بناآت وحريماآت ، بصراحة شفت مشاكل اللي تخصنا نحن الطيبات 
واللي دووم نسكت عن حقنا ، وللآسف بدال ما نحصل تقدير من الشخص ، نشوف التطنيش وحقنا دووم يضيييع ، ليش؟!! بس لان نحن طيباااااااااااات ،، ويتحسبوونا مقصة كل حد يي ويقص علينا ،
بس خلاآص ، ان شاء الله اليوم بتشوفون آخر موضوع لي في هالقسم 
لاني بالفعل ناوية اتغير ..هالنية كاانت موجودة من قبل ، بس كان ينقصها الارادة القوية ، وهالارادة ان شاء الله بكتسبها مع الآيام ، وبحاآول أحل مشاكلي بنفسي …
حبووبأتي كبدآية التغيير أنا أبغي منكم نصيييحة ، وخصوصا الوحدة لما تتغير يبالها فترة عسب طبعها يتغير ، وكون طبعي هادية وحساسة وما اعرف كيف ارد ،، بغيت مساعدة منكم عسب ابتدي خطووة كبيرة نحو التغيير
واول خطوة ابغي ابتديها : (( أعرف كيف أرد على كل حد عسب اوقفهم عند حدهم وأقولهم Enough is Enough)) بس ما ابغي ابين لهم عصبيتي ..ابغي اكون في نفس مبتسمة واقولهم هالكلام بس باسلوب حلو ..
بعطيكم السياريوهات اللي استوت وياي وخلتني اتخذ هالخطوة :
1- في بيئة العمل :
زميلاتي كلهن تغيروا علي ..انا كنت اضحي عشاانهم وأهد كل شغلي عسب اراضيهم واسولف وياهم عسب ما يملون من اجواء الشغل ..بس بالمقابل شو حصلت منهم غير اني في يوم كنت محتاجتنهم محد مد يد العون لي ..كنت في أمس الحاجة اني افضفض لحد من زميلاتي بس الكل كان لآهي عني وما كنت ابغي من وقتهم غير دقايق معدودة بس الله كريم ..والحينة ما ابغي اراكض وراهم ..
مديري كان احسن منه ما شي ..دوؤم يساعدني ويوقف وياي ..بس يت فترة انه وايد قام يخورها ويعطيني شغلة بدون ما يخبرني كيف اسويها ، ويوم اساله يرد عليه بكل برود بدون ما يعلمني شي ..واخر شي يوم اعطيه المستجدات يعصب علي ويقولي ليش سويتي جي .؟ بس انا اتم دوم سااكتة ..مراات يطرشلي ايميل يكون معصب بس انا اطنش ايميلاته ..لاني مب من النوع اللي يرادد ..بس اشوف هو قام يستغل سكوتي وكل مرة يعطيني شغلة ويبين انه هو الصح ..وانا وحليلي من الخوف ما ارد عليه ولا اناقشه في اي موضوع ..بس الحينة ما اقدر لان نفسيتي خلاص تعبت ابغي اقوله انه يعلمني بس والله عادي اصيح جدامه لان الشغلة صعبة ..بس ابغي ابين له انه هو من حقه يخبرني شو السالفة مب اتم شرات الهبلة وكله عقب يعصب علي ..وهالمرة ما ابغي اسكت عن حقي بس كييف اوقفه عن حده ..تخيلوا ان في القسم نفسه محد مسولي اي اعتبار ..يعني اشكره اشياء قامت تستوي وانا خبر خير محد يخبرني ..مع ان المدير بامكانه عالاقل يعطيني خبر بس هو ما يحسسني اني من التيم ..نفس الشي مع الزملاء محد مسولي اي اعتبار …بس لاني ساكتة ..
2- بين الأهل..
دوومي الساكتة الهادية..بس اخرتها كل شي يفرووون علي ، واخرتها حتى الصغارية لسانهم قام يطول علي ..يجرحووني وطبعي دووم اطنشهم بس دومم بدال ما يسكتون يزيدونها علي ..هذا وانا اكبر وحدة في العائلة ..بنات خالتي الي اصغر عني يطنشون وجودي يوم ايي عندهم واكلمهم ولا كأني موجودة ..مخليني بين الهامش .. واستويت مقصة ..اي شي يبوونه احاول من كل قلبي اعطيهم …بس يوم ابغي شي منهم محد يعطيني والله ازعل واتضايج من خاطري …يعني في دنيتي ما حصلت شي منهم موولية ..بس انا اللي اعطي واعطي واعطي بس ما شي فايدة ، تضحياتي سارت في مهب الريح ..واي وقت يبون شي يخبرون بعض سيروا عند عاشقة هي اللي بتعطيكم …بدون ما يستأذنون مني وياخذون رايي ..
ان شاء الله برجعلكم مع السياريوهات اللي ابغي اتخذ خطوة عشانها لاني تعبت من الكتابة وما اقدر ازيدكم هم لان اللي فيكم كافيكم ..بس مثل ما قلتلكم انا ابغي ارد عليهم برد بحيث اني ما أقل أدبي على أي حد ..
مشكورين على تحملكم لمشاكلي
اول شي الله يعينج
الطيبه في هالزمن ضايعه
والكل ياخذ مصلحته وماشي..
بالنسبه لشغل وزميلاتج
لازم من اول ما اشتغلتي تسوين لج حدود في صداقتهن
وتخلينها صداقه شغل لا غير
يعني كيف بقولج
لا تساعدين ولا تعبين عمرج في شغل غيرج
كلكم يايات من بيوتكم وعارفين كل وحده شغلتها شو
يعني ليش تاخذين شغلج وشغل غيرج…..؟
اكيد هم بيعيبهم دام لاقين حد يسوي عنهم شغلهم
ولازم بييج حجود بالتصرفات لانه البشر ما يستغنون عن هالصفه في هالزمن
وانتي قلتيها كنتي في امس الحاجه محد مد يده لج
شفتي المقابل بعيونج
يعني لا تضحين وتعبين لغيرج
لانهم كلهم ما يستحقون
ومنهم مديرج هذا البطران
شحقه يعطيج شغله..؟
ليش وين حن عايشين
لازم هو المدير ويكون قدوه لج في مشوارج العملي ويساعدج على الرقي بالشغل
مب يكدس عليج شغله وشغل ييرانه
شو هالفوضى هذي
والله هزلت…..!
اول كان زين وياج لانه ما يعرف عنج شي
يوم شافج تسكتين عن حقج بدافع الخوف
استغلج وقام يعصب ويفر الشغل عليج ع كيفه
وهذا كله غلط بغلط
من باجر ابدي خطوه تغيير يديده
اولا مع زميلاتج
خلي بينكم السلام عليكم وعليكم السلام
بس
واذا قالوا فلانه اباج تساعديني في شغله
قولي السموحه مشغوله ولو انتي ما عندج شغل اصلا
ومثلي انج مشغوله غصب
عشان يعرفون المسترهين عليها راحت
اذا مره ومرتين وثلاث فلانه ساعديني
قالو ماعرف له هالشغل واخاف اخربه ماقدر اسمحيلي
ومنها بيتعلمن يعتمدن ع عمارهن مب عليج انتي كل شي
وثانيا مديرج هذا اللي مسوي عمره عنتر زمانه
ليش حضرته يطرش ايميلات معصب
لو منج ارد له الايميل بكلام اخليه يبلع العافيه
ليش يعني صار مديرج يعصب عليج كانج اصغر عياله
لا والله وين حن عايشين
اذا قالج سوي شغلي
قولي له السموحه انا شغلي كذا وكذا
هذا من وين يا بعد ادري انه شغلي مب جي
واذا عصب
قولي له ليش العصبيه قلت انا شي غلط
ركز في الاوراق وشوف هذا شغل منو
واذا زودها بايميلات العصبيه
ردي عليه بايميل قولي له اولا ليش العصبيه قتلت لك حد انا
اذا انا غلطانه كل انسان يغلط ودامك انت مديري المفروض انت تعلمني الصح والغلط باسلوب راقي يبين انك مدير وقدوه لنا
واسلوب التعصيب هذا ما ينفع لا لك ولا لي
ودامك كل يوم نافخ عمرك ومعصب عيل ما وصلنا لشي يديد ولا تعلمنا منك اي شي زين
بالعكس بتخلي كل موظف عندك معصب ويسب ويلعن والسبب انت وعصبيتك هذي
كل الامور تمشي زينه مادام في عقل رزين يفكر بمنطق
ودامك انت معصب وين الامور بتمشي عدل وانت مسوي عمرك كبريت ومحد يروم يقرب منك
خليه يحس انه مب انتي اللي مغلوب ع امرج
اذا سكتي صدقيني بتتعبين اكثر
لانه التمادي بيزيد اكثر واكثر
والحل بيدج انتي
لو انا مكانج ماعلي لا مدير ولا عزرائيل كررامتي فوق كل شي هلي ما عصبو علي يعصب علي واحد مني والدرب لا والله هزلت
جوفي جوانب الضعف وقوه في شخصيتج وحاولي اتعدلينها
والطيب في ها الزمن مايعيش لا تحاولين تعطين وايد ولا تاخذين وايد
افاا عليج كلنا خوات
بس انا ما اشتغل ادرس حاليا وعارفه بالي تمرين بهــ فيه نفس الطبع ….الطيبه ….بس تغيرت ^ _ ^ …
شوفي فديتج عشوقهـ …عامل النــاس كما تعامــــل …بنفس الطريقهـ …ولكن مب بإساليب وقحه او تقللين من مستواج بسبب تعامل الناس وياااج …انتي بإسلوب تقدرين تكونين علاقة احترام مع الكل الي وياااج …وتقدرين تقولين لا …او ترفضين بإسلوب حلو وقوي في نفس الوقت ….انا لين اللحين احس انه في استغلال من نااس في حيااتي ..وحتى مثلج احب اسااااعد وااايد …لكن مب ع حساااب مصلحتي …انتي تسولفين ويااا زميلاتج في الشغل بهدف انج تكونين علاقة زماله حلوه بينج وبينهن وانج تشتغلين شغلت غيرج ترى ها اكبر غلط …انا ياما ساعدة ربيعاتي في بروجكتاتهن …وتصدقين لو احصل صعوبه في بروجكت او شي …والله اني ما اطلب منهن يساعدني او يسون لي شغله معينه ما احب ….وانا متأكده وفي مواقف كثيره تبين لي انه بعض هل الربيعات بعد ما اتخرج بيقل تواصلهن وياايه وحتى قبل يتصلون يبون شي ولين اللحين اتصاالاتهم بس عشاان يسألون او يبون شي معين …فأنا ليش احرق اعصابي وليش مسويه لهن ألف حساب ..لا …وحياتج ما احاول اكبر السالفه …واقول ما اقدر اطرش لكن مثلا بروجكتي …انا مستعده اساعدكن بالافكار وكيف تكتبن وجي …لكن اطرش بحثي لكن سوري ..وبطريقه حلوه …ويفهمن …
انتي بعد اذا عطوج شغل غيرج …واجهي وقولي لهم هااي مب من مسؤوليتي هل الشغله.. اعتقد من مسؤولية غيري …وانا مستعده اسوي جزء بسيط منها لكن سوري ما اقدر …بإبتسامه حلوه …وشوي كلام حلو …للحريم الي ويااج …وخلي دوامج بس للشغل وعلاقتج بهن بس في حدود الشغل ….عطي لنفسج وقت خارج الشغل تكونين علاقاات صداقه مع بناااات او تتواصلين مع اقرب صديقاتج …انا جذي …لدرجه انه ربيعتي وزميلتي تقول لي …انتي واايد تحبين تروحين الكليه حتى لو ما شي دوام …وهي بطبعها اذا طلع لنا يوم مب لازم نروح الكليه ..ما تروح تفضل تيلس في البيت ..انا عكسها تماماً …ومب من حبي للكليه ..لكن انا اعرف الي عليه وشوي الي لازم اخلصه واسويه ..وقلت لها …انتي حره ما تبين تداومين لا تين …هااي حريه وكل حد له نظرة الخاصه ..انا بدوام عندي شغل اخلصه …وخاصه اني بتخرج بعد شهرين …وما اقول لج اني ما احصل كلام منيه مناااك …اسمع وادخل من الاذن اليمنى واظهره من اليسرى …
تعلمي تقولين لا ….وبعدها تعطينهم اسباب مقنعه …
وحتى بين الاهــل …لا تقصرين في مسؤليتج تجاه اهلج لكن لا تعطين بزيادة …اقصد في حدود للعطاء …سوي الي يمليه عليج ضميرج وبادري بالمساعده …فأي وقت اهلج يحتاجون لكن بحدود …اذا مب وجه لوجه بمسج او نوت صغير او حتى رساله صغيره …انا جذي اتعامل ويا خواتي ومرات صدق من كثر ما اقول لهن لا ما اقدر بروحي احس اني ما اعطيهن حقهن من نواحي كثيره …
شكلي واايد رمست ^ _ ^ …بس جنج طحتي ع العوق وخليتيني افضفض ويااج …
ع العموم …التغير فديتج يباله وقت ..وعطي نفسج وقت كبــــــــــــــــــــــير …
واي خدمه انا حاظره ما يردج غير كيبوردج ….
في المدرسه مثلا ربيعاتي يقولون لي ودي تقاريرنا ولا رحي سألي الابله عن شي او تعالي عند الخصائيه معاي
بس يوم انا ازقرهم اباهم في شي والله يتحرطمون او يسون لي طاف بس وحياتج السنه هاي تعرفت على غيرهم
حتى ما يجون عندي ولا شي والله يطلعون قبلي الفسحه وانا اسير الساحه ادورهم مثل المينونه
واحصلهم يالسين يسولفون ويضحكون ولا كاني موجوده
والله الطيبه في هالزمن غباء