خواتي العزيزات, اشحالكن؟ عساكن بخير وعافية…
والله ما اعرف كيف ابتدي ومن وين ابتدي؟ اب صراحة انا طايحة في مشكلة ما يعلم ابها غير رب العالمين.
من فترة, سلفت شخص اعرفه 6000 درهم على أساس انه يردهن لي بعد يومين ولكن اللي حصل انه قام ينكر هالشي والله الشاهد انه سلفته هالمبلغ.
حاولت معاه بالطييب انه يرجع الدين لنه حرام يتسلف من الناس وبعدين ينكر وانا احينة ما اعرف شو اسوي وخاصة اني محتاجة البيزات ضروري.
والله اني كنت اموفرتهن عسب اسوي فيهن عملية واحينة ما عندي ولو قلت لأهلي بيجتلوني.
لا يروح تفكيركم لبعيد وتقولن انه بيني وبينه علاقة او شي من هالقبيل لا سمح الله, والله كان بينا شغل لأنه يشتغل في مجال بيع السيارات ولكن ما اعرف كيف وثقت فيه وعطيته البيزات بدون ضمانات.
دخيلكن ساعدوني وصدقوني ما راح انسالكن هالمعروف. والله اني محتايتهن. الحمدلله كل يوم ادعي ربي العالمين بانه يفرجها معاي.
على فكرة, انا حاولت ابلغ عليه ولكن قالولي في المركز ما انروم انسوي شي معاه لأن ما عندي دليل ضده وما في شي يثبت انه خذ البيزات عني وحتى لو وصلت السالفة للمحكمة هو قال انه عادي عنده يحلف ع القرآن (استغفر الله تخيلوا انه مستعد يحلف جذب ع القرآن).
هذا كل اللي عندي واتمنى من الله ومنكن المساعدة العاجلة, وصدقوني بذكركن بالخير طول عمري ويزاكن الله خير.
اختكم
الريم (ماضي)
مال الحرام مايدوم.. واكيد بيعرف هالشي عاجل وغير آجل..
كل اللي عليج تسوين تدعين الله.. ودعوه المظلوم مافي بينا وبين الله حاجز.
والله يعوضج خير..
الله يفرج همج يارب …
ويستغلون الحريم الطيبات… قانونيا انت ماتقدرين تسوين شي للأسف… إلا إذا طرشتيله رياييل يهددونه و يطلعون من البيزات غصب مادري… ترى هذا واحد جبان بيموووت خوف