000و200وشي..بس ماشي كيس حمل داخل الرحم!!
طلع كيس الحمل خارج الرحم ولسوء الحظ انه فالانبوب..والحمدلله اني اتلاحقت على عمري وبسرعه سرت المستشفى ولا الله يعلم شو صار فيني..كان فاي لحظة بينفجر الانبوب وبيسببلي اشياء ثانية بعد..الدكتوره قالتلي لاتظهرين من المستشفى خلج فالمستشفى لين يشوفج الاستشاري ويقرر شو يسوي..
طبعا ماطلعوني وايد خوفوني ان الحمل فاي لحظه بيفجر لي الانبوب..حولوني ع الاستشاري اليوم الثاني وقالي بسرعه لازم عملية..وللاسف بنضطر انشل الانبوب مع الحمل!!! 
وايد تعبت نفسيا وقمت اصيح وحالتي لله..قلت له مافي حل ثاني..؟!!قالي للاسف ماشي قالي اذا تبغين شي ابرة فيها كيماوي واتفتت الحمل داخل الانبوب بس نجاحها 50بالميه وممكن تنجح وممكن لا ولازم اقعد فترة طويله فالمستشفى عشان الكيماوي ممكن يضر الجبد ولا فالقلب..واذا مانجحت نفس الشي بيشقون بطني وبيظهرون الانبوب وبيستوي الموضوع اصعب..قالي احسن اتشلين الانبوب وتريحين نفسج من الصدعه..لان ماشي حل غير جي..وبتتمين ع انبوب واحد واذا بغيتي تحملين بنسويلج انابيب..وايد تعبت نفسيا من الكلام هذا..
قلت له ابغي استشارة ثانيه..قالي عندج استشاريتين من هالاستشاريتين اخترت دكتورة غاوري لانها كانت تشرف على حملي اللي طاف وسوتلي عملية الربط ووايد كنت ارتاحلها..واخترتها هي..وعقب مايتني مازادت على كلام الدكتور قالتلي ماشي حل غير انج اتشلين الانبوب..واذا ماحملتي طبيعي لسنه سوي انابيب..اترييت امي واختي لين ايون لانهم مب من امارة بوظبي..وبصراحه ماقدرت اقرر قبل لآخذ شورهم..الويع قام يزيد علي..وقالتلي الدكتورة فكري بعطيج مجال لكن لاتتأخرين لان هالشي بيصعب علينا اكثر..
يت امي واختي والدكتورة قنعتهم فموضوع انهم يشلون لي الانبوب..فديتها امي قامت اتصيح..يتني اتقولي امي شلي الانبوب ولا انج تاخذين كيماوي وتضرين نفسج..وانا كنت مقتنعه فالابرة لكن فنفس الوقت كنت خايفه منها..
المهم قام يزيد عليه الويع وماتحملت زقرولي الاستشارية غاوري قالتلي ماوصلتي لحل..؟!!ريلي قالي اتوكلي على الله ربج كريم وبيلطف فينا ان شاء الله سويها..واختي وامي بعد قالولي سويها..وقعت ع الورقه ودخلوني عمليات ع اساس بيستأصلون لي الانبوب..
يلست اقرا سورة البقرة ختمتها المره الاولى وكنت اقراها للمره الثانيه وصليت جمع وقصر الظهر والعصر وتوكلت على الله وخذوني للعمليات ودموعي فعيني ..سوولي منظار شقولي جهة المين واليسار وتحت السرة..
طلعت من العمليات وحالتي النفسية متدهورة انش اصيح وارقد انش اصيح وارقد وها حالي طول ما انا مخدره..ابغي افتح عيني مب رايمه من قوة التخدير اللي عاطيني اياه..احيانا احس باللي حواليني واحيانا لا…
المهم خذوني الغرفة وخلاص كنت حاطه فبالي انهم شلو الانبوب..وويع الجرح كان وايد يعورني..يوم نشيت امي فديتها واقفه على راسي..اتقولي امي الحمدلله رب العالمين رحمج..الدكتورة اتقول ما اضطرت اتشل الانبوب..والله حسيت الدنيا لفت فيني بس كان فخاطري انش اسجد لرب العالمين واشكره على نعمته..اللهم لك الحمد يارب..
دخلت عليه الدكتورة بعد اتطمنني قالتلي سبحان الله مثل المعجزة صارت..الدكتورة شلت كيس الحمل من غير ماتنجبر اتشل الانبوب ونضفت مكانه والحمدلله رب العالمين ماشلته..وايد فرحت الحمدلله..الحمل يتعوض بس اهم شي صحتي انا..
اللهم لك الحمد فضل سورة البقرة وايد وايد كبير..والله العظيم ان سورة البقرة كانت اتريحني لما اقراها..فالبداية استصعبت الموضوع وانا اقرا بس الحمدلله بعدين سهل علي الموضوع قمت اختمها يوميا..الحمدلله فهذاك الوقت مانسيت ان رب العالمين رحيم وبيلطف فيني..ورب العالمين استجاب دعوتي ودعوة امي المسكينه اللي طول الوقت يالسه تقرالي قرآن وتصلي ودموعها فعينها..
سبحان الله العظيم..معجزة رب العالمين..واتقولي الدكتورة نادر ماتيينا حالات جي ومانضطر انشل الانبوب..مع ان كان حملي 6اسابيع و4ايام..يعني الحمل بادي يبين..بس الحمدلله يارب قدرة رب العالمين فوق كل شي..
بعدين فضل الاستشارية غاوري والله انها شاطرة وحبوبه ورحومه..مسكينه طول الوقت ماسكه ايدي واتهديني واتريحني بكلامها..ويوم طلعت من العمليات مسكينه تضحك مستانسه رايحه اتبشر امي وريلي انها ماشلت الانبوب..واذكر فحملي اللي فات بعد لما طلبتها فغرفة الولاده يتني وماسكه ايدي اتهديني وقامت اتصيح معاي والله فعمري ماشفت دكتورة مثل قلبها الطيب..والحمدلله رب العالمين سخرها لي..اللهم لك الحمد والشكر..
وهذي هي قصتي ان شاء الله تستفيدون من تجربتي..سبحان الله سورة البقرة ثم سورة البقرة..والله العظيم شفت بعيني شو استوى معاي…وحتى عقب ماخلصت من العملية مسكت مبايلي وعلى طول قمت اقراها..لاتودرونها سبحان الله شفاء لكل مسحور شفاء للعين ولكل شي..
اللي رب العالمين مب رازقنها خالتداوم عليها باذن الله بتحمل..واللي رب العالمين مايكتب ويتم حملها تقراها بنية ان الله يثبته لها..واسمحولي ع الاطاله..مابغي منكم غير انكم تدعون لي الله يعوضني عن كل شي فقدته..ويارب لكم بالمثل..
ربي اخترلي ولاتخيرني فان الخيرة فيما اخترته لي..
بأذن الله راح تيبيين عيال حلوين قريب اصبري ربنا يرزق من يشاء بغير حساب
الله يعوضج يارب يارب خير ويسخرلج ريلج