تعودت قبل النوم أبلل خدي بدمعي يا عاآلم منو اللي فيه الخير !!!

خواتي .. حبيباتي ..

شفتوا العنوان وقريتوه .. صح !!

المطلوب .. تنصحون هالإنسانه الغاليه على قلبي

واللي عرفتها عن طريق هالمنتدى .. وفعلا إنسانه مالها مثيل ..

ونادر ما تحصلون شراتها ..

وقفت معاي وقفه ما راح أنساها طول عمري .. و واستني ..

ما قصرت معاي بشي يزاها الله ألف خير …

رغم إني عرفتها من شهر وشي تقريبا ..

بس كأن هالمعرفه من سنين والله …

واليوم .. وأنا داشه ع الميل أفتحه وأشوف اليديد ..

شفت منها هالموضوع ..

وقلت والله ما تهون علي أخليها جي ..

و والله راح أحاول أعوضها خير باللي هي فيه ( فديتها )

موضوعها كالتالي :

السلآم عليـــــكم ^^

يا عالم بسألكم سؤال ، منو اللي فيه الخير هاليومين !!

سمعوا قصتي ..،، وأبغى جواب يهدي ثورة أحزاني ..!

ع أيام الدراسه كآن عندي صديقه ..، وكنـا جزء من بعض ،،

لدرجة أن كل اللي يشوفنآ في المدرسه سواء من بنات أو معلمات أو إداره

ينادونا بالتوأم ..

لو شافوني بروحي يقولون وين طبقتج .. والعكس صحيح ،،

ومرت الأيام ونحن صداقتناآ فوق ما تتصورون ..، ما كنا صديقآت وبس ..

كنآ خواتْ و بروح وحده ..،

إلين ما يا اليوم اللي فآرقنآ فيه كراسي الدرآسه ..،

وانتقلنا لـ الدراسات العليآ ..

وفي الكليه كنـآا في كلآسات مختلفه .. لكن الغريب !!

كنت أروح لهآ باستمرار .. عشان نطلع ونتمشى وياآ بعض ..

ويوم تشوفني … تحقرني وتشررد !!!

استغربت من تصرفآتهآ .. ومن حقرانهآ الزايد

ورحت لهآ وقلت لهآ يا فلآنه أنا زعلتج بشي ؟

ضايقتج بشي

والرد كان لأ ..

عيل شو فيج

تقولي مافيني شي بس جيه

إلين ما اكتشفت في الأخير أنها تعرفت على واحد نساها كل اللي حواليها

وكانت عاطيته هو الاهتمام وأنا ودرتني عشانه !!!!

أنا ما زعلت في البدايه .. قلت هالإنسان يمكن تحبه عشان جيه الحبيب غير عن الصديق

وطنشت الموضوع .. إلين ما يتني في يوم تشتكي لي منه !!!

وأنا سمعتهآ إلين الآخر وقلت لها وشو المطلوب مني ..

قالت لي ماشي بس حبيت أشكي لج ..

وأنا من رمستها ومن اللي فهمته من الموضوع ومشكلتها معاه

قلت لها شوفي يا بنت الناس ..، إذا هو فعلا يباج يندل باب بيتكم

ماله داعي هالأفلام والحركات اللي يسويها ..، لو هو ريال نيته زينه

خل يتقدم لج واللي عرفته بأنه إنسان يداوم وحالته الماديه ممتازه

قالت لي بشوفه وبسأله .. وفعلا سألته وقال لهاا أنا أحبج وجيه وجيه

لكن ما أقدر أتقدم لج الحين وسألته ليش قال لها حاليا أنا بسافر ومشغول بـ دواماتي

مابي آخذج وأنا مش عاطينج حقج كزوجه …

وصدقيني يوم تتيسر الأمور بخطبج

قالت له خلاص سوي اللي يريحك ..

وخبرتني بالسالفه إلين ما عرفت أنا منو هالإنسان …

وسألت عنه عند أخوي وقالي هذا أصلا راعي حركات وبنات معروف بين الشباب !!!!

وعنده بدل التيليفون عشررر … والريال هذا مب زين ويقص ع بنات خلق الله

أنا اهنيه انصدمت !!!!

وقلت لازم أخبر ربيعتي عشان لا تتوهق فيه ويوم خبرتها

تتوقعون شو كآان الرد ؟ ،،

قالت أنتي أصلاً غيوره وتبينه حقج وكذا وكذا …

وأنا قبل لا أبيعه راح أبيعج أنتي وأخليج ……!!!!!!!

وأنا من يوم ما قالت لي هالكلمتين حقرتها وقلت لها عيل خل ينفعج

وأنا من داخلي متقطعه عشانها .، الولد فار مخها وأخاف باجر يأذيهاآ

وحرآم كانت متعلقه فيه لدرجه ما تتصورونهآا ..

إلين ما يا اليوم اللي كشفته هي نفسهآ على حقيقته ويت تتعذر لي وتستسمح

لكن أنا ثقتي فيهاآ انهدت تدرون ليش ؟

لأنها بعد ما ودرتني طلعت حرتهآا فيني وتكلمت عني بالسوء جدام الغير

وما خلت حد ما سبتني وأهانتني جدامه ونسبت لي شغلات أنا بريئه منهآا بالأساس

فقلت الباب اللي ايي منه الريح أسده وأستريح ..،

وتعرفت على وحده أثناء دراستي بالكليه .. وصارت جزء لآ يتجزأ من حيآتي

مشكلتي كنت أعطي الناس فوق حقهم وزود

وما أقصر بحد .. وكنت أقول هالإنسانه هي اللي فيهآا الخير

وبتكون ربيعتي الوفيه ..

لكن للأسف ..،،

البارحه بعد ما قطعت عني شهر كامل بعد ملجتهآا

طرشت لي تقولي أنا مابيج تدقين علي عسب ريلي ما يباني أرمس أحد !!!!

أنا اهني بغيت أعرف الزبده يعني شوه ؟!!!

قالت لي خلاص انسي اللي كان امبينا وأنا بشوف حياتي ويا ريلي

وخلاص لا تدقين ولا كأنا نعرف بعض!!!!!

بدون سبب ، بدون مقدمات ؟؟

الأولى خسرتها عسب حبيبهآا

والثاني خسرتها بسبب ريلهآا

..،،

أنا شو ذنبي يعني في هالدنيآا أقدم الخير وألاقي الجفآاا !! ؟

والله إني صرت مآ أنام الليل ..، ماعندي اللي أشكي له ..،

مآ عندي اللي أفرغ له ثورة أحزاني ..،،

ما عندي غير الباري جل وعلا ..

منو اللي فيه الخير جآاوبوني !!

خلآص أنا طفرت ..، كل اللي كنت أباه صديقه ..، وفيه خلوقه تحس وتداريني شرات أختهآا

أنا محد عندي في البيت غير أختي اللي تصغرني بـ 10 سنين

صرت أقضي أيامي لـ وحدي ..، ما عندي اللي يواسيني ..،

جاوبوني دخيلكم ..،

منو اللي فيه الخير ..؟

منووؤ ؟

7
7
7
7

وأنا من هالمنتدى حابه أقول لج يا حبيبتي

أنتي ما خسرتيهم بالعكس

هم اللي خسروا وحده شرواج

لو يوزنون فيج الذهب ما يلاقون وحده بقيمتج الغاليه فديتج

وأنا أقولج كلنا معاج

ولا تزعلين عمرج ولا تكدرين خاطرج

أنا أول صديقه وفيه بوقف معاج

لأنج إنسانه لا يعلى عليها فديت روحج

حبيبتي

اللي سويتيه عشاني مب شويه

وهذا اعتبريه رد الجميل على وقفتج معاي من البدايه ^_^

وسامحيني لأني حطيت موضوعج هني فالمنتدى

بس أنا حبيت أقولج أن بنات المنتدى فيهم الخير

وبيوقفون معاج .. الحمدلله إنسانه مو قاصرج شي

أخلاق وأدب وحبوبه وحلوه وأمووره ^_^

ويا بخت اللي صار من نصيبج

…..

يالله حبيباتي

أنصحوا عيوني الحبوبه

وعطوها معنويات

واللي يبا يتواصل معاها شخصياً ..

تتواصل معاي ع الخاص عسب أعطيها إيميلها

أترك الباجي لـ البنات أصحاب الود والأفه والموده ^_^

ربج وحده اللي ماينسى عبده رغم المعاصي رحيم ودوود قريب.. ربناا يحب ويهتم بعبده الصالح لللأبد