بنات انا هالمرة بعد الولادة بإذن الله قررت اقعد بشقتي بس للاسف ماعندي اهلي بعيدين بامارة ثانية والخدامة اللي عندي عافانا الله بتكمل معي ثمان شهور ولا تعرف تسوي شي بدون ما اقولها واشرحلها سواء من غسيل او تنظيف طبعا الطبخ انا اطبخ بس هي تحضر وتقطع وعندي بنت ما متقبلتنها للحين لانها هي بروحها ما تبغي تسويلها اي شي انا ااكلها وابدل واوديها الحمام او ابوها بس هي ييب هذا ونظفي هذا ما لها خص ابدا ولا تحاول تتقرب من البنت كله تصارخ منها وانا واااايد احاتي كيف بقدر اهتم بنفسي وفالبيبي ومنو بيساعدني عليه والطبخ منو بيطبخلي ولريلي ولازم اكل اكل صحي واشرب مشروبات دافيه يعني اول الايام بكون تعبانه ولازم ارتاح ما بقدر اوقف فالمطبخ او اصبح اسوي ريوق وغيره حتا افكر اذا فيه حد يقدر يوفرلي اكلات انا اعرف الحريروه ممكن اطلبها من بيت الشاي بس شو اكلاتكم للريوق وللغدا وللعشا وشو تشربون اشيا ما تاثر على البيبي وتسويله غازات وهل شرب الماي بكمية يساعد وابغي اشيا ما تنفخ
جوفي كلميها قوليلها انا احينا بربي اباج تهتمين جدام عيوني بالبنيه
و ع الاكل وجي احس صعبه شويه
انزين ليش ما تروحين عند اهل ريلج هالفتره اذا بيت امج بعيد
و اذا ماشي مجال روحي عند امج بس 20 يوم لين ما تنفك الخياطه وترومين شويه تتحركين
لان واااايد صعب جي سراحه بتتعبين
واهم شي راحتج اول فتره عقب بترومين شويه
بس 20 يوم ريحي و الله كريم على الباجي
الريوق خفايف والغدا من المطاعم والعشا سلطات وبالفرن مشوي
من اربي ما احب انسدح اتمشى في المستشفى واسير ورا النيرس اشوفها لما تسبح الياهل والحريم من يزوروني اوجبهم
كوني خفيفه تحركي لكن بشوي شوي والياهله اكيد تعرف تاكل و تغسل ايدها وتروح الحمام و انتي بتغسلينها
احسلج تروحي 20 او 15 يوم بيت اهلج لانج بتكونين تعبانه من الولاده
مادري كم عمر بنتج
اذا مصرة تقعدين بيتج شوفي من الحين حضانة نظيفة وفيها كاميرات عدال بيتج
حطي بنتج في الحضانة بترتاحين نهار كامل
بس من الحين وديها،، لأن أول اسبوع تخلينها بس ساعتين وتاخذينها
و حاولي توقظينها من النوم بدري على 6:00 الصبح عشان تنام من وقت من المغرب وترتاحين وتتفيجين حق عمرج و زوجج.. بس عوديها من الحين لأن يباله حوالي اسبوعين لين تتعود على روتين النوم اليديد
هذا بالنسبة لبنتج
بالنسبة لنفسج
من الحين تشري حق النفاس وحق بعد النفاس
انا خذت الماسكات اللي في ظرف كمن نوع و بكمية.. كل يومين ثلاث سويت سكرب وماسك
ضروري المشد في الاربعين وزبدة الشيا المخلوطة مع الزيوت جهزيها من الحين او اشتري جاهز
ملابس وشباشب يديدة وطقم فوط و شراشف يديدة جهزي عمرج من الحين كأنج توج عروس
حتى الماكياج اعقه واشتري كل شي يديد
اهم شي في جمالج لب جلوس ملون وشعر ممشط وشوية ماسكرا "جمال طبيعي" رشة عطر ريحتة هادية
البيت
من الحين اللي ماعندها خدامة تتفق مع مكانب اللي بالساعة على الاقل عقد شهر
واذا عندج خدامة عطيها ورقة كبيرة وقلم وسوي لها جدول او طبعيه فيه باليوم والساعة شو تسوي ماتعرف لا عربي ولا انجليزي عطيها القلم وخليها تعبي الجدول تحت اشرافج وعلقي الورقة بعد ماتنسخينها في المطبخ "نسخة احتفظي بها اذا قالت لج ضاع الجدول!!!…
جهزي في المطبخ الاشياء اللي بتحتاجينها وماتخترب في التخزين مثل العيش والمعكرونة والمكسرات والفواكه المجففة…. أما الفريش فعلمي زوجج من الحين اذا ما يعرف كيف يتسوق حق الخضرة والفواكه والبيض والحليب ومشتقاته
الحمدلله.. اي خدمة بتحتاجينها دوري عليها في النت التاجرات والمحلات يوصلون لج لين البيت
انا في حملي اعتبر نفسي عروس و مسافرة واتشرى على هذا الأساس
ممكن تتفقين معاهم من الحين حق شهر واحد تكونين انتي تعافيتي في هذي الفترة
واذا حابة طبخج
سووي كميات وخزنيهم في الثلاجة حق يومين في علب التخزين
مثلاً السلطة غسلي ونشفي الخضرة وقطعيهم وقسميها و وزعيها في العلب… بعد ماتقطعينها لاتحطين عليها تتبيلة " لا ملح و لا زيت ولا خل ولا ليمون" عشان ماتسوي ماي وتخترب بسرعة
بس وقت التقديم حطي عليها التتبيلة
بتشترين دياي فريش او لحم قطعيه من الحين ولفي كل قطعة بروحها بورق النايلون الشفاف وحطيهم في الفريزر.. اللحم تجهزينه من الحين مكعبات بعظم او لحم مفروم او لحم مكعبات من دون عظم والكمية اللي تنلف تكفي وجبة وحدة
وقت تحتاجين تاخذين اللي تبينه وتحطينه في ماي وملح عشر دقايق يذوب كل الثلج غسليه وطبخي
اي شي بتحتفظين فيه في الثلاجة غسليه الأول بماي وملح وعقب بماي بارد ونشفي ولفيه بنايلون وحطيه في الثلاجة… وقت الطبخ نظيف وجاهز بس تقطيع
الصراحة أول أسبوع لازم ابد ماتشتغلين صحتج اهم من اي شي ثاني
رتبي من الحين والله يوفقج و يقومج بالسلامة