في البدايه احب ابارك لكل العرايس الي طلعن وعرسن واقولهن الف مبروك والله يسعدهن ويهنيهن وعقبال باقي البنات والملقوفات
في موضوعي هذا حبيت اشرح لكم طريقة ترتيب جهازي عشان اوديه لبيت ريلي
طبعا انا ما بسوي عرض حق الجهاز لان ما تزهبت وااايد اشيا
نبدا بسم الله بالذهب
بخليه بالعلب مالته العاديه بس بلف ع العلب شرايط وبربطه بشكل فيونكه
الأكسسوارات شي منهن بعلبهن وبسوي نفس طريق الذهب والقلوب الخفيفه والشغابات حطبتهن بتعليقة الاكسسوارات
والسيع حطيتهن بعلبه مال السيع الي اتي مجموعه
طبعا بحطهن كلهن بشنطه الذهب والاكسسوار مع بعض
الملابس
الجلابيات والمخورات غسلتهن و وديتهن الدوبي ودخنتهن وقطبتهن وحطيت كل شيله تناسب الجلابيه والمحخوارات ويا بعض عشان تسهل علي عملية الاختيار عقب العرس وحطيتهن باكبر شنطه
والشنطه الكبيرة الثانيه حطيت فيها البيجامات القطنيه والتيشرتات وملابس الدلع والشلح والصراويل القطنيه وطبعا نفس الشي غسلتهن وكويتهن وقرطستهن ورتبتهن بالشنطه
اما الشنطه الوسط حطيت فيها قمصان النوم والبجايم الحرير والملابس الداخليه
والشنطه الوسط رقم 2 حطيت فيها البديات والتنانير والبناطلين وهالاشياء
والشنطه الصغيرة حطيت فيها الشيل الملونه والشيل السود وشيل الصلاه
والهاند باق الصغيرة حطيت فيها الزيليغات وملحقاتهن واغراض الصابون والشامبو وهالاشياء والاشياء المتفرقه الي مافي شي وياها من ادوات تشبها حطيتهن وياهن
اما بالنسبه للنعلان اشتريت ادراج مصنوعه من خيزران وصفيت النعلان فيها وعدلته من برع بالود وغلفته بالورق الشفاف وحطيت في كل درج الكور الي اطلع ريحه
المكياج مخلتنه على حطته كان يايني هديه محطوط في بكي من مخبل راااااقي جدا عشان جذيه ما بغير
والعطورات والكريمات حطيته بصحن زجاجي كبير فيه قاعده ((هذا كان ياينا هديه من قصر الحلويات فيه حلاوه وانا استغليته لهذا الشي)) ولزقت في كل غرشة عطر ورده واطراف الصحن دور ما داير حطيت ريش وغلفنا بالورق الشفاف الساده طبعا هذا مؤقت لاني ماخذه كبت زجاجي بطرشه بيت ريلي عشان يصفون العطورات والمكياج والاكسسوارات فيه اما العطورات العربيه مخلايات بغراشهن كل واحد بعلبته عشان ما ينكسر وحطه بكيس الين يوصلونه عشان يبطاونه مرة وحده ويصفونه بالكبت ويا العطور
اما عن الشباشب مال البيت حطيتهن بصندوق مصنوع من خيزران من هوم سنتر
والشبابيص يبت سله مسطحه واسعه لبستها حرير صيني لون ذهبي بدون ما الزقه او ادبسه عشان اقدر استفيد من السله والقطعه لاني ما اباهن يختربن وصفيت الشبابيص بشكل عشوائي ولفيته بالورق الشفاف وسويله ربطه شكل + وحطيت كريستال على الشريطه بلون الورده الي لزقتها في النص
اما عن المغربيات بخليهن بعلاقاتهن واكياسهن والعبي نفس الشي
وشو؟؟؟؟؟ بعد ما ادري هذا الي اذكره الي تتذكر شي انا ماذكرته تسالني عنه عشان اجاوبها
والسموووحه ع الاطاله
ماشاء الله ،
ترتيـب حلو احم نبا صور D=
بالتوفيـق وشكله العرس قريب . .
الله ايسرلـج امورج ويبارك لـج
وعقبال ما اعيش هاللحظااااااات قريبا ان شاء الله تعالى
مبدعه حتى في تنسيقج
وعقبال مانشوف الصور
والله يوفقج بحياتج اليديده يارب
ملقووووفة بزيااادة..!!
بس لو صورتي سلة الشبابيص وصينية العطور واللي انتي مسويتهم بإيدج 
لا لج مستقبل ما شاءالله
يعطيج العافية