انا اعانى من ارتفاع سكر الحمل … وللاسف مريت على اخصائية التغذية مب موجوده
ما عندى اي معلومات عنه غير الى موجوده بالنت
فيا ريت الى عندها اي معلومة او نصيحة او حمية للسكرى من مستشفى خاص او حكومى بالامارات ما تبخل علينا وفي ميزان حسناتها
انا الحين حامل فالشهر التاسع وفيني سكري الحمل
كل انواع الحلويات والنشويات ممنوع
ماتاكلين شي فيه سكر او شي مطبوخ بالزيت
انا اراجع في مستشفى دبي ونفسج مادخلت عند دكتوره التغذيه غير مره لانها دوم مشغوله
عشان جي سوو نظام في كل موعد لي مع دكتوره النساء والولاده قبلها تشوفني وحده وتشوف قراآتي عشان جي لازم يكون عندج جهاز فحص السكر وهم بيعطونج دفتر بيقولولج اكتبي كم الارقام اللي تطلعلج اول مره عالريق وعقب الفطور بساعتين وعقب الغدا بساعتين وعقب العشا بساعتين
لازم الارقام ماتتعدى 120 وعالريق ماتتعدى 100
وعن الاكل لازم تاكلين كل شي قليل الدسم و اسمر
الفطور: 2 توست اسمر مع جبن سليس قليل الدسم او لبنه قليله الدسم مع 1 فاكهه وعصير فرش بدون سكر او حليب قليل الدسم او كورنفلكس مع سكر الدايت وماتكثرين منه
الغدى: ملعقين عيش يكونون اوكيه مب تترسينهم و صحن سلطه بدون زيت زيتون ولاصوص ولامايونيز بس ليمون وملح مع روب قليل الدسم مع 90 جرام من الدياي او اللحم او السمك بس يكون يا فالفرن او تفورينه بالماي او معكرونه نفس كميه العيش او عدس او بازلاء مع خبز اسمر حبه ونص من الخبز الصغير مب العود
العشا: نفس الغدى او تشربين شوربات
اهم شي انج تاكلين بإعتدال
انا بصراحه اكل من كل شي بس باعتدال وعقبها امشي واحرقه عسب السكر مايكون مرتفع
واذا يعتي بين الوجبات خذيلج حبه وحده بس بسكويت دايجستف مع شاي او قهوه بسكر الدايت او 2 بسكويت مملح
وقبل النوم تاكلين حبه بسكويت دايجستف مع حليب قليل الدسم عسب ماتيوعين
انا هذا النظام اللي عطوني اياه فالمستشفى
واتمنى اكون افدتج
ما قصرت شوق قَلبـ♡ــيے.. كفت ووفت يزاها الله خير
أنا مريت بسكري الحمل والسكر اعتدل لما انتظمت على الحمية الغذائية
مثل ما قالت شوق لازم يكون عندج جهاز فحص السكر
وحاولي تمشي من ربع الى ثلث ساعة بعد كل وجبة عشان تحرقي السكر( أنا كنت أمشي في الغرفة)
واذا ما حصاتيها في اخصائيات في كل مركز صحي ممكن يفيدونك ولازم تكون متابعتك قريبة من بعض حتي يتعدل السكري عندك يعني راح تشوفين الدكتورة في اوقات متقاربة فتقدرين تسالين عن اي شي واحسن للك تتطلعين علي الموضوع نظريا وجوجل ما يقصر وبعدين كل زيارة تجهزين اسئلة لطبيبتك واسئلي ولا تنحرجين والطبيبة ما راح تقصر واذا بغيتي اي معلومة انا ما راح اقصر معاك
الله يوفقك وحتي اذا ما حصلتي مواقع تعطيك المعلومة كلميني علي الخاص بتطرشللك مواقع حلوة تفيدك