ليش الدنيا قاسيه

مرحبا بنات شخباركم

مثل ما انتو شايفين انا جديده في المنتدى وللاسف اول موضوع اكتبه في قسم المشكلات الاجتماعيه
بس شو اسوي انا مالي خوات وما عندي حد اشتكيله بعد الله غيركم
انا يا بنات كنت مخطوبه لواحد واموت فيه ويموت فيني خطبتنا طولت سبع سنين كنت ما اشوف في الكون غيره ولا اسمع بين الناس غير صوته كان يومي كله اكلمه مع العلم انا عمري ما طلعت وياه وهو محترم لابعد الحدود يحترمني ويحترم اهلي وفجأه يا بنات بعد كل هالسنين قالي انا ما اقدر اخذج وفسخ الخطوبه بدون سبب والله اني احس عمري بكابوس ما اعرف ليش سوى جي بعد ما ضاع عمري وياه تركني بدون سبب بعد ما وصلت الثلاثين قال ما يقدر يتزوج والله اني بموت من الحزن والهم ليششششششششششششش سوى جي دموعي ما وقفت شو اسوي كيف ابتدي حياتي بعد هالعمر كيف اعيش ويا غيره وهو ملك حياتي والله اني يالسه اصيح وانا اكتب مب عارفه وين اروح شو اسوي
اهله مساكين متلومين فينا وهو مختفي وانا اصلا ما بكلمه بعد الي سواه

انا بس حبيت افضفض واكتب الي بخاطري لاني ما عندي حد

واسمحولي اني طولت عليكم وارجوكم تدعولي ان الله يبرد النار الي فيني

الله يكون في عونج اختي
لازم الريال تكون عنده اسباب عسب يفسخ الخطوبه جيه وبسرعة

البنات اللي عندهن ربيع يوم يهدهن ربيعهن عقب شهر ولا شهرين يتخبلن ( الله يهديهن والله )
فما بالج انتي مخطوبة ويالسة تحلمين طول هالسبع سنوات

مالج غير ربج اختي عليج بقيام الليل وقراءة القران
عسب ربي يهدي بالج ويريحج
لانه ما ترومين تسوين شي غيره
يمكن لين عقب يتصل باهلج يشرح الموقف ويكون له عذره

والله يكون في عونج اختي
ةوتذكري دووووووم
.. الطيبون للطيبات ..

أول شي هذا مب ريال.. هذا نذل.. أكبر نذل…
معروف الريال يوم تسوين له سالفة يسوي لج طاف….
ألحين إنتي فيها.. مالج غير الدعاء… والبقرة وآل عمران…
صح صعب وضعج وما بتقدرين تتحملين… بس اصبري…
لكن لو فكر يرجع لج… سدي كل الأبواب في ويهه..
قوليله ورد الحزن اللي كانت.. ماتت.. ألحين أنا وحدة يديدة قوية مو اللي على خبرك…
وروح دور غيري.. والله بيتحسين بارتياح.. ولا تركضين وراه..
عشان يحس إن عندج كرامة ومنزلة عالية… وإنج ما بتركضين وراه رغم هالسنين الطويلة…
عشان اللي ما يبيك لا تصيح تبيه….
والله يعينج ويصبرج على ما ابتلاج…
وما أقدر ألومج لأنه شي صار وانتهى…
الله يعينج عزيزتي..

وعسى أن تكرهوا شيئا وهو خير لكم .. والله يرزقج بولد الحلال .. حاولي تشغلين عمرج بشي و الايام بتنسيج انشاء الله ..

مشكورات خواتي على ردودكم الطيبه والله اني يالسه اراها واصيح انا الي حاز بخاطري العمر الي طاع والله ان علاقتنا كانت شريفع وعفيفه لان هو ربيع اخواني عشان جي عمره ما غلط كان مثل النسمه ما اعرف شو الي صار انا ما افكر ارجعله حتى لو رجع واعتذر حق اهلي

صدقوني انا مب طايقه عمري مستحيه من كل الناس ربيعاتي في الدوام يسألوني متى العرس لانه كان جريب ما اعرف شو اقول غير اني اسير الحمام واصيح

ما أقول غير الله يعينج و يصبرج .. و سبحان الله يمكن يكون في فسخ الخطوبة خير لج