مرحبا خواتي سيدات الإمارات
العنــوان بالعربــي … صلصه جــوز الهنــد و الكــزبــرة
بما ان الرمضان قريب .. قلت بحط لكم هالصلصه اللي سويتها اليوم
تقدرين تستخدمينها مع
السندويشات
السلطات
التورتيلا
سمبوسه وغيرها من المقبلات
وبعض الاكلات الهنديه
المقادير:
جوز الهند الطازج تقريبا كوب و نص والا كوبين حسب الرغبه
كزبرة تقريبا كوب و نص
فلفل اخضر حار اربع او خمس او حسب الرغبه (حسب حرارة الفلفل)
فص ثوم
ملعقه طعام ملح
ملعقه طعام سكر
ملعقه طعام بذور الكمون
تقريبا ثلاث ملاعق طعام عصير ليمون او خل
تقريبا ثلاث ملاعق زيت او حسب الحاجه
تقريبا ثلاث ملاعق ماء او حسب الحاجه
<<<< كأنه كله تقريبا ههههههه شسوي لين يضبط
الخطـــوات:
الخطوة الاولى .. اذا جوز الهند مب مطحون
اطحنيه في الخلاط .. لين يصير بهذي الكثافه
حطيه على صوب .. و في نفس الخلاط حطي الكزبرة
فلفل الاخضر قطعيه من النص + فص الثوم
ممكن تزيدين الفلفل حسب الرغبه
عقب حطي باقي المقادير .. بذور الكمون + السكر + الملح + الخل + زيت + ماء
ملاحظه: انا سويتها على خطوتين لان الخلاط اللي عندي صغير .. و ما قدرت احط البهارات مع الفلفل و الكزبرة
تقدرين تختصرينها في خطوة وحدة
ملــح
سكـــر
الخـــل << على فكرة هذا خل معتق مسوينه في البيت .. تعصرين لومي اخضر مع ملح و تحطينه فوق السطح شهووور و تنسينه .. لين يصير لونه جيه بني (من الشمس)
طعمه يخبل .. ترومين تستخدمينه مع السلطات .. لحم .. دياي .. مشاوي .. شوربات .. كل شي تقريبا
عقب زيدي عليه جوز الهند المطحون (الطازج) << انا اضطريت احطه على دفعات لان خلاطي صغير مثل ما قلت .. لكن ترومين تحطينه كله رباعه
هذي النتيجه النهايئه … الاغلبيه يحبونها شوي سائله اكثر .. يعني كثافتها اقل
انا احبها متماسكه جيه .. الناس اذواق
اذا تبين تخففينها شوي .. زيدي عليها شويه ماي والا زيت .. انا افضل الماي
ترومين تحطينها في علبه تتسكر عدل و تنحفظ في الثلاجه لمدة شهر والا اكثر شوي
بس بشرط انه ما تلمسينه بإيدج .. والا بيفسد على طول اليوم الثاني .. يعني استخدمي الملاعق فقط
واذا طلعتي كميه لا تفكرين ترجعينها للعلبه .. على طول بيفسد باليوم الثاني
اذا اتبعتي النصايح هذي .. بيتم عندج شهر تقريبا بدون ما يخترب في الثلاجه
وهنـــي و عافيـــه ^_^
حياج
مادري ليش ما طاعت الصور تتحمل في الوورد…خزنتها وبعدين ظفتها….احوليت
بس تستاهل…….شكلها لذيذه
فديتج والله .. الصور لانها عودة شوي
المهم خزنتيها بالاخير .. يعطيج الف عافيه
جربيها و خبريني النتيجه
ان شاء الله تعيبج 