إرادتي سر رشاقتي >> يوميات

شو أخبارهم الرشوقاات ؟؟

قررت بعد ما وصلت لمرحلة اليأس إني أفتح يوميات اهني وأتمنى اني ألقى منكم تشجييع عشان أوصل للوزن المثالي ..

انا لي تجارب سابقه في الرجيم ،، أول تجربة ناجحة كانت من 8 سنوات تقريبا ،، كنت وقتها على مقاعد الكلية .. وبديت رجيم بإرادة الكل حسدني عليها ،، ونزلت 20 كيلو فمدة طويلة نسبيا (( سنة تقريبا )) لكن كانت من أحلى الفترات في حياتي ،، وأنا أشوف وزني ينقص شوي شوي .. وأنا أسمع اطراءات الناس اللي عمري ما سمعتها ،، وأنا أشوف ثيابي وسعت وأخذ مقاس أصغر .. وأنا أسمع للمرة الأولى فحياتي بسج من الرجيم خلاص انقرضتي ..

لكن للاسف أنا جسمي من النوع الي بسرعة يمتن على أقل شي ،، عقب ما وقفت الرجيم شوي ومع اني ما رديت للاكل بفجاعه بس ومع الاسف الشديد رجعت زدت 10 كيلو ففترة بسيطة .. الشي الحلو اني ففترة رجيمي كنت مستمره ع المشي يوميااا ،، وهالشي خلاني حتى مع هالعشر كيلوات اللي زدتها بعده جسمي حلو الحمدلله ..

عرست وحملت وبعد اول ولادة ما زاد وزني وايد وايد ،، بس طبعا الجسم يعتفس عفيسه ،، مارمت اسوي رجيم بروحي فلجأت لاخصائي التغذيه ،، وخلال فترة قصيرة وصلت لوزني المثالي ،، ولكني اهملت اهم مرحله وياه وهي مرحلة التثبيت ،، فرجعت زدت ،، ورديتله بعد كم شهر ووصلت لوزني المثالي مره ثانيه ،، وبعد اهملت التثبيت ورجعت زدت مرة ثانيه ،،

هذا قدري وهذا نصيبي ،، مقتنعه اني ما بتم ضعيفه الا بالرجيم ومن اوقف رجيم يبدا وزني يزيد شيئا فشيئا مع اني مثل ما قلتلكم ما أرد للأكل بفجاعة واكل الاخضر واليابس واركز ع الاشيا الدسمه ،، يكون اكلي معتدل وعادي لكن هذا جسمي وهذي طبيعته ..

المهم بعد ولادتي الثانيه زاد وزني وايد ،، لاني حملت ع وزن زايد ،، قدرت انزل نزول حلو ولكني فجأة كرهت الرجيم وفقدت كل ارادتي مره وحده ،، كل ما حاولت اسوي اتم لين الظهر وعقبها اخبص ،، ما كملت يوم واحد بدون تخبيص .. تعبت من هالحاله خاصه ويا جسمي اللي يمتن بسرعه ،، وخايفه اني اوصل لمرحله البداانه المفرطة وانا مادري ..

فقررت ابدا يوميااتي عشان احس ان في حد وياي يتابعني ويشوفني ويشجعني وينصحني ..

يمكن تخيلتوني من هالكلام وايد وايد واايد متينه صح ههههههههه

انا طولي 164
وزني حاليا ماعرف كم وصل آخر مره كان 76 ><

شكلا ما ابين هلكثر متينه والبس ميديم لارج ما وصلت للاكس لارج اهم شي هههههههههه

لكن يبالي رجيم ويبالي انزل اقل شي 15 كيلوو

يومياتي ان شاء الله بتكون مصوره .. ببدا من السبت .. بحط وزني الصح .. وببدا على بركة الله ..

وان شاء الله هالاسبوعين قبل رمضان اطمع اني انزل فيهم ع الاقل 4 كيلو

أنتظر تشجيعكم ،، اقتراحاتكم ،، لو وحده مجربه رجيم حلو وصحي وينزل نزول حلو بجربه .. انا ضد انظمة النوع الواحد والانظمة القاسيه ،، اهم شي يكون النظام صحي و متكامل ..

وهي صح ويا الرجيم بشرب جاي اسمه العنود ،، يمدحونه وقلت بجربه ،، اللي جربته تقولي عن تجربتها