ضايق صدري من تعليقات الرياييل فموضوع الطلاق فالجريدة

بنات في موضوع في الجريدة أن الإمارات هي الأعلى في الخليج في نسبة الطلاق وايد ضايقني لو تشوفون تعليقات الرياييل عاقين اللوم على البنات وعلى الحريم وكأن كل الغلط والعيوب على الحريم، أللي كاتب ان الحرمة المواطنه ما تشتغل في بيتها وأن الحرمة تصارخ وتزاعق وتتطلب فلوس وايد مالت عليهم، وأن كله تبا ماركات، وكل واحد يالس يمدحلي أنه ماخذ جنسية أجنبية أو وافدة وانه مستقر واللي يبا يستقر يتزوج أجنبية، يعني مب حرام عليهم كل هالتضحيات اللي يسونها المواطنات وذامينهم وحاطين عليهم، مب كفاية الحريم يتحملون خياناتهم وبخلهم ومعاملتهم البايخة وزعلهم بالشهور وطناشهم للحرمة وطلعاتهم ويا ربعهم وفوق هذا ساكتات، أنا مب معرسة بس ميته قهر لاني أشوف خواتي وربيعاتي كيف يبذلون جهد في زواجهم وعاطين أزواجهم كل شي من فلوس ومساعدة فالراتب وصبر بالسنين وسكوت عالخيانات،وبخل لا هدايا ولا شي، وفوق هذا يقولك المواطنه فيها وفيها، طيب لو مب عايبتنك هاي ا لمواطنه لا تيلس تمدح الجنسيات الثانية وتقولهم تبا تريح راسك سير خذلك أجنبية، (بالحرف الواحد كاتبلي أنه سافر الدوله الفلانية وخذ وحدة ومرتاح وياها يعني سار وتعني ويابها من هناك) يا مصيبتي خلصوا الحريم اللي في البلاد؟ حسبي الله ونعم الوكيل… يعني أسمحولي الجنسيات الثانية نحن نعاني من عنوسة وما نقدر ناخذ جنسيات غير جنسية الإمارات فما نبا تهجم من أي حد، انا قهري بس على هالرياييل اللي ما يقدرون وعاقين اللوم كله أن بنت البلاد مافيها فايدة واللي كاتب ميوعتني لان ماتحب ريحة البصل وتبا بيت روحها يا سلام ليش انت ما تفتح بيت وتسكن فشقه يوم تاخذ هالأجنبية، ليش هالظلم كله والله أعرف مواطنين ماخذين أجنبيات ولا يشتغلن يالسات مرتاحات وعندهم من الشنط الماركة وبشاكير وكل شي يصرفون عليهم مثل صرفهم على أي مواطنه ليش يعني تقول هالكلام، أنت لو ما سترت على بنت بلادك منو بيستر عليها تباها تسير عند الأجنبي، حشا هاي المواطنه اللي أنت حاط عليها هي بنتك وأختك وأمك، والله عيب وحرام اللي يالس يستوي، الواحد منهم أن فشل فزواجه الأول قام وذم المواطنه وسار عند ربعه وحذرهم و مدحله الجنسية الفلانية الروسية ولا الدول العربية أنا ما بذكر جنسيات لان مابا أحول الموضوع لمسار ثاني، في شي إسمه محاولة أولى وثانيه وثالثه فالخطبة في شي إسمه انك تتعرف على البنت زين قبل لا تطلق وتقول المواطنه مب مال عرس، أحين عرفت ليش نحن ما نعرس وليش العنوسة إرتفعت بشكل مب طبيعي في هاي البلاد، نحن في زمن الفتن. والظلم الوحدة ما قامت تشوف ريال زين يعتمد عليه، كله ذم وإنتقاد وتنقيص من شأننا،.ماقول غير الله المستعان والله يحفظنا..صدق قهروني ورفعولي ضغطي.

كل شي قسمة و نصيب و التعميم مو بزين

الناس في كل مكان فيها الزين و الشين

هلا حبيبتي
ادري ان شي يقهر ويحز في الخاطر
بس يا الغالية أصابعج مب نفس الشي

يمكن هاللي مسويين معاهم مقابلة مستواهم واحد
يعني شنو تتتوقعين من مستوى ريال ماخذ فلبينية مثلا وهاد بنت بلده
ولا ماخذ من جنسية ثانية الله يعلم ببلواها

هاذي كلهم مستوى واحد وتفكيرهم واحد

انزين انتي ماعرفتي ردة فعل الشباب الثانيين

بالعكس جان بيمدحون مدح في بنت ديرتهم
لأنهم عيال ناس ويعرفون السنع والذوق
ومستواهم الثقافي والعقلي غير