معلومات عن المانيا

بنات انا ان شاء الله بسافر المانيا في 22/7/2017 = تروحين وتردين بسلامه ان شاء الله
بغيت اعرف بعض المعلومات اذا ممكن = اكيد ممكن

شو الجو الحين(شهر 7) وشهر 8 ؟ابا اعرف الجو عشان اعرف شو اخذ معايه من ثياب = الجو في سبه اوكي زين بس في نص 7 تنصلخين حر وهذا على حسب سيرتي الصراحه انصلخ من كمن سنه الاخيره اللي رحت فيهن صلاخ حر اتقولين في لبلاد موجة حروره يت لبلاد اهناك هلكنا الصراحه بس هذا مايعني مايتخلله ايام مغيمه ولا مطر خفيف .. بس من اول 8 يبتدي الجو يتغلب يعتدل ويبتدى البراد والمطر والخير عكس 7 يعني يبالج لبس ثجيل وخاصه اذا بتسيرين مناطق جبليه مثل قارمش

انا افكر اللبس بالطو طويل ووسيع خفيف اذا كان صيف ومتين اذا شتا يعني اقصر عن العباه بشبر لاني مااريد اللبس عباه واللفت انظار الاجانب وبعدين في بنت قالت لي ان وحده من هلها لبست عباه تموا الاجانب يصورونها . = ختيه عادي مافي اشكاليه عباه ولا من غيرها اللي ايريحج بس انا اشوف من نظرتيه انج تلبسين قميص طويل او بالطو احسن للانه العباه تتوسخ بسرعه وبتطرطر من تحت للانج ماتضمنين انه العباه مابينشب شي فيها الخ .. ومن ناحية التصوير ترى عادي في وحده بغت اصور عيوز لابسه برقع اتقول حلو الماسك اللي لابستنه والعيوز مشتطه عليها فقيره وهذيج تتحراها يايزتلها السالفه صورتها فوق 4 صور هههههههههه وبعدين على فكره هم يخافون من العباه السوداء وحتى اذا لابسه قميص اسود بيتروعون ومره وحده عن مالت العطور في مركز الهيرتي قالت لي العامله اهناك انتي من وين قلت الها من الامارات فجت ثمها قالت دبي قلت هيه قالت ليش جيه لبسج تحريتج شيعيه تقصد يرانيه " انا ماقصد شي انقل الكلام اللي دار بينا فقط " قلت الها ليش قالت لابسه قميص اسود طويل فاتحريتج منهم المره الثانيه شافتني بقميص ابيض وفيه كل الوان القوس قزح ولابسه سكار فيتون ابيض وفيه نفس اللوان القميص قالت هيه الحين اوكي لا وغمزت لي بعد .. فا عادي الامر راجع لج في الاخير :1 (6): :1 (7):

بغيت اعرف شو احسن وسيلة مواصلات واسعارهم؟ = بالنسبه للمواصلات القطارات احسن وسيله التكاسي في حد منهم ماعندهم ضمير وخاصه اذا انتي مادلين ايودونج الدرب الطويل بس للانج عربيه وعندج بيزات هذا تفكيرهم :1 (5): طبعا مب الكل والاسعار تقدرين تدخلين موقعهم وتعرفين واذا عندج حد يسوق وعادي عنده ايسوق اهناك اجرولكم سياره اريح الكم ومتى ماتبون بتسيرون

وشو الاسواق اللي تنصحوني ارووح لها ؟ = وايد الصراحه عندج المارين بلاتز منطقه كلها اسواق مطاعم كوفي شوبات وين مابتصدين بتحصلين عمرج في مركز ولا دكاكين اشري على كيف كيفج وفيه من كل شي وفيه الرخيص وفي الغالي واي سكه بتدخلينها بتحصلين محلات بعد .. عندج الاولمبك سنتر .. الرايم اركادا .. عندج ماكس مليان شتراس هذا شارع الماركات اي ماركه تبينها بتحصبينها في هالشارع راقي وفيع مطاعم وكوفي شوبات بعد .. وكذالك في مناطق ايسوون فيه سوق خيري اتحصلين الاشغال اليدويه فيها ومسوين فيه قسم لترفيه الصغاريه وايد حلو تقدرين تسالين الرسبشن وهم بيخبرونج اذا في فعاليات .. وبعد عندج في الاولمبك بارك ايسوون فعاليات ومهرجانات حلوه والعاب وكشكات تسوقين فيهن تحف كرستالات شنط الخ وايد حلو وانا كنت منزله موضوع عن ميونخ بس للاسف الصور في المرجوم لابتوبي الجديم

وبشو تتميز اسواق المانيا لان بصراحه هاي اول مره اروح. = وايد اشياء على حسب شو انتي اللي اتحبينه ويعيبج تاخذينه في عطور صنع المانيا ماتظهر من لبلاد حصريه يعني الهم مايصدرونها لبلاد ثانيه حلوه بعد وفي عندكم مستحضرات تجميل بعد حلوه اذا كنتي تحبين هالشي واحسن شي اشوف العنايه يعني مستحضرات العنايه سواء كريمات ولا مرطبات الخ ماتحصلين منهن في لبلاد والصراحه وايد اوكي ومفيدات صدق تلاحظين الفرق بسرعه واهم شي انهن طبيعيات مافيهن كرتزون ولا غيره شرات الغش اللي عندنا اهني وانا عاده اكيح فيهن ماقصر.. وفي سكارفات وايد حلوه اول المارين حرمه عيوز اتبيعهن اشكالهن غريبه ووايد حلوه بعد .. وفي من كل شي انتي شو يعيبج بالضبط عسب نقدر انفيدج فيه ان شاء الله

واخر طلب بغيت اعرف الاماكن السياحيه اللي هناك؟ = الاماكن السياحيه الاسواق ذكرتهن لج .. الحدايق عندج الاولمبك بارك .. الانجليش جاردن .. الويست بارك .. حديقة الحيوان .. حديقة الليقو .. حديقة اليورو بارك .. المتاحف .. واذا كنتوا من رواد السينما عندكم السينما اللي بانجليزي صوب المتحف بتحصلونها .. عندج مذبحت هتلر تقدرون اتسيرون تشوفون المكان وين كان يسجنهم ويحرقهم وحذاله مناظر جدا رائعه .. عندكم قارمش اذا اتحبون الثلج .. وبعد تحبون رحلات بحريه الخ تقدرين تسالين الرسبشن عن منطقه الحدود بيدلونكم المنطقه نسيت اسمها ايسوون رحله لج بحريه على يخت كبير جنج في تيتنك وايد حلو ويعرفونج على المناطق وايد حلو المكان .. وتقدرين اتروحين المناطق الريفيه خارج ميونخ ووايد اماكن حلوه تقدرين تسيرين الها وعلى حد علمي اول ماتنزلون من الطياره وتدخلين المطار في ناس يستقبلونكم ويعطونكم بروشورات وكتيبات اتساعدكم على السياحه في ميونخ وفيهن كل شي حتى المطاعم الصيدليات الخ

واتمنى تساعدوني لان صدق ماعندي وقت وابا اجهز = الله ايسر الكم ان شاء الله واتمنى الكم رحله سعيده ان شاء الله

ويزااكم الله الف خير = وياج ان شاء الله والسموحه عالقصور