اتخذت قرار سريع بعد طول انتظار،،، اخيرا ربطت المعده

بعد نقاش طويل عريض وريلي ابد ما كان راضي اتصلت على مستشفى الامارات اخذ موعد عند الدكتور روجيه واكتشفت انه صارله شهر يسوي عمليات ربط في بوظبي خصوصا انه دكتور مستشفى الامارات في دبي، ما تتخيلون فرحتى قلت سبحان الله كل مالها الامور تتيسر، خصوصا انه المستشفى اللي يسوي فيه العمليات في بوظبي ابد مو بعيد من بيتي، قالوا كل ثلاثاء يكون موجود خذت موعد وكان اليوم الثاني،،،

سرتله الموعد متحمسه شرحلي الوضع وطمني وقالي اذا كنتي ماشيه على كلامي وارشاداتي بتكون امورج في السليم، طبعا رجعت البيت وبعد نقاش طويل عريض رضى زوجي بس اني اسويها في اجازه الاولاد شهر 12.

سافرت وتونست في شاليه وتزحلقت وتعورت كثير، مع ان الطيحه كانت خفيفه، وقبل العمليه باسبوع اتزحلقت في الدوام وطحت وكان يوم عصيب ملئ بالالام النفسيه والجسديه وحسيت ان زياده الوزن لها تأثير، ومعاناتي مع المتن من بعد ما يبت بنتي الاولى وانا عندي 5 الحين، في اخر ياهل نزل وزني كثير مع الحمل صح مش في صالح ولدي لكن كنت مستانسه اني برجع رشيقه، وبالفعل نزل وزني كثير خصوصا يتني حمة الرضاعه اسبوعين ووصل وزني 69، بعدها قررت اغير نظامي الصحي لمده 6 اشهور بعدها ما قدرت اتحمل خصوصا اني بالرغم من اني مسويه الدايت لكن طلع وزني 4 كيلو، الموهيم بعد ست اشهر ما قدرت عالدايت حاولت كثير وابد ما قدرت وزدت يوم ولدي كمل سنه 15 كيلو، ما تتخيلون كيف، حينها عرفت ان لازم اسوي شي قبل لا يفوت الفوت،،، في مواقف كثيره تعرضت فيها فحياتي من بينها اني كنت سايره ازور بنت عمي في المستشفى نفس اليوم الكل تفاجأ كيف متنت مره واحده، طبعا انا خلاص تعودت على الكلام وما صار اييب فيني شي، بعدها رجعت البيت قلت لزوجي بسويها قبل عيد الاضحى طبعا تفاجأ، وقبل عيد الاضحى يعني بعد اقل من اسبوع، وبعد نقاش طويل عريض رضى وما صدقت مسكت الفون وحددت الموعد وتوكلت على الله، قالولي تعالي ثاني يوم علشان يشوفج دكتور التخدير وناخذ فحوصات،،، قلتلهم فااااااالكم طيب.

ثاني يوم صبحت عليهم وسويت فحوصات كثيرة، تخطيط قلب، الترا ساوند، دم الخخخ تميت ساعتين وخلصت قالولي تعالي يوم العمليه الصبح

اذا شفت في تفاعل بكمل قصتي،،،

ههههههههههه قرييييت وقريييييت واخر شي ماشي تكملللله

مااايخصني ف ربط المعده بس حبيت اقرا الحمدلله وزني اوكي

اختي تريد تسويييها بس انااا كنت اول المعارضييين لانها صغيره

ان شاءالله بتيي التكمله،،،
ةوبعدين اذا اختج صحتها زينه بس متينه ليش واقفه ضدها، والله المتن تعب نفسي واحراج ما تتخيلينه،. ريلي كان معارض وزعلان لكن يوم شافني اليوم تحسر انه كان معترض كل هالفتره

اذا تحبين اختج وتهمج مصلحتها خليها تستخير وتتوكل على الله وترا ضمان تغطيها الحينه

السلام عليكم
لا انصح بهذه العمليه بعد تجربه احدى قريباتي
في البدايه نزل وزنها وفرحت
بس والله العظيم بعد فتره رجع
وغير هيك صحتها تعبانه
نقص حديد ومعدتها حساسه ترجع على طول
هذه نصيحتي لا تسويها

وين التكملة بانتظار القصه

نعود نكمل،،،

ثاني يوم صبحت عليهم وسويت فحوصات كثيرة، تخطيط قلب، الترا ساوند، دم الخخخ تميت ساعتين وخلصت قالولي تعالي يوم العمليه الصبح

قبل يوم العمليه اتصلت فيني الريسبشن وطلبت امرها علشان تعطيني حبه المرئ، لازم اخذها قبل لا انام واصبح عليهم صايمه الساعه ٨ لان عمليتي بتكون ٩

يوم العمليه
قمت من الصبح خلصت امور الببت والعيال وكنت مرتبه شنطتي قبل بيوم صليت واستخرت واستودعت عيالي لرب العالمين وتوكلت على الله
دخلت المستشفى دفعت باقي المبلغ وطلعت طابق العمليات، ويلست في غرفه الافاق اللي بتكون الغرفه اللي بدخلها بعد العمليه حسب كلامهم، طبعا سألوني الاسئله العاديه حساسيه عمليات الخ،، النيرسرات كانن حبوبات الصراحه وبزياده حسيت انهم يعطون معنويات للمريض، خذوا مني كرمكم الله بول. وعطوني ملابس العمليه ويلست اتريا

ين امي واختي وتمينا سوالف وضحك ساعتين، مرني الدكتور وعطاني جهاز بلاستيك فيه ثلاث كور وطلب مني اشفط عليه بقوه ثلاث مرات عسب يقيس قدرتي عالتنفس، وقالي بعد العملية بيكون اصعب بس علشان نتاكد من وضع الرئه.

بعدها ين السيسترات ولبسوني ستوكنقس للريل الين الركبه نفس الدلاغات بس اصابع الرجل مفتوحه علشان يحافظون على الدم ولازم يتم فيني ٣ ايام، بس عادي افصخهن لكن لازم ارد البسهن،،، وسلمت على امي وشلوني بالكرسي المتحرك الى غرفة العمليات

دخلت غرفه العمليات كانه خلية نحل، الكل يشتغل على شي وكان مساعد الدكتور موجود وتم يكلمني ويطمن على وانا ادعي واشرتله اني ادعي وبعد حتى هو تم يعطيني بعض الادعيه، وفجاة وبدون سابق انذار ما شفت نفسي الا قدني في غرفتي اتوجع واسمع صوت امي تناديني. اتاريهم بنجوني هاييج الساعه وسوولي العمليه.

هو في النهايه يعتمد على وزن وطول المريضه، يعني انا وزني وصل لل٨٦ يوم العملية وغير اني قصيرة والكتله الدهنيه متجمعه في الكرش اللي يشوفني يتحراني حامل، وهالوزن صارله سنين اذا نزل يرجع دبل،،، اما بخصوص اللي تعرفينها ورجع وزنها مثل قبل يعتمد على حسب اتباعها لارشادات الطبيب وتضويقها للحلقه، انتي اتقولين انها اترجع دوم معناته تحمل نفسها اكثر من طاقتها