ردا على سؤال الأختbint shj بخصوص صالون للحمام المغربي أنا بقولكن طريقة الحمام المغربي و أحسن تسوونه في البيت :
تخلطي حنا مال الجسم (تحصلينها في السوق الإيراني بالشارجه) مع عصير ليمونة ومع الصابون المغربي (هو بعد بتحصلينه في السوق الإيراني بالشارجه أو بالجمعيات أو كارفور ) و شوية شب مطحون و تدهني جسمج كامل و تخليه على جسمج مال عشر دقايق و في نفس الوقت تكوني فاتحة الماي عالحار بس طبعا تكونين لافة الماي على جنب عشان ما يي عليج عقبها ترجعين الماي عالدافي العادي و تغسلين جسمج بالكامل و فيه ليفة اسمها كيس الحمام المغربي (بتحصلينها بعد في السوق الإيراني في الشارجه أو في الكارفور) و تبلشين تليفين جسمج بهاليفة و انتي تليفين حطي كل شوي عالكيس أو الليفة مادة اسمها (صاقي داو) موجودة بعد في السوق الإيراني بالشارجه بتشوفين أشياء تطلع من جسمج هاي الطبقة الميتة ألي تكون عالجلد مال الأوساخ ألي في الجو و العرق و الغبار يعني نفس ما تقولين و انتي قاعدة تليفين جسمج بهااليفة تكونين قاعدة تسوين (سكراب SCRUB) لجسمج لين ما تخلصين كل جسمج و ركزي عالمناطق الغامجة شوي أما ظهرج فخلي شغالتج أو أختج أو أي حرمة عندج في البيت تسويه لج أو اشتري نفس الليفة بس مال الظهر ماادري عاد إدا بتحصلينها في السوق الإيراني و لا لا بياخد منج هالشي كله مال نص ساعة ولا تنسين تخلين الماي عالحار عشان يكون فيه بخار في الحمام. يوم تبين تسوين ويهج اجلبي الليفة عشان ماتكون وايد خشنة عالويه مع شوية صافي داو عليها.عقبها تغسلين جسمج كامل بالماي دافي و خلاص لا تشغلين الحاروتغسلين شعرج بالشامبو و عوض البلسم تحطين طين مغربي خاص للشعر (بتحصلينه بالسوق الإيراني الي في الشارجه) على شعرج هو يي في كيس لونه أخضر .عقبها تخلطين الطين الأحمر (بتحصلينه بعد في السوق الإيراني بالشارجه) مع شوية ماي ورد و تدهني بيه كل جسمج و فيه طين مغربي بعد حق الويه (هو بعد بالسوق الإيراني) تحطينه بعد على ويهج و تتمددين في البانيو مال ربع ساعة أو ثلث ساعة و انتي مغمضة عيونج و مرتاحة لأن الطين هدا وايد يريح الأعصاب و الجسم يستفيد منه لأن المسام مال الجسم تكون مفتوحة.الطين الأحمر ترا اختياري ممكن مرة تسوين الطين الاحمر ومرة تسوين الحمص مطحون ومخلوط بماية الورد فيه وايد ماسكات للجسم … عقب ما تخلص الربع ساعة أو الثلث ساعة تغسلين راسج و ويهج و جسمج كله بالماي الدافي و عقبها تليفين عمرج بالليقة العادية و الصابون العادي الطبيعي (فيه صابون مغربي اسمه صابون الطاووس بعد بالسوق الإيراني) و إدا مب متوفر فالصابون ألي تستعملي دوم. عقبها تيبين سطل فيه ماي دافي ضيفين عليه خاشوقتين ماء الزهر وملة تقريبا من ماي مفور فيه من قبل شوية خزامة و شوية ورد و شوية قرنفل بعد ما تصفينه من هالأعشاب(بتحصلين هالشي كله بالسوق الإيراني ألي في الشارجه) و تخلطين هالماي بإيدج و تصبينها على كل جسمج من راسج لريولج يخلي ريحة طيبة في الشعر و في الجسم و عقب مال خمس دقايق تقريبا تتنشفين .وتشربين كوب لبن بارد عشان يريح لج أعصابج أكثر و اكثر
أتمنى أكون أفدتكن
